ជាតិ
មនុស្សស្លាប់ក្នុងគ្រោះថ្នាក់ចរាចរណ៍នៅកម្ពុជាក្នុង១ឆ្នាំ គឺស្មើយន្តហោះធំៗ ៥គ្រឿងធ្លាក់
× ភ្នំពេញ៖ មនុស្សស្លាប់ដោយសារគ្រោះថ្នាក់ចរាចរណ៍នៅកម្ពុជា មានចំនួនប្រមាណ២ពាន់នាក់ក្នុងមួយឆ្នាំៗ។ នេះជាតួលេខដ៏ច្រើន ដែលបង្កើតក្ដីបារម្ភ។ អ្នកពាក់ព័ន្ធបានលើកឡើងបញ្ហាគ្រោះថ្នាក់ចរាចរណ៍នេះនៅក្នុងពិធីចុះហត្ថលេខាលើអនុស្សារណៈនៃការយោគយល់រវាងក្រសួងសាធារណការ និងដឹកជញ្ជូន និងក្រុមហ៊ុនមីឆែលីន និងក្រុមហ៊ុនវើលដ៏ប្រ៊ីដ ស្ដីពីការបង្កើនសុវត្ថិភាពចរាចរណ៍នៅលើផ្លូវថ្នល់នៅកម្ពុជា នៅថ្ងៃទី១៦ខែកក្កដា។
លោក Segsam Trai-ukos អគ្គលេខាធិការក្រុមហ៊ុន Michelin ROH ដែលជាភាគីក្នុងអនុស្សារណៈខាងលើបានថ្លែងដូច្នេះថា៖ «ក្នុងឆ្នាំ២០១៦ ប្រទេសកម្ពុជា មានអ្នកស្លាប់ដោយគ្រោះថ្នាក់ចរាចរណ៍ចំនួន ២០០៨នាក់ ដែលស្មើនឹងយន្តហោះធុនធំប្រភេទ Airbus A380 ចំនួន៥គ្រឿងធ្លាក់ក្នុងរយៈពេលមួយឆ្នាំ»។
រូបពីក្រសួងសាធារណការ និងដឹកជញ្ជូន
ការថ្លែងប្រៀបប្រដូចរបស់លោក Segsam ខាងលើនេះ គឺកាន់តែធ្វើឲ្យមានការចាប់អារម្មណ៍ថែមទៀត ចំពោះបញ្ហាគ្រោះថ្នាក់ចរាចរណ៍នេះ។ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក៏បានបង្ហាញចំណាប់អារម្មណ៍ដូច្នេះថា៖«លោក Segsam Trai-ukos បានលើកឡើងថាការស្លាប់នៅកម្ពុជាដូចយន្តហោះ Airbus ធ្លាក់នៅកម្ពុជារបស់យើង ត្រឹមត្រូវណាស់។ នៅក្នុងរយៈពេល៦ខែដើមឆ្នាំ២០១៩នេះ អ្នកស្លាប់នៅកម្ពុជាមានចំនួន ១,០៣៣នាក់ បើគិតជាមធ្យមយន្តហោះ Airbus A321 ធ្លាក់រាល់ខែ។ ស្លាប់១,០៣៣នាក់ ច្រើនណាស់»។
សូមបញ្ជាក់ថា គម្រោងសុវត្ថិភាពចរាចរណ៍ផ្លូវគោក របស់ក្រុមហ៊ុន Michelin មានរយៈពេល២ឆ្នាំ ដែលនឹងត្រូវបញ្ចប់ នៅថ្ងៃទី៣១ ខែមីនា ឆ្នាំ២០២១ ក្រោមការគាំទ្រហិរញ្ញវត្ថុ និងជំនាញបច្ចេកទេស ពីក្រុមហ៊ុន Michelin ROH និងសម្របសម្រួលគម្រោង និងផ្ដល់វិភាគទានហិរញ្ញវត្ថុ ដោយក្រុមហ៊ុន WorldBridge។ ក្រសួងសាធារណការ និងដឹកជញ្ជូន ជាអ្នកផ្ដល់ការគាំទ្រពេញលេញ និងអនុម័តឱ្យអនុវត្តគម្រោង។
ក្នុងពិធីនោះដែរ លោក ស៊ុន ចាន់ថុល មានប្រសាសន៍ថា គ្រោះថា្នក់ចរាចរណ៍បានសម្លាប់ប្រជាពលរដ្ឋខ្មែរប្រមាណ ៦នាក់ ក្នុងមួយថ្ងៃ និងបានបំផ្លាញទ្រព្យសម្បត្តិជាង៤០០លានដុល្លារក្នុងមួយឆ្នាំ។
លោកបន្តថា គ្រោះថ្នាក់ទាំងនោះបណ្ដាលមកពីកត្តាជាច្រើនដូចជា កត្តាអ្នកបើកបរ កត្តាយានយន្ត ការមិនគោរពច្បាប់ និងកត្តាផ្លូវជាដើម៕
© រក្សាសិទ្ធិដោយ thmeythmey.com