ជាតិ
សង្គមជាតិ
លោក ជា សុផារ៉ា ស្នើសុំអ្នកឯកទេស២នាក់ពីអូស្ត្រាលី ឱ្យជួយមើលការងារវិស័យសំណង់នៅកម្ពុជា
លោក ជា សុផារ៉ា រដ្ឋមន្តី្រក្រសួងរៀបចំដែនដី នគរូបនីកម្ម និងសំណង់ ចាប់ដៃជាមួយ លោកស្រីAngela Corcoran ឯកអគ្គរដ្ឋទូតអូស្ត្រាលីប្រចាំកម្ពុជាកាលពីថ្ងៃទី១៦កក្កដា ឆ្នាំ២០១៩ នៅទីស្តីក្រសួង។
×![]()
ភ្នំពេញ៖ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានស្នើសុំទីប្រឹក្សា ឬអ្នកឯកទេស២រូប ពីប្រទេសអូស្ត្រាលី ដើម្បីជួយមើលការងាវិស័យសំណង់នៅកម្ពុជា។ អ្នកឯកទេស២រូបនៃវិស័យសំណង់ដែលរដ្ឋមន្ត្រីក្រសួងរៀបចំដែនដី ស្នើសុំពីរដ្ឋាភិបាលអូស្ត្រាលីនោះ មានមួយរូបធ្វើជាគ្រូបណ្តុះបណ្តាល និងមួយរូបទៀត ធ្វើជាទីប្រឹក្សាបច្ចេកទេសសម្រាប់ប្រចាំការផ្ទាល់នៅទីស្តីការក្រសួង ដើម្បីជាជំនួយគាំទ្រក្នុងការរៀបចំ និងអនុវត្តបទ បញ្ញតិ្តបច្ចេកទេសនានាពាក់ព័ន្ធនឹងវិស័យសំណង់នៅកម្ពុជា។
ការស្នើសុំនេះ បានធ្វើឡើងចំពោះមុខ លោកស្រីAngela Corcoran ឯកអគ្គរដ្ឋទូតអូស្ត្រាលីប្រចាំកម្ពុជា កាលពីថ្ងៃទី១៦កក្កដា ឆ្នាំ២០១៩ នៅទីស្តីការក្រសួង។ នេះបើតាមទីភ្នាក់ងារសារព័ត៌មានកម្ពុជា(AKP)។
ក្រៅពីសំណើនេះ លោក ជា សុផារ៉ា ក៏បានស្នើលោកស្រី Angela Corcoran ឱ្យជួយគាំទ្រក្នុងការអភិវឌ្ឍធនធានមនុស្ស និងអនុញ្ញាតឱ្យមន្ត្រីជំនាញពាក់ព័ន្ធរបស់ក្រសួង ទៅទស្សនកិច្ចសិក្សា ដើម្បីសិក្សាស្វែងយល់បន្ថែមពីការគ្រប់គ្រងសុវត្ថិភាព លើវិស័យសំណង់ក្នុងប្រទេសអូស្ដ្រាលី និងជួយរៀបចំជាសិក្ខាសាលា សម្រាប់បណ្ដុះបណ្ដាលមន្ត្រីពាក់ព័ន្ធ ក្នុងប្រទេសកម្ពុជា។
ជាការឆ្លើយតបនឹងសំណើនេះ លោកស្រីAngela Corcoran នឹងពិនិត្យសំណើនេះ បន្ទាប់ពីទទួលបានរបាយការណ៍ បេសកកម្មចុងក្រោយ របស់ទីប្រឹក្សាបច្ចេកទេស។ លោកស្រីបានមានប្រសាសន៍ថា លោកស្រីនឹងជួបពិភាក្សាបន្ថែមទៀត ជាមួយក្រសួងរៀបចំដែនដី ដើម្បីពិភាក្សាការងារលម្អិត ពីកិច្ចសហប្រតិបត្តិការរយៈពេលយូរ រវាងស្ថានទូតអូស្ត្រាលី និងក្រសួងរៀបចំដែនដី៕
Tag:
សំណង
ជា សុផារ៉ា
© រក្សាសិទ្ធិដោយ thmeythmey.com
