អន្តរជាតិ
អគ្គិភ័យនៅជប៉ុនដែលសង្ស័យថាជាការលួចដុត មានអ្នកស្លាប់កើនដល់៣៣នាក់ ពលរដ្ឋជប៉ុន យកផ្កាឧទ្ទិសដល់វិញ្ញាណក្ខន្ធអ្នកស្លាប់ក្នុងគ្រោះអគ្គិភ័យនៅក្រុង Kyoto កាលពីថ្ងៃព្រហស្បតិ៍។ រូបថត AFP
× ប៉ូលិសជប៉ុនបន្តស៊ើបអង្កេតលើជនសង្ស័យម្នាក់ពាក់ព័ន្ធនឹងករណីអគ្គិភ័យដែលសម្លាប់មនុស្ស៣៣នាក់នៅអគារផលិតកម្មគំនូរជីវចល Kyoto Animanation ក្រុងក្យូតូ កាលពីថ្ងៃព្រហស្បតិ៍។ នេះអាចជាឧក្រិដ្ឋកម្ម ដែលបង្កឲ្យមនុស្សស្លាប់ច្រើនបំផុតនៅជប៉ុន នារយៈពេលប៉ុន្មានទសវត្សរ៍ចុងក្រោយ។
សោកនាដកម្មនៅជប៉ុន ដែលបង្កឡើងដោយឧក្រិដ្ឋកម្មហិង្សា គឺកម្រកើតមានខ្លាំងណាស់។ ប៉ុន្តែវារឹតតែមិនអាចកើតឡើង នូវគ្រោះមហន្តរាយដោយចៃដន្យ នៅប្រទេសដែលមានសុវត្ថិភាពអគ្គិសនី ដ៏ខ្ពស់មួយនេះ។
យោងតាម AFP ជនសង្ស័យអាយុ៤១ឆ្នាំម្នាក់ ស្ថិតក្រោមការស៊ើបអង្កេត ប៉ុន្តែគេមិនទាន់អាចសួរនាំបានឡើយ ដោយសារបុរសនោះ ឆេះរលាកយ៉ាងធ្ងន់ធ្ងរ ហើយកំពុងស្ថិតក្រោមការព្យាបាលនៅមន្ទីរពេទ្យ។
បណ្តាព័ត៌មានក្នុងស្រុក បានរាយការណ៍ថា បុរសនោះមិនមានអ្វីពាក់ព័ន្ធនឹង Kyoto Animation ឡើយ ប៉ុន្តែមានអ្នកខ្លះ បានឃើញគេកាន់កាំបិត និងញញួរ ដើរចូលទៅក្នុងអគារ។ Kyoto Shimbun បានដកស្រង់សំដីជនសង្ស័យ ដែលបានប្រាប់ប៉ូលិសថា៖ «ខ្ញុំដុតភ្លើងដោយសារតែគេ [ក្រុមហ៊ុន Kyoto Animation] បានលួចស្នាដៃប្រលោមលោករបស់ខ្ញុំ»។
លោក Hideaki Hatta ប្រធានក្រុមហ៊ុន Kyoto Animation បានអះអាងថា លោកក៏ធ្លាប់បានទទួលសារអ៊ីម៉ែលគំរាមកំហែងផងដែរ ប៉ុន្តែលោកមិនបានផ្តល់ព័ត៌មានលម្អិតនោះឡើយ។
បើគិតត្រឹមព្រឹកថ្ងៃសុក្រនេះ អ្នកស្លាប់កើនឡើងដល់ ៣៣នាក់ និងរបួសជាច្រើននាក់ទៀត ដោយភាគច្រើនជាបុគ្គលិកក្រុមហ៊ុន។
លោកនាយករដ្ឋមន្ត្រីជប៉ុន ស៊ិនហ្សូ អាបេ បានសម្តែងការសោកស្តាយ ចំពោះករណីដែលបានកើតឡើងនៅក្នុងប្រទេសរបស់ខ្លួន។ សកម្មភាពសប្បុរធម៌ជាច្រើន ក៏ត្រូវរៀបចំឡើងផងដែរ ដើម្បីជួយសម្រាលទុក្ខលំបាកជនរងគ្រោះ និងក្រុមគ្រួសារ៕
© រក្សាសិទ្ធិដោយ thmeythmey.com