សម្តេច ទៀ បាញ់៖ ពេលរៀបស៊ីហ្គេម ត្រូវជៀសឲ្យផុតពីបញ្ហាប្រើថវិកាខុសគោលដៅ

កីឡាជាតិ

ជាតិ

សម្តេច ទៀ បាញ់៖ ពេលរៀបស៊ីហ្គេម ត្រូវជៀសឲ្យផុតពីបញ្ហាប្រើថវិកាខុសគោលដៅ

19, Jul 2019 , 8:59 am

រូបភាព

សម្តេច ទៀ បាញ់ ពេលធ្វើជាអធិបតីកិច្ចប្រជុំបូកសរុបការងារប្រចាំត្រីមាសរបស់ CAMSOC

ដោយ:

គណៈកម្មាធិការជាតិរៀបចំការប្រកួតកីឡាស៊ីហ្គេមកម្ពុជា(CAMSOC) បានរៀបចំកិច្ចប្រជុំលើកទី៣ ដើម្បីបូកសរុបការងារប្រចាំត្រីមាស និងពិភាក្សាពីដំណើរវឌ្ឍនភាពនិងការដាក់ផែនការអនុវត្តបន្ត។ សម្តេច ទៀ បាញ់ ដែលធ្វើជាអធិបតីក្នុងអង្គប្រជុំ បានសង្កត់ធ្ងន់លើរបៀបវារៈពាក់ព័ន្ធគម្រោងថវិកា ហើយបានចាត់ទុកបញ្ហានេះ ជារឿងដែលត្រូវយកចិត្តទុក។ ជាមួយគ្នានេះសម្តេចជំរុញឲ្យមន្ត្រី CAMSOC ត្រូវរៀបចំរបាយការណ៍សកម្មភាព និងហិរញ្ញវត្ថុឲ្យបានច្បាស់លាស់។

សម្តេច ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាស៊ីហ្គេមកម្ពុជាប្រាប់មន្ត្រីខ្លួនឲ្យរៀបចំគម្រោងថវិកាសម្រាប់ ដំណើរការអភិវឌ្ឍ ដើម្បីត្រៀមការប្រកួតកីឡាស៊ីហ្គេមឆ្នាំ២០២៣ ឲ្យបានច្បាស់លាស់ ដើម្បីបញ្ចៀសបញ្ហា ដែលអាចកើតមានពាក់ព័ន្ធបញ្ហានេះ។ សម្តេច សង្កត់ធ្ងន់ថា បញ្ហាហិរញ្ញវត្ថុជាបញ្ហាធំក្នុងដំណើរការរៀបចំទាំងមុន និងក្នុងអំឡុងការប្រកួត។ ព្រោះវាអាចនាំរឿងដល់ខ្លួន បើប្រើប្រាស់ថវិការដ្ឋខុសគោលការណ៍ និងច្បាប់បានកំណត់។

ដើម្បីបញ្ជៀសបញ្ហាដែលអាចកើតមានពាក់ព័ន្ធហិរញ្ញវត្ថុ រដ្ឋមន្ត្រីក្រសួងការពារជាតិរូបនេះ ដាស់តឿនដល់មន្ត្រី CAMSOC ត្រូវប្រើប្រាស់ថវិកាឲ្យមានប្រសិទ្ធភាព តម្លាភាព គណនេយ្យភាព និងត្រឹមត្រូវតាមគោលការណ៍ និងសកម្មភាពដែលបានកំណត់។ ជាមួយគ្នានេះ សម្តេច ក៏បានជំរុញឲ្យមន្ត្រី ពិសេសអគ្គលេខាធិការដ្ឋាន CAMSOC រៀបចំរបាយការណ៍សកម្មភាព និងផែនការអនុវត្តឲ្យបានច្បាស់លាស់ផងដែរ។

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា គ្រប់ប្រទេសទាំងអស់រៀងរាល់ក្រោយធ្វើម្ចាស់ផ្ទះការប្រកួតកីឡាស៊ីហ្គេម នឹងមានគណៈកម្មការសវនកម្មអន្តរជាតិ ចុះមកធ្វើសវនកម្មលើគម្រោងប្រើប្រាស់ថវិកា ក្នុងការដំណើររៀបចំការប្រកួតកីឡាស៊ីហ្គេម។ បើរកឃើញថា ការប្រើប្រាស់ថវិការដ្ឋមានភាពមិនប្រក្រតី ពួកគេនឹងដាក់ពិន័យ លើមន្ត្រីដែលទទួលបន្ទុកលើផ្នែកហិរញ្ញវត្ថុ។

