ជាតិ
ចិន-តៃវ៉ាន់១៨នាក់ត្រូវបានចាប់ខ្លួននៅកំពង់ស្ពឺពាក់ព័ន្ធជំរិតទារប្រាក់តាមអ៊ីនធឺណិត
ក្រុមជំរិតទារប្រាក់ជនជាតិចិន
×![]()
ដោយ: ឡាយ សុភាវតី
កម្លាំងនគរបាលខេត្តកំពង់ស្ពឺ កាលពីថ្ងៃទី១៧ ខែកក្កដា បានចាប់ខ្លួនជនជាតិចិន និងតៃវ៉ាន់១៨នាក់ នៅភូមិចារ ឃុំសាយចចឹប ស្រុកបរសេដ្ឋ ខេត្តកំពង់ស្ពឺ។ លោក សម សាមួន ស្នងការនគរបាលខេត្តកំពង់ស្ពឺបានប្រាប់សារព័ត៌មាន ThmeyThmey ថា អ្នកទាំងនោះ ជាជនសង្ស័យពាក់ព័ន្ធនឹងបទជំរិតទារប្រាក់តាមប្រព័ន្ធអ៊ីនធឺណិត (VOIP)។
«ជនសង្ស័យទាំង១៨នាក់ ក្នុងនោះមាន១២នាក់មកពីតៃវ៉ាន់ សុទ្ធជាប់ពាក់ព័ន្ធពីបទជំរិតទារប្រាក់តាមប្រព័ន្ធអ៊ីនធឺណិត ដែលបានបោះទីតាំងនៅខេត្តកំពង់ស្ពឺតាំងពីខែកុម្ភៈមក។ ជនរងគ្រោះសុទ្ធតែជនជាតិចិន មិនមានជនជាតិខ្មែរនោះឡើយ»។ នេះជាការអះអាងរបស់លោកស្នងការខេត្ត ដោយមិនបញ្ជាក់ពីទីតាំងរស់នៅរបស់ជនរងគ្រោះដែលចាញ់បោកនោះឡើយ។
ជាមួយគ្នានេះ លោក សម សាមួន សុំមិនបង្ហាញតួលេខនៃចំនួនទឹកប្រាក់ដែលក្រុមជនសង្ស័យជំរិតបាន ចំនួនបទល្មើស ចំនួនវត្ថុតាងដែលបានដកហូតនៅកន្លែងកើតហេតុ និងរយៈពេលនៃការប្រព្រឹត្តបទល្មើសជំរិតទារប្រាក់នោះឡើយ។
ស្នងការនគរបាលខេត្តគ្រាន់តែបញ្ជាក់ថា សមត្ថកិច្ចបានស៊ើបអង្កេតក្រុមជំរិតទារប្រាក់នេះ ចាប់តាំងពីក្រុមនេះបានបោះទីតាំងនៅស្រុកបរសេដ្ឋក្នុងខែកុម្ភៈមកម្ល៉េះ៕
រូបថត៖ អគ្គនាយកដ្ឋានអន្តោប្រវេសន៍
Tag:
ក្រុមជំរិតទារប្រាក់
ជនជាតិចិន
© រក្សាសិទ្ធិដោយ thmeythmey.com
