បំណុលសរុបរបស់យក្សសេដ្ឋកិច្ចចិន បានប៉ោងឡើងខ្លាំងបំផុតក្នុងត្រីមាសទីមួយនៃឆ្នាំ២០១៩។ នេះបើតាមរបាយការណ៍ថ្មីរបស់វិទ្យាស្ថានហិរញ្ញវត្ថុអន្តរជាតិ (IIF)។ ការហក់ឡើងនៃបំណុលនេះ កើតឡើងខណៈក្រុងប៉េកាំង ចាត់វិធានការចម្បងៗមួយចំនួន ដើម្បីជួយជ្រោមជ្រែងសេដ្ឋកិច្ចដែលកំពុងបន្តធ្លាក់ចុះ និងទប់ស្កាត់ហានិភ័យហិរញ្ញវត្ថុ នៅចំពោះមុខសង្គ្រាមពាណិជ្ជកម្មជាមួយសហរដ្ឋអាមេរិក។
បំណុលរដ្ឋាភិបាល ប្រជាជន និងក្រុមហ៊ុន ដោយគិតសរុបបញ្ចូលគ្នារបស់ប្រទេសចិន បានកើនឡើងដល់ ៣០៣ ភាគរយនៃផលិតផលក្នុងស្រុកសរុប (GDP) ពោលគឺមានចំនួនដល់ទៅ ៤០ ទ្រីលានដុល្លារ ឬស្មើនឹង ១៥ភាគរយនៃបំណុលសាកលសរុប។ តួលេខនេះ កើនឡើងពីអត្រាបំណុលសរុបចំនួន ២៩៧ភាគរយ ក្នុងត្រីមាសទី១ នៃឆ្នាំ២០១៨ ។ នេះបើតាមរបាយការណ៍របស់ IIF ចេញផ្សាយកាលពីថ្ងៃទី ១៦ ខែកក្កដា ឆ្នាំ២០១៩ ដោយបានកត់សម្គាល់ពីកំណើននៃកម្រិតបំណុលនៅទូទាំងពិភពលោកផងដែរ។
តាមរយៈទិន្នន័យរបស់ធនាគារកណ្តាលចិន ដែលដកស្រង់ចុះផ្សាយដោយកាសែតហុងកុង South China Morning Post កម្ចីថ្មីសរុបរបស់រដ្ឋាភិបាលចិនក្នុងរយៈពេល៦ខែដើមឆ្នាំ២០១៩ បានកើនដល់ ១,៤ពាន់លានដុល្លារ ដែលជាចំនួនខ្ពស់បំផុតសម្រាប់ធនាគារចិន។ តួលេខនេះដែរ កើនឡើងពី ១,៣១ពាន់លានដុល្លារ សម្រាប់រយៈពេលដូចគ្នា កាលពីឆ្នាំ២០១៨។
ការប៉ោងឡើងខ្ពស់នៃបំណុលសរុបចិននេះ បានកើតឡើងចំពេលដែលកំណើនសេដ្ឋកិច្ចរបស់ចិនសម្រាប់ត្រីមាសទី២ នៃឆ្នាំ២០១៩ បានធ្លាក់ចុះដល់អត្រាទាបខ្លាំងបំផុត ក្នុងរយៈៈពេល ២៧ឆ្នាំចុងក្រោយនេះ ពោលគឺចាប់ពីឆ្នាំ ១៩៩២មក ។ ហើយការថមថយនៃសន្ទុះសេដ្ឋកិច្ចនេះ បង្កឡើងដោយសារតែមហាអំណាចសេដ្ឋកិច្ចលំដាប់ទី២នេះ ទទួលរងឥទ្ធិពលអវិជ្ជមានពីសង្គ្រាមពាណិជ្ជកម្មជាមួយសហរដ្ឋអាមេរិក ក៏ដូចជាកត្តាមួយចំនួនទៀត ជាពិសេសកំណើននៃប្រជាជនចាស់ជរា និងការថយថុះនៃការប្រើប្រាស់ក្នុងស្រុកជាដើម។
ដើម្បីឆ្លើយតបនឹងបញ្ហានេះ រដ្ឋាភិបាលក្រុងប៉េកាំង បានព្យាយាមទប់ស្កាត់កំណើននៃបំណុលក្រុមហ៊ុន ដោយរឹតត្បិតលើការខ្ចីបុលតាមរយៈនីតិវិធីមិនផ្លូវការ ដែលស្គាល់ថា «Shadow Banking»។ ម្យ៉ាងវិញទៀត រដ្ឋាភិបាលចិន ក៏បានលើកទឹកចិត្តឲ្យមានការប្រើប្រាស់ផលិតផលនិងសេវាកម្មក្នុងស្រុកបន្ថែមទៀតផងដែរ ព្រមទាំងចេញបណ្ណលុយរាប់ពាន់លានដុល្លារដើម្បីចំណាយលើវិស័យហេដ្ឋារចនាសម្ព័ន្ធ។
យោងតាមការចុះផ្សាយរបស់ក្រសួងហិរញ្ញវត្ថុចិន នៅថ្ងៃអង្គារ ទី១៦ កក្កដា កូតាសម្រាប់ឥណទេយ្យបណ្ណគោលដៅពិសេសរបស់រដ្ឋាភិបាលចិន ដែលផ្តោតសំខាន់លើការផ្គត់ផ្គង់គម្រោងហេដ្ឋរចនាសម្ព័ន្ធ បានកើនឡើងដល់ ៣១២ពាន់លានដុល្លារ ក្នុង៦ខែដំបូងនៃឆ្នាំ២០១៩។ តួលេខនេះ កើនឡើងចំនួន ៥៩ភាគរយ បើធៀបទៅនឹងឆ្នាំ២០១៨។
ជាក់ស្តែង គណៈកម្មការកំណែទម្រង់ និងអភិវឌ្ឍន៍ជាតិ បានអនុម័តគម្រោងវិនិយោគ ៩៤គម្រោង អំឡុងពាក់កណ្តាលឆ្នាំ២០១៩ ដែលគិតជាទឹកប្រាក់ ៦៩ពាន់លានដុល្លារ។ ទំហំនៃការវិនិយោគនេះ កើនឡើងស្ទើរតែ២ដង បើធៀបទៅនឹងឆ្នាំមុន ដោយកាលនោះគណៈកម្មការចិននេះ បានអនុម័យគម្រោងវិនិយោគចំនួន ១០២គម្រោង ដែលស្មើនឹង ៣៧,៨៦ពាន់លានដុល្លារ៕