អន្តរជាតិ
នយោបាយអន្តរជាតិ
អាមេរិក សម្រេចដកតួកគីចេញពីកម្មវិធីយន្តហោះចម្បាំង F-35 យន្តហោះចម្បាំង F-35 ដែលផលិតដោយក្រុមហ៊ុនអាមេរិក Lockheed Martin (AFP)
× សហរដ្ឋអាមេរិក បានប្រកាសដកតួកគីចេញពីកម្មវិធីយន្តហោះចម្បាំងស៊េរីទំនើបផុតលេខ F-35 ក្រោយពីរុស្ស៊ី បានចាប់ផ្តើមបញ្ជូនប្រព័ន្ធខែលមីស៊ីល S-400 ទៅឲ្យក្រុង អង់ការ៉ា កាលពីសប្តាហ៍មុន។ កន្លងទៅ ក្រុងវ៉ាស៊ីនតោន ធ្លាប់បានគំរាមចាត់វិធានការបែបនេះ ប្រសិនបើតួកគី នៅតែរឹងទទឹងបន្តកិច្ចព្រមព្រៀងជាមួយរុស្ស៊ីទៀតនោះ។
ក្នុងសេចក្តីថ្លែងការណ៍ នៅថ្ងៃពុធទី ១៧ ខែកក្កដា រដ្ឋលេខាធិការក្រសួងការពារជាតិអាមេរិក លោកស្រី Ellen Lord បញ្ជាក់ឲ្យដឹងថា សហរដ្ឋអាមេរិក និងបណ្តាដៃគូពាក់ព័ន្ធក្នុងកម្មវិធីយន្តហោះចម្បាំង F-35 បានសម្រេចចិត្តរួមគ្នាដើម្បីផ្អាកតួកគីពីកម្មវិធីនេះ ហើយកំពុងចាប់ផ្តើមអនុវត្តនីតិវិធីដកហូតជាផ្លូវការផងដែរ។
តាមការចុះផ្សាយរបស់ទីភ្នាក់ងារព័ត៌មាន Reuters មន្ត្រីជាន់ខ្ពស់អាមេរិករូបនេះ លើកឡើងទៀតថា សហរដ្ឋអាមេរិក កំពុងចំណាយថវិកាចន្លោះពី ៥០០ ទៅ ៦០០ លានដុល្លារ ដើម្បីផ្លាស់ប្តូរសង្វាក់ផលិតកម្មនេះ ។
យន្តហោះចម្បាំង F-35 គឺជាយន្តហោះទំនើបផុតលេខលើពិភពលោក ដែលត្រូវបានផលិតដោយក្រុមហ៊ុន Lockheed Martin ហើយបច្ចុប្បន្ននេះ កំពុងត្រូវបានប្រើប្រាស់ដោយអ៊ីស្រាអែល ខណៈមានប្រទេសមួយចំនួនទៀត បញ្ជាទិញផង។ ក្រុងវ៉ាស៊ីនតោន បារម្ភថា ការដាក់ពង្រាយប្រព័ន្ធខែលមីស៊ីល S-400 ទន្ទឹមគ្នានឹងយន្តហោះចម្បាំង F-35 នឹងអនុញ្ញាតឲ្យរុុស្ស៊ីទទួលបានព័ត៌មានច្រើនទាក់ទងនឹងប្រព័ន្ធបំបាំងកាយរបស់យន្តហោះចម្បាំងអាមេរិកស៊េរីទំនើបផុតលេខនេះ។
ជាយូរមកហើយ រដ្ឋបាលលោកប្រធានាធិបតីអាមេរិក ដូណាល់ ត្រាំ បានគំរាមថា ការបន្តកិច្ចព្រមព្រៀងទិញសព្វាវុធជាមួយរុស្ស៊ី នឹងធ្វើឲ្យតួកគីខ្ទាតចេញកម្មវិធីយន្តហោះចម្បាំង F-35 ។ អ្វីដែលគួរឲ្យកត់សម្គាល់នោះ មន្ទីរបញ្ចកោណអាមេរិក ថែមទាំងបានដាក់ចេញផែនការមួយ ដើម្បីដកតួកគីចេញពីកម្មវិធី ដែលក្នុងនោះមាន ផ្អាករាល់ការហ្វឹកហាត់ថ្មីៗនានាដល់អ្នកបើកយន្តហោះតួកគីជាដើម។
សូមបញ្ជាក់ថា ការដឹកជញ្ជូនប្រព័ន្ធខែលមីស៊ីល S-400 រុស្ស៊ីលើកទីមួយ បានធ្វើឡើងកាលពីថ្ងៃសុក្រទី១២ កក្កដា សប្តាហ៍មុន ដោយត្រូវបានដឹកទៅកាន់មូលដ្ឋានទ័ពអាកាស Murted ភាគខាងពាយព្យនៃរដ្ឋធានី អង់ការ៉ា នៃប្រទេសតួកគី។
កន្លងទៅ តួកកី បានចុះហត្ថលេខាទិញយន្តហោះចម្បាំង F-35 របស់អាមេរិកចំនួន ១០០ គ្រឿង ហើយព្រមទាំងដាក់ទុនវិនិយោគក្រាស់ក្រែលលើកម្មវិធីអាមេរិកនេះទៀតផង។ យ៉ាងណាមិញ ខណៈចំណងទាក់ទងជាមួយសហរដ្ឋអាមេរិក និងអឺរ៉ុប ពុំសូវល្អប្រសើរ នារយៈពេលចុងក្រោយនេះ រដ្ឋាភិបាលតួកគី ចាប់ផ្តើមប្រកាន់យកនូវគោលនយោបាយការពារជាតិឯករាជ្យជាងមុន។ ត្រង់ចំណុចនេះ ក្រុង អង់ការ៉ា បានសម្រេចបញ្ជាទិញប្រព័ន្ធខែលមីស៊ីល S-400 រុស្ស៊ី ក្នុងទំហំទឹកប្រាក់ ២,៥ពាន់លានដុល្លារ និងបានបញ្ជូនកងកម្លាំងយោធាខ្លួនទៅហ្វឹកហាត់នៅរុស្ស៊ីទៀតផង៕
Tag:
សហរដ្ឋអាមេរិក
តួកគី
F-35
រុស្ស៊ី
S-400
© រក្សាសិទ្ធិដោយ thmeythmey.com