អន្តរជាតិ
លោក ត្រាំ ថា អាមេរិកបាញ់ទម្លាក់យន្តហោះដ្រូនអ៊ីរ៉ង់មួយគ្រឿង តែអ៊ីរ៉ង់ថា មិនដឹង
× ប្រធានាធិបតីអាមេរិក ដូណាល់ ត្រាំ នៅថ្ងៃទី១៨ ខែកក្កដា ប្រកាសថា យោធាអាមេរិកបានបាញ់យន្តហោះបញ្ជាមួយគ្រឿងរបស់អ៊ីរ៉ង់នៅច្រកសមុទ្រ Hormuz ។ បើតាមលោក ត្រាំ យន្តហោះបញ្ជានេះ បង្កការគំរាមដល់សុវត្ថិភាពនាវាចម្បាំងរបស់អាមេរិក ទើបបាញ់កម្ទេចតែម្ដង។ ប៉ុន្តែអ៊ីរ៉ង់ឯណោះវិញ បានអះអាងថា មិនមានហេតុការណ៍នេះទេ។
ក្នុងកម្មវិធីមួយនៅសេតវិមាន ប្រធានាធិបតីអាមេរិក ដូណាល់ ត្រាំ បានលើកឡើងថា នាវាប្រយុទ្ធ USS Boxer បានបាញ់កម្ទេចយន្តហោះបញ្ជាមួយគ្រឿងរបស់អ៊ីរ៉ង់ ខណៈដែលធ្វើដំណើរចូលច្រកសមុទ្រ Hormuz បានបន្តិច។ លោក ត្រាំ អះអាងថា ការបាញ់ទម្លាក់នេះ ជាវិធានការការពារខ្លួនរបស់កប៉ាល់អាមេរិក ព្រោះយន្តហោះដ្រូនរបស់អ៊ីរ៉ង់ បានចូលកៀកនាវា USS Boxer ក្នុងចម្ងាយមិនដល់មួយគីឡូម៉ែត្រផង ហើយក៏មិនខ្វល់សារព្រមានទៅទៀត។
មេដឹកនាំអាមេរិករូបនេះ បន្តថា ដ្រូនរបស់អ៊ីរ៉ង់ គំរាមកំហែងសុវត្ថិភាពរបស់កប៉ាល់ និងនាវិកនៅលើនោះ។ ដូចនេះយោធាអាមេរិកក៏បាញ់កម្ទេចចោលទាំងស្រុងតែម្ដង។ លោក ត្រាំ ចាត់ទុកហេតុការណ៍នេះ ជាសកម្មភាពបង្ករឿងមួយក្នុងចំណោមសកម្មភាពជាច្រើនរបស់ទីក្រុងតេហេរ៉ង់លើកប៉ាល់ដែលធ្វើដំណើរក្នុងដែនទឹកអន្តរជាតិ ហើយអាមេរិកក៏រក្សាសិទ្ធិការពារអាយុជីវិត ទ្រព្យសម្បត្តិ និងផលប្រយោជន៍ផងដែរ។
នាវាចម្បាំងអាមេរិក USS Boxer ដែលបាញ់ទម្លាក់ដ្រូនអ៊ីរ៉ង់។ រូបភាព US Navy
«ខ្ញុំក៏ស្នើឲ្យប្រទេសទាំងអស់ការពារកប៉ាល់របស់ខ្លួន ដែលធ្វើដំណើរឆ្លងកាត់ច្រកសមុទ្រនេះ ហើយធ្វើការជាមួយយើងនៅថ្ងៃអនាគត។» នេះជាការអំពាវនាវជាថ្មីរបស់លោក ត្រាំ ទៅកាន់ប្រទេសនានាដែលប្រើប្រាស់ច្រកសមុទ្រនេះ ឬពឹងផ្អែកលើច្រកសមុទ្រ ហើយដែលអាស្រ័យលើការការពារសុវត្ថិភាពដោយយោធាអាមេរិកផងនោះ។
យ៉ាងណាមិញ អ៊ីរ៉ង់មិនបញ្ជាក់ពីរឿងនេះទេ។ មុនជំនួបជាមួយអគ្គលេខាធិការអង្គការសហប្រជាជាតិ រដ្ឋមន្ត្រីការបរទេសអ៊ីរ៉ង់ ចាវ៉ាដ ហ្សារីហ្វ និយាយថា លោកមិនដឹងពីការបាញ់ទម្លាក់នេះទេ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
នេះជាលើកទីមួយដែលអាមេរិកជួបបញ្ហាផ្ទាល់ជាមួយអ៊ីរ៉ង់ ចាប់តាំងពីភាពតានតឹងកើនឡើងមកនោះ និងហេតុការណ៍គ្រោះថ្នាក់ជាបន្តបន្ទាប់មកនោះ។ ស្ថានភាពនេះ ធ្វើឲ្យកម្ដៅនៃការប្រឈមមុខគ្នាកើនមួយកម្រិតទៀត។ ហេតុការណ៍ ក៏កើតឡើងក្រោយអ៊ីរ៉ង់ប្រកាសឃាត់ទុកកប៉ាល់បរទេសមួយគ្រឿង ដែលត្រូវបានចោទថា លួចដឹកប្រេងខុសច្បាប់។ កប៉ាល់មួយនោះ ពាក់ទង់ជាតិប៉ាណាម៉ា ហើយនាវិកលើនោះ១២នាក់ ត្រូវបានចាប់ខ្លួន៕
Tag:
អាមេរិក
អ៊ីរ៉ង់
Hormuz
ដូណាល់ ត្រាំ
© រក្សាសិទ្ធិដោយ thmeythmey.com