អន្តរជាតិ
សភាអាមេរិក បោះឆ្នោតប្រឆាំងការលក់អាវុធឲ្យអារ៉ាប៊ីសាអូឌីតតម្លៃ៨,១ពាន់លានដុល្លារ រជ្ជទាយាទអារ៉ាប៊ីសាអូឌីត និងប្រធានាធិបតីអាមេរិក ដូណាល់ ត្រាំ ។ រូបភាព AFP
× រដ្ឋសភាអាមេរិក នៅថ្ងៃទី១៧ ខែកក្កដា បានបោះឆ្នោតប្រឆាំងនឹងគម្រោងលក់អាវុធឲ្យអារ៉ាប៊ីសាអូឌីត ដែលមានតម្លៃដល់ទៅ៨,១ពាន់លានដុល្លារឯណោះ។ ការបោះឆ្នោតប្រឆាំងនេះ ជាការវាយប្រហារមួយលើទំនាក់ទំនងអាមេរិក និងសម្ព័ន្ធមិត្តដ៏សំខាន់នៅមជ្ឈិមបូព៌ា ប៉ុន្តែក៏បានបង្ហាញពីការមិនពេញចិត្តមួយផ្នែករបស់អាមេរិកទៅលើភាពឃោរឃៅនៃប្រតិបត្តិការរបស់កងទ័ពចម្រុះដឹកនាំដោយអារ៉ាប៊ីសាអូឌីតនៅយេម៉ែនផង។ យ៉ាងណាមិញ លោក ដូណាល់ ត្រាំ នឹងវ៉េតូលទ្ធផលនេះមិនខាន។
ដំណោះស្រាយចំនួនបី ត្រូវបានសភាតំណាងរាស្ត្រអាមេរិកអនុម័ត សំដៅទប់ស្កាត់គម្រោងលក់សព្វាវុធឲ្យអារ៉ាប៊ីសាអូឌីត។ លោកប្រធានាធិបតី ដូណាល់ ត្រាំ បានប្រកាសដាក់ប្រទេសស្ថានភាពអាសន្នកាលពីដើមឆ្នាំដើម្បីបើកផ្លូវដល់គម្រោងលក់អាវុធដែលមានតម្លៃដល់ទៅ៨,១ពាន់លានដុល្លារនេះ។ ដោយឡែកព្រឹទ្ធសភាអាមេរិកវិញ បានបោះឆ្នោតប្រឆាំងគម្រោងនេះរួចហើយ។ ដំណាក់កាលបន្ទាប់ គឺការសម្រេចចិត្តរបស់លោក ត្រាំ ។
គេរំពឹងថា លោក ត្រាំ នឹងទាត់ចោលការបោះឆ្នោតប្រឆាំងរបស់សភាអាមេរិក។ បើបែបនេះ ក្នុងករណីសភាមិនអាចរកសំឡេងបានពីរភាគបីដើម្បីបិទផ្លូវទេនោះ គម្រោងលក់អាវុធឲ្យសម្ព័ន្ធមិត្តដ៏សំខាន់នៅមជ្ឈិមបូព៌ាមួយនេះ នឹងបន្តដោយរលូន។
សំណុំរឿងឃាតកម្មអ្នកកាសែត Jamal Kashoggi និងភាពសាហាវឃោរឃៅក្នុងសង្គ្រាមនៅយេម៉ែន ជាមូលហេតុសំខាន់ដែលសមាជិកសភាអាមេរិកមិនចង់ឲ្យមានការលក់អាវុធច្រើនសន្ធឹកសន្ធាប់បែបនេះ ទោះអ្នកទិញជាម៉ូយដុំរបស់អាមេរិកក្ដី។ ក្រុមអ្នករិះគន់លើកឡើងថា ការលក់អាវុធនេះ នឹងធ្វើឲ្យសង្គ្រាមនៅយេម៉ែនកាន់តែយ៉ាប់យ៉ឺនខ្លាំង ខណៈវិបត្តិមួយនេះរកច្រកចេញមិនទាន់ឃើញ ហើយប្រតិបត្តិការរបស់ក្រុមចម្រុះដឹកនាំអារ៉ាប៊ីសាអូឌីត បង្កើតជាវិបត្តិមនុស្សធម៌ធ្ងន់ធ្ងរទៅទៀត។
ប្រធានគណៈកម្មាធិការការបរទេសរដ្ឋសភាអាមេរិក Eliot Engel និយាយថា បើឃើញពីអ្វីដែលកើតឡើងនៅយេម៉ែន អាមេរិកត្រូវតែមានជំហរច្បាស់លាស់មួយ។ ទោះជាទទួលស្គាល់គំរាមកំហែងបង្កដោយក្រុមឧទ្ទាមហ៊ូទីដែលស្និទ្ធអ៊ីរ៉ង់ក្ដី សមាជិកសភាជាន់ខ្ពស់ដដែលនេះ បញ្ជាក់ក្នុងកិច្ចប្រជុំសភាទៀត ថា អាមេរិកក៏មិនត្រូវមើលមិនឃើញពីអំពើហិង្សា ក៏ដូចជាការសម្លាប់រង្គាលជនស៊ីវិលនៅយេម៉ែននោះដែរ។
តាមគម្រោង ក្រុងវ៉ាស៊ីនតោនចង់លក់សព្វាវុធចំនួន២២មុខដូចជា គ្រឿងបរិក្ខារថែទាំយន្តហោះ និងអាវុធទំនើបៗមួយចំនួនទៀតទៅឲ្យអារ៉ាប៊ីសាអូឌីត អេមីរ៉ាតអារ៉ាប់រួម និងហ្សកដានី ស្របពេលដែលភាពតានតឹងនៅមជ្ឈិមបូព៌ាកើនឡើង។ នៅយេម៉ែន ក្រុមឧទ្ទាមហ៊ូទី ត្រូវបានគាំទ្រដោយអ៊ីរ៉ង់។ ដោយហេតុនេះ ទើបលោក ត្រាំ ក៏សម្រេចចិត្តប្រកាសដាក់ប្រទេសក្នុងភាពអាសន្នដើម្បីលក់អាវុធដោយមិនឆ្លងសភាតែម្ដងទៅ៕
Tag:
អាមេរិក
អារ៉ាប៊ីសាអូឌីត
ដូណាល់ ត្រាំ
អ៊ីរ៉ង់
© រក្សាសិទ្ធិដោយ thmeythmey.com