ព្រឹទ្ធសភាអាមេរិក បានផ្សាយថា ខ្លួនបានទទួលសេចក្តីស្នើច្បាប់ស្តីពីប្រជាធិបតេយ្យនៅកម្ពុជា (Cambodia Democracy Act of 2០19) ពីរដ្ឋសភាហើយ កាលពីថ្ងៃទី១៦ ខែកក្កដា ឆ្នាំ២០១៩។ ព្រឹទ្ធសភាអាមេរិក អះអាងថា បានពិនិត្យសេចក្តីស្នើច្បាប់នេះពីរលើក ហើយក៏បញ្ជូនទៅឲ្យគណៈកម្មាធិការទំនាក់ទំនងការបរទេសព្រឹទ្ធសភា ដើម្បីពិនិត្យបន្ត។
សេចក្តីស្នើច្បាប់នេះ ត្រូវបានតាក់តែងឡើងតាំងពីអំឡុងខែមេសា ឆ្នាំ២០១៨ ដែលមានលោក ថេត យូហូ (Ted Yoho) តំណាងរាស្ត្រអាមេរិក ជាអ្នកផ្តើមគំនិត។ រហូតដល់ពាក់កណ្តាល់ខែកក្កដា ឆ្នាំ២០១៩ រដ្ឋសភា ក៏អនុម័តសេចក្តីស្នើច្បាប់របស់លោក។
សេចក្តីស្នើច្បាប់ខាងលើ មានគោលដៅដាក់ទណ្ឌកម្មផ្នែកហិរញ្ញវត្ថុ (បង្កកទ្រព្យសម្បត្តិ) និងរឹតបន្តឹងការផ្តល់ទិដ្ឋាការដល់មន្ត្រីកម្ពុជាទាំងឡាយណា ដែលចូលរួមធ្វើឲ្យប៉ះពាល់ដល់លទ្ធិប្រជាធិបតេយ្យ និងសិទ្ធិមនុស្ស។ លោក ថេត យូហូ សរសេរក្នុងសេចក្តីថ្លែងការណ៍របស់លោកថា៖«ដល់ពេលហើយ ដែលរបបរបស់លោក ហ៊ុន សែន ត្រូវទទួលខុសត្រូវចំពោះសកម្មភាពខ្លួន»។
អ្នកនាំពាក្យតាមស្ថាប័នសំខាន់ៗ ដែលរួមមាន រដ្ឋាភិបាលកម្ពុជា ក្រសួងការបរទេស ព្រឹទ្ធសភា និងរដ្ឋសភា បានចេញសេចក្តីថ្លែងការណ៍រៀងៗខ្លួន ដើម្បីរិះគន់បកទៅរដ្ឋសភាអាមេរិក ដែលបានអនុម័តសេចក្តីស្នើច្បាប់នេះ។
ប្រតិកម្មរបស់អ្នកនាំពាក្យរដ្ឋាភិបាល៖«សេចក្តីស្នើច្បាប់នេះ មានចរិតនយោបាយ និងគោលបំណងប្រឆាំងទៅនឹងសុច្ឆន្ទៈនយោបាយរបស់ប្រជាជនកម្ពុជា ដែលបានជ្រើសរើសមេដឹកនាំខ្លួនតាមផ្លូវច្បាប់ តាមរយៈដំណើរការបោះឆ្នោតប្រកបដោយសន្តិភាព និងប្រជាធិបតេយ្យ។....សេចក្តីស្នើច្បាប់នេះ ជាទង្វើប្រឆាំងសន្តិភាព ស្ថិរភាព និងវិបុលភាពរបស់កម្ពុជា»។
ប្រតិម្មរបស់អ្នកនាំពាក្យក្រសួងការបរទេស៖«ការអនុម័តសេចក្តីស្នើច្បាប់របស់សភាសហរដ្ឋអាមេរិក គឺដើរផ្ទុយទៅនឹងកិច្ចខិតខំប្រឹងប្រែង ដែលប្រទេសទាំងពីរកំពុងប្រកាន់យក ក្នុងការលើកកម្ពស់ភាពជាដៃគូគ្រប់វិស័យ ដោយផ្អែកលើផលប្រយោជន៍រួមនិងការគោរពគ្នាទៅវិញទៅមក»។
ប្រតិកម្មរបស់អ្នកនាំពាក្យព្រឹទ្ធសភា៖«....សភាតំណាងរាស្ត្រសហរដ្ឋអាមេរិក អនុម័តសេចក្តីស្នើច្បាប់នេះ បង្ហាញឲ្យឃើញជាក់ស្តែងនូវការជ