កីឡាជាតិ
ជាតិ
អ្នកចាំទីគីរីវង់ អឿន សំអាត សុំទោស ស៊ុះ ស៊ូហាណា ក្រោយលោតធាក់ចំដើមទ្រូងដោយអចេតនា
× អ្នកចាំទីក្លិបបាល់ទាត់គីរីវង់សុខសែនជ័យ អឿន សំអាត បានទទួលស្គាល់កំហុស និងសុំទោសកីឡាករ ស៊ុះ ស៊ូហាណា ក្រោយរូបគេលោតធាក់ចំដើមទ្រូងពេលព្យាយាមសង្គ្រោះបាល់ នាជំនួបជើងទី២ពានរង្វាន់សម្តេច ហ៊ុន សែន ថ្នាក់ជាតិនៅកីឡដ្ឋានស្តាតចាស់កាលពីល្ងាចថ្ងៃព្រហស្បតិ៍។ សំអាត អះអាងថា រូបគេគ្មានចេតនាបង្កបញ្ហាបែបនេះឡើយ។
«ខ្ញុំបាទសុំទោសបង ស៊ុះ ស៊ូហាណា ផង ខ្ញុំគ្មានចេតនាលោតធាក់បងទេ»។ នេះជាសារសុំទោសរបស់កីឡាករ អឿន សំអាត អ្នកចាំទីរបស់ក្លិបបាល់ទាត់គីរីវង់សុខសែនជ័យ ក្រោយរូបគេបានបង្កកំហុស ដោយលោតធាក់ចំដើមទ្រូងកីឡាករ ស៊ុះ ស៊ូហាណា ពេលព្យាយាមសង្គ្រោះបាល់ពីការស៊ុតរបស់កីឡាកររូបនេះ។
ក្រោយទទួលស្គាល់កំហុសនិងចេញមុខសុំទោសជាសាធារណៈ សំអាត អះអាងថា រូបគេគ្មានបំណងធ្វើបែបនេះឡើយ។ ការប៉ះទង្គិចនេះកើតឡើងក្នុងជំនួបជើងទី២ពានរង្វាន់សម្តេច ហ៊ុន សែន ថ្នាក់ជាតិ រវាងគីរីវង់សុខសែនជ័យជាមួយណាហ្គាវើលនៅកីឡដ្ឋានស្តាតចាស់កាលពីថ្ងៃទី១៨ កក្កដា។ ការបង្កកំហុសក្នុងតំបន់គ្រោះថ្នាក់នៅនាទី៦៣នេះ នាំឲ្យសំអាត ទទួលបានកាតលឿង ហើយត្រូវបានអាជ្ញាកណ្តាលផ្តល់បាល់ពិន័យ១១ម៉ែត្រដល់ណាហ្គាវើល។ កីឡាករ គួច ដានី បានទាត់បានសម្រេច ដើម្បីនាំមុខ ១-០ សម្រាប់ណាហ្គាវើល។ លទ្ធផលនេះបានរក្សារហូតចប់ការប្រកួត។
ប៉ុន្តែលទ្ធផលនេះមិនអាចជួយឲ្យម្ចាស់ជើងឯកពានរង្វាន់សម្តេច ហ៊ុន សែន ឆ្នាំ២០១៣មួយនេះ ឈ្នះកៅអីឡើងទៅកាន់វគ្គបន្តបានឡើយ បន្ទាប់ពីពួកគេបានចាញ់ក្រុមគីរីវង់សុខសែនជ័យ ២-០ នៅជើងទី១។ នេះជាលើកទី១ ដែលណាហ្គាវើលធ្លាក់ត្រឹមវគ្គ១៦ក្រុមចុងក្រោយ។ តាំងពីពានរង្វាន់នេះបង្កើតឡើងនៅឆ្នាំ២០០៧ ក្រុមនេះបានឈ្នះជើងឯកម្តងនៅឆ្នាំ២០១៣ ជើងឯករង៥ដងនៅឆ្នាំ២០០៧, ២០០៩, ២០១២, ២០១៥ និង ២០១៧ និងទទួលបានលេខ៣មួយលើក និងលេខ៤បាន២លើក។ កំណត់ត្រាអន់បំផុតរបស់ពួកគេ គឺធ្លាក់ត្រឹមវគ្គ៨ក្រុងចុងក្រោយពីរលើក៕
អ្នកចាំទី អឿន សំអាត
Tag:
Hun Sen Cup 2019
អឿន សំអាត
ស៊ុះ ស៊ូហាណា
© រក្សាសិទ្ធិដោយ thmeythmey.com