អន្តរជាតិ
ទោះអាចរងទណ្ឌកម្មអាមេរិក បារាំងនៅតែយកពន្ធលើក្រុមហ៊ុនបច្ចេកវិទ្យាដដែល រដ្ឋមន្រ្តីហិរញ្ញវត្ថុបារាំង Bruno Le Maire ចាប់ដៃសមភាគីអាមេរិក Steven Mnuchin នាជំនួបរដ្ឋមន្ត្រីហិរញ្ញវត្ថុប្រទេស G7 នៅទីក្រុងប៉ារីស។ រូបភាព AFP
× បារាំង នឹងបន្តជំរុញការអនុវត្តច្បាប់យកពន្ធថ្មីរបស់ខ្លួនដដែល ទោះប្រឈមមុខទណ្ឌកម្មរបស់អាមេរិកក្ដី។ នេះជាការប្រកាសរបស់រដ្ឋមន្ត្រីហិរញ្ញវត្ថុបារាំង Bruno Le Maire នៅថ្ងៃទី១៧ ខែកក្កដា។ ការយកពន្ធនេះ ធ្វើឲ្យរដ្ឋបាលលោកប្រធានាធិបតី ដូណាល់ ត្រាំ មិនសប្បាយចិត្តឡើយ ព្រោះក្រមហ៊ុនបច្ចេកវិទ្យាធំរបស់ខ្លួន សុទ្ធតែជាប់ឈ្មោះ។ សម្រាប់បារាំង ច្រកចេញនៃបញ្ហានេះ គឺកិច្ចព្រមព្រៀងអន្តរជាតិដែលកំណត់ពីការយកពន្ធលើក្រុមហ៊ុនទាំងនោះ។
បារាំង បង្កើតច្បាប់យកពន្ធបីភាគរយលើប្រាក់ចំណេញរបស់ក្រុមហ៊ុនបច្ចេកវិទ្យាដែលផ្ដល់សេវាកម្មឲ្យអតិថិជនបារាំង។ អាមេរិក មិនសប្បាយចិត្តនឹងរឿងនេះ និងចោទបារាំង ថា ធ្វើច្បាប់សំដៅតែក្រុមហ៊ុនអាមេរិក ព្រោះក្រុមហ៊ុនធំៗក្នុងវិស័យនេះ មានទីតាំងនៅអាមេរិកសឹងទាំងអស់ទៅហើយ។ ប្រធានាធិបតីអាមេរិក ដូណាល់ ត្រាំ ក៏បញ្ជាឲ្យបើកស៊ើបអង្កេតថា ច្បាប់បារាំងពិតជាធ្វើបាបក្រុមហ៊ុនអាមេរិកមែនឬទេ។ បើមែន អាមេរិកអាចដាក់ទណ្ឌកម្មលើបារាំង។
ដ្បិតអាចរងទណ្ឌកម្មអាមេរិកក្ដី បារាំងមិនបោះបង់គម្រោងយកពន្ធរបស់ខ្លួនឡើយ ព្រោះសភាបារាំងបានអនុម័តច្បាប់ថ្មីនេះរួចហើយ។ រដ្ឋមន្ត្រីហិរញ្ញវត្ថុបារាំង Bruno Le Maire ដែលបានជួបសមភាគីអាមេរិក Steven Mnuchin នៅក្រៅកិច្ចប្រជុំរដ្ឋមន្ត្រីហិរញ្ញវត្ថុប្រទេស G7 ក្នុងទីក្រុងប៉ារីស និយាយថា បារាំង និងអាមេរិក មិនមែនត្រូវគ្នារាល់បញ្ហាឡើយ តែក៏ឯកភាពគ្នាលលើបញ្ហាច្រើនដែរ ហើយអ្វីដែលសំខាន់នោះ គឺការស្ដាប់គ្នាទៅវិញទៅមក។
សភាបារាំងបានអនុម័តច្បាប់យកពន្ធលើក្រុមហ៊ុនបច្ចេកវិទ្យាធំៗនេះកាលពីដើមខែកក្កដានេះ ដោយនឹងយកពន្ធបីភាគរយលើប្រាក់ចំណេញលើក្រុមហ៊ុនដែលរកស៊ីនៅទឹកដីបារាំង ទោះទីស្នាក់ការប្រចាំទ្វីបអឺរ៉ុបរបស់ក្រុមហ៊ុននោះ មានទីតាំងនៅទីណាក្ដី។ Google, Apple, Facebook និង Amazon ជាដើម សុទ្ធតែត្រូវប៉ះពាល់ដោយសារច្បាប់នេះ។ ហេតុនេះហើយបានជាក្រុងវ៉ាស៊ីនតោនមិនសប្បាយចិត្តតែម្ដងទៅ។
ក្នុងកិច្ចសម្ភាសជាមួយវិទ្យុបារាំង France Inter លោក Le Maire បញ្ជាក់ជំហរបារាំងដែលជាប្រទេសទីមួយបង្កើតច្បាប់ថា នឹងមិនដកថយឡើយ ហើយផ្លូវតែម្យ៉ាងដែលបារាំងដកថយនោះ គឺការបង្កើតកិច្ចព្រមព្រៀងអន្តរជាតិមួយដើម្បីកំណត់ពីការយកពន្ធលើក្រុមហ៊ុនទាំងនោះ។ បច្ចុប្បន្ន ដោយគ្មានប្រព័ន្ធយកពន្ធបែបនេះ ក្រុមហ៊ុនបច្ចេកវិទ្យាជាច្រើន ដែលរកចំណូលបានសន្ធឹកសន្ធាប់ពីសេវាកម្មរបស់ខ្លួន មិនសូវបង់ពន្ធឡើយ ឬបង់ពន្ធតិចតួចប៉ុណ្ណោះ។
ក្រៅពីបារាំង ប្រទេសតំបន់អឺរ៉ុបមួយចំនួន ក៏គិតគូររឿងយកពន្ធនេះដែរ។ ចក្រភពអង់គ្លេស បានបញ្ចេញគម្រោងយកពន្ធរបស់ខ្លួនកាលពីសប្ដាហ៍មុន ខណៈរដ្ឋាភិបាលអេស្ប៉ាញ ក៏រំពឹងថា នឹងបង្កើតច្បាប់ស្រដៀងគ្នាមួយដែរ។ ប្រទេសអឺរ៉ុបដូចជា លុចសំបួរ និងអៀឡង់ ជាទីតាំងពេញនិយមរបស់ក្រុមហ៊ុនបច្ចេកវិទ្យាក្នុងការបោះស្នាក់ការ ព្រោះប្រទេសទាំងនេះយកពន្ធទាប។ វាក៏ក្លាយជាកត្តាមួយដែលធ្វើឲ្យអឺរ៉ុបពិបាកយកពន្ធពីក្រុមហ៊ុនធំៗទាំងនោះ៕
Tag:
អាមេរិក
បារាំង
Bruno Le Maire
© រក្សាសិទ្ធិដោយ thmeythmey.com