ជាតិ
សេដ្ឋកិច្ច
ជប៉ុនផ្តល់គ្រឿងចក្រ១៥គ្រឿងសម្រាប់ជួសជុលថ្នល់ តម្លៃ៤.៦លានដុល្លារឲ្យកម្ពុជា
ប្រភពរូប បានពីទំព័រហ្វេសប៊ុក ក្រសួងការបរទេស និងសហប្រតិបត្តិការអន្តរជាតិ
×![]()
ភ្នំពេញ៖ រដ្ឋាភិបាលជប៉ុន បានផ្តល់គ្រឿងចក្រ Stabilizer ចំនួន១៥គ្រឿង ដែលតម្លៃសរុប៥០០លានយ៉េន (ប្រមាណ៤.៦លានដុល្លារ) សម្រាប់ជួសជុលផ្លូវថ្នល់នៅកម្ពុជា។ គ្រឿងចក្រនេះ គឺជាជំនួយឥតសំណងលើកទីបីក្នុង«គម្រោងកម្មវិធីអភិវឌ្ឍសេដ្ឋកិច្ច និងសង្គម» ដែលមានចុះហត្ថលេខា ដោយ លោក ប្រាក់ សុខុន រដ្ឋមន្ត្រីការបរទេស និង លោក ហូរីណូអ៊ូជិ ហ៊ីដេហ៊ីសា (HORINOUCHI Hidehisa) ឯកអគ្គរាជទូតជប៉ុនប្រចាំកម្ពុជា។ 
រយៈពេល៧ខែ ដើមឆ្នាំ២០១៩ រដ្ឋាភិបាលជប៉ុន និងកម្ពុជា បានចុះហត្ថលេខាលើលិខិតប្តូរសារ និងកំណត់ហេតុនៃការពិភាក្សា ស្តីពីហិរញ្ញាប្បទានរបស់ជប៉ុនចំនួន៣លើកហើយ ដោយគិតនៅត្រឹម ការផ្តល់ជំនួយគ្រឿងចក្រសម្រាប់ជួសជុលផ្លូវថ្នល់នេះ ដែលធ្វើឡើងនៅទីស្តីការក្រសួងបរទេស នាថ្ងៃទី១៧កក្កដា ។
កាលពីថ្ងៃទី២ កុម្ភៈ កម្ពុជាបានចុះហត្ថលេខាលើកទីមួយ ដែលទទួលជំនួយពីជប៉ុនប្រមាណ៤៣.៣៧ លានដុល្លារ ក្នុងគម្រោងកម្មវិធីអភិវឌ្ឍសេដ្ឋកិច្ច និងសង្គម សម្រាប់អនុវត្តកែលម្អ-ស្តារប្រព័ន្ធស្រោចស្រព ប្រព័ន្ធដោះទឹកភាគខាងលិចបឹងទន្លេសាប និងសម្រាប់អភិវឌ្ឍប្រព័ន្ធផ្លាស់ប្តូរទិន្នន័យអគ្គិសនីនៅកំពង់ផែ ដើម្បីធ្វើទំនើបកម្មកំពង់ផែ។
ការចុះហត្ថលេខាលើកទីពីរ កម្ពុជាទទួលបានជំនួយជិត៥លានដុល្លារ សម្រាប់គម្រោងអាហារូបករណ៍អភិវឌ្ឍធនធានមនុស្ស និងគម្រោងសាងសង់ឃ្លាំង Container Freight Station នៅតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ កាលពីថ្ងៃទី៣១ ខែឧសភា ដែលធ្វើឡើងនៅក្រុងតូក្យូ ប្រទេសជប៉ុន។
យោងតាមរបាយការណ៍របស់ទីភ្នាក់ងារសហប្រតិបត្តិការអន្តរជាតិជប៉ុន ចាប់ពីឆ្នាំ២០១២ ដល់ឆ្នាំ២០១៦ ជប៉ុនបានផ្ដល់ជំនួយឥតសំណង ចំនួន ១,៩៧២ រយលានយ៉េន (ប្រហែល១,៧ពាន់លានដុល្លារអាមេរិក) ប្រាក់កម្ចី ១,១៦៨ រយលានយ៉េន (ជាង១ពាន់លានដុល្លារអាមេរិក) និងជំនួយបច្ចេកទេសចំនួន ៨៧០ រយលានយ៉េន (ជាង៧៦៤លានដុល្លារ)ដល់ប្រទេសកម្ពុជា៕
Tag:
គ្រឿងចក្រ
ផ្លូវ
ជប៉ុន
© រក្សាសិទ្ធិដោយ thmeythmey.com
