កីឡាជាតិ
ជាតិ
ណាហ្គាត្រូវស៊ីគីរីវង់លើសពី២គ្រាប់ ខណៈវិសាខាមានប្រៀបដល់ទៅ ៦-០ លើនគរបាលជាតិ លោក មាស ចាន់ណា (ស្តាំ)ចាប់ដៃជាមួយគ្រូបង្វឹកគីរីវង់ក្រោយជំនួបជើងទី១នៅខេត្តតាកែវ, រូបភាពពី CNCC
× ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ថ្នាក់ជាតិ ត្រូវប្រកួតបញ្ចប់ជើងទី២វគ្គ១៦ក្រុមចុងក្រោយនៅល្ងាចថ្ងៃទី១៨ ខែកក្កដានេះ ដោយណាហ្គាវើលដ៍ប្រើកីឡដ្ឋានស្តាតចាស់ស្វាគមន៍គីរីវង់សុខសែនជ័យ ខណៈវិសាខាបើកទ្វារកីឡដ្ឋានខ្លួនទទួលភ្ញៀវអគ្គស្នងការដ្ឋាននគរបាលជាតិ។ ការប្រកួតទាំងពីរធ្វើឡើងនៅម៉ោង៦ល្ងាច។
សម្រាប់ការប្រកួតជើងទី២នេះ ណាហ្គាវើល ត្រូវការឈ្នះគីរីវង់សុខសែនជ័យលើសពី២គ្រាប់ ដើម្បីធានាកៅអីឡើងទៅវគ្គ៨ក្រុមចុងក្រោយពានរង្វាន់សម្តេច ហ៊ុន សែន ថ្នាក់ជាតិ បន្ទាប់ពីពួកគេចាញ់ ២-០ នៅជើងទី១នាជំនួបក្រៅទឹកដី។ ទោះមិនទាមទារដល់ឈ្នះ តែក្រុមមានមូលដ្ឋាននៅខេត្តតាកែវ ត្រូវធ្វើយ៉ាងណាទប់កុំឲ្យមានការស៊ុតបញ្ចូលទីពីណាហ្គាវើល ដើម្បីអាចឈានទៅវគ្គបន្ត។ ការប្រកួតនេះ វានឹងក្លាយជាជំនួបដ៏ទាក់ទាញ និងមានភាពស្វិតស្វាញបំផុត។
ក្រោយមានប្រៀបជាមួយជ័យជម្នះ ៦-០ នៅជើងទី១ វិសាខា អាចមានឱកាសខ្ពស់ក្នុងឈានទៅវគ្គបន្ត ដ្បិតពួកគេត្រូវការត្រឹមស្មើ ឬចាញ់ក្រោម៦គ្រាប់នៅជើងទី២នេះ។ ឱកាសឈានទៅវគ្គបន្តសម្រាប់អគ្គស្នងការដ្ឋាននគរបាលជាតិ មានស្តួចស្តើងបំផុត ដ្បិតក្រុមក្រោមការដឹកនាំរបស់លោក ប្រាក់ សុវណ្ណារ៉ា ទាមទារឈ្នះវិសាខាលើសពី៦គ្រាប់ ដើម្បីធានាកៅអីទៅកាន់វគ្គបន្ត។ តែវាទំនងជាមិនអាចទៅរួចនោះឡើយ ព្រោះវិសាខាជាក្រុមខ្លាំងសម្បូរដោយកីឡាករមានសមត្ថភាព ពិសេសការប្រកួតនេះធ្វើនៅកីឡដ្ឋានរបស់ពួកគេ។
បច្ចុប្បន្នក្រុមចំនួន៦រួមមានបឹងកេត អង្គរថាយហ្គឺរ ភ្នំពេញក្រោន ព្រះខ័នរាជស្វាយរៀង សូលទីឡូអង្គរ និងក្រសួងការពារជាតិកំពុងរង់ចាំក្រុមពីរទៀត ដែលត្រូវប្រកួតនៅថ្ងៃនេះ នៅវគ្គ៨ក្រុមចុងក្រោយពានរង្វាន់សម្តេច ហ៊ុន សែន ថ្នាក់ជាតិ៕
Tag:
បាល់ទាត់
Hun Sen Cup
ណាហ្គាវើល
វិសាខា
© រក្សាសិទ្ធិដោយ thmeythmey.com