ការជំរុញ និងដាស់តឿនមន្ត្រីនេះ ធ្វើឡើងពេលសម្តេច ទៀ បាញ់ ធ្វើជាអធិបតីភាពក្នុងអង្គប្រជុំបូកសរុបការងារប្រចាំត្រីមាស និងដំណើរវឌ្ឍនភាពរបស់គណៈកម្មាធិការជាតិរៀបចំការប្រកួតកីឡាស៊ីហ្គេមកម្ពុជាកាលពីពេលថ្មីៗ នៅទីស្តីការគណៈរដ្ឋមន្ត្រី។ ក្រៅពីបញ្ហាគម្រោងថវិកា បញ្ហាសុខាភិបាល សន្តិសុខ គម្រោងរៀបចំពិធីបើកបិទការប្រកួត ការបណ្តុះបណ្តាលធនធានមនុស្ស និងគម្រោងបញ្ជូនកីឡាករទៅហ្វឹកហាត់នៅក្រៅប្រទេស ត្រូវបានលើកយកមកជជែកក្នុងអង្គប្រជុំលើកទី៣ របស់គណៈកម្មាធិការ CAMSOC ផងដែរ។

លោក វ៉ាត់ ចំរើន អគ្គលេខាធិការអចិន្ត្រៃយ៍នៃ CAMSOC ដែលមានវត្តមានក្នុងកិច្ចប្រជុំនោះមានប្រសាសន៍ថា ក្នុងអង្គប្រជុំនោះ គណៈកម្មាធិការ CAMSOC បានដាក់ចេញនូវគោលការណ៍វឌ្ឍនភាពយ៉ាងច្រើន ដើម្បីពន្លឿនដំណើរការរបស់អគ្គលេខាធិការដ្ឋាន ដែលសម្តេច ទៀ បាញ់ ដាក់ឲ្យដំណើរការចាប់ពីកិច្ចប្រជុំប្រចាំត្រីមាសលើកទី៣នេះតទៅ។

លោកបន្ថែមថា៖«យើងត្រូវធ្វើការជាមួយសហព័ន្ធជាតិ ក្នុងការបញ្ជូនអត្តពលិកទៅហាត់នៅក្រៅប្រទេស និងជាមួយក្រសួងអប់រំ យុវជន និងកីឡា ក្នុងការពិនិត្យមើលការជ្រើសរើសអត្តពលិកឲ្យមានទេពកោសល្យ និងមានឆន្ទៈពិតប្រាកដ ក្នុងការទៅហ្វឹកហាត់កម្រិតខ្ពស់រយៈពេលវែងនៅក្រៅប្រទេស ដូចជានៅចិន ជប៉ុន កូរ៉េ ឬក៏នៅប្រទេសភាគអឺរ៉ុបមួយចំនួនជាដើម»។

លោក សៅ សុខា សមាជិកប្រតិបត្តិនៃ CAMSOC បានផ្តល់យោបល់ដោយស្នើឲ្យមានការឯកភាពគ្នា និងរៀបចំយុទ្ធសាស្ត្រឲ្យបានច្បាស់លាស់ ដោយផ្អែកលើគោលការណ៍បច្ចេកទេស។ ពិសេស ត្រូវរៀបចំឲ្យមានការបណ្តុះបណ្តាលធនធានគ្រូបង្វឹក មន្ត្រីបច្ចេកទេស និងកីឡាករ តាមរយៈការបញ្ជូនទៅហ្វឹកហាត់នៅក្រៅប្រទេស។ លើសពីនេះ ត្រូវរៀបចំហេដ្ឋារចនាសម្ព័ន្ធ និងរៀបចំការប្រកួតឲ្យបានគ្រប់ខេត្ត ដើម្បីជ្រើសរើសអត្តពលិកត្រៀមទៅស៊ីហ្គេមឆ្នាំ២០២៣៕