អន្តរជាតិ
ប្រធានក្រុមប្រឹក្សាអឺរ៉ុបថា កាណាដាជាដៃគូអន្តរអាត្លង់ទិកជិតស្និទ្ធបំផុតរបស់ខ្លួន
ប្រធានក្រុមប្រឹក្សាអឺរ៉ុប ដូណាល់ ទូស, នាយករដ្ឋមន្រ្តីកាណាដា ចាស្ទីន ទ្រូដូ និងប្រធានគណៈកម្មការអឺរ៉ុប ហ្សង់-ក្លូដ ចាំងគើ ។ រូបភាព AFP
×![]()
ដោយ: តន ចាន់រិទ្ធារ៉ា
ជំនួបកំពូលកាណាដា-សហភាពអឺរ៉ុប បានចាប់ផ្ដើមធ្វើហើយនៅថ្ងៃទី១៧ ខែកក្កដា ដោយបានបង្ហាញពីភាពស្អិតល្មួតរវាងមហាអំណាចសេដ្ឋកិច្ចពិភពលោកទាំងពីរដែលនៅម្ខាងម្នាក់នៃមហាសមុទ្រអាត្លង់ទិក។ នាយករដ្ឋមន្ត្រីកាណាដា ចាស្ទីន ទ្រូដូ បានបង្ហាញជំហររីករាយចំពោះលទ្ធផលនៃកិច្ចសហប្រតិបត្តិការទ្វេភាគី ពិសេសលទ្ធផលនៃកិច្ចព្រមព្រៀងពាណិជ្ជកម្មកាណាដា-អឺរ៉ុប។ ប្រមុខសហភាពអឺរ៉ុបវិញ ចាត់ទុកកាណាដាជាដៃគូដែលអាចទុកចិត្តបានបំផុតរបស់អឺរ៉ុប។
ស្របពេលទំនាក់ទំនងអឺរ៉ុប និងអាមេរិកមិនសូវសមប្រកបក្រោមរដ្ឋបាលប្រធានាធិបតី ដូណាល់ ត្រាំ ទំនាក់ទំនងអឺរ៉ុប និងកាណាដាបែរជាស្រស់បំព្រងកាន់តែខ្លាំង។ នាយករដ្ឋមន្ត្រីកាណាដា ចាស្ទីន ទ្រូដូ និងប្រធានក្រុមប្រឹក្សាអឺរ៉ុប ដូណាល់ ទូស បានរួមគ្នាបើកកិច្ចប្រជុំកំពូលកាណាដា-អឺរ៉ុបលើកទី១៧ នៅថ្ងៃទី១៧ ខែកក្កដា។
ក្នុងពិធីបើកជំនួបកំពូលនេះ លោក ទ្រូដូ បានលើកឡើងពីលទ្ធផលដែលទទួលបានក្រោយការចុះហត្ថលេខាកិច្ចព្រមព្រៀងសេដ្ឋកិច្ច និងពាណិជ្ជកម្មគ្រប់ជ្រុងជ្រោយ (CETA) ។ លោកនិយាយថា CETA បានទៅហួសពីការបន្ថយរបាំងពាណិជ្ជកម្ម និងការឈានដល់ទីផ្សារថ្មី ហើយជាមួយកិច្ចព្រមព្រៀងនេះ កាណាដា និងសហភាពអឺរ៉ុបរកស៊ីដោយមធ្យោបាយថ្មី។ កាណាដា និងអឺរ៉ុប ក៏នឹងចាប់ដៃគ្នាដើម្បីដោះស្រាយបញ្ហាធំៗដូចជាការគំរាមលើយន្តការពហុភាគីនិយម និងការបំពានសណ្ដាប់ធ្នាប់អន្តរជាតិដែលផ្អែកលើច្បាប់ជាដើម។
លោក ទូស ដែលនឹងចប់អាណត្តិនៅពេលខាងមុខ ចាត់ទុកកាណាដាជាដៃគូអន្តរអាត្លង់ទិកជិតស្និទ្ធបំផុតរបស់អឺរ៉ុប ស្របពេលដែលទំនាក់ទំនងជាមួយអាមេរិកវិញ កំពុងតែល្អក់កករចាប់តាំងពីការក្លាយជាប្រធានាធិបតីរបស់លោក ដូណាល់ ត្រាំ ។ បើតាមទីភ្នាក់ងារព័ត៌មាន AFP លោកសង្កត់ធ្ងន់ថា៖ «យើងអាចពឹងគ្នាលើគ្រប់ស្ថានភាព។»
តាំងពីរឿងឱនភាពពាណិជ្ជកម្មរហូតដល់សម្ព័ន្ធយោធាណាតូ អាមេរិកក្រោមការដឹកនាំរបស់លោក ត្រាំ ហាក់ប្រកាន់ជំហររឹងរូសខ្លាំង ហើយគិតតែប្រយោជន៍ផ្ទាល់ជាងប្រយោជន៍រួម។ ទាំងកាណាដា ទាំងអឺរ៉ុប សុទ្ធតែមើលមុខគ្នាមិនសូវត្រូវជាមួយអាមេរិក ពិសេសលើបញ្ហាពាណិជ្ជកម្មតែម្ដង។ ឲ្យអស់ទៅ មិនមែនតែកាណាដា និងអឺរ៉ុប សម្ព័ន្ធមិត្តអាមេរិកឯទៀតនៅអាស៊ី ក៏ត្រូវរដ្ឋបាលក្រុងវ៉ាស៊ីនតោនប្រឹងសង្កត់កខ្លាំងដែរ។
ងាកទៅរឿងកិច្ចព្រមព្រៀង CETA វិញ កិច្ចព្រមព្រៀងនេះចូលជាធរមាននៅខែកញ្ញា ឆ្នាំ២០១៧ ហើយមកដល់ពេលនេះ ប្រទេសសមាជិកសហភាពអឺរ៉ុបចំនួន១៣ក្នុងចំណោម២៨ បានផ្ដល់សច្ចាប័ន ឯកាណាដាផ្ទាល់ ក៏បានផ្ដល់ភ្លើងខៀវរួចហើយដែរ។ ក្រោមកិច្ចព្រមព្រៀងនេះ បានដកពន្ធស្ទើរទាំងស្រុងលើការដោះដូរទំនិញ និងសេវាកម្មរវាងភាគីទាំងសងខាង ហើយពន្ធចំនួន៦៦៥លានដុល្លារអាមេរិក ត្រូវលុបចោលក្នុងមួយឆ្នាំៗ៕
Tag:
អឺរ៉ុប
កាណាដា
អាមរិក
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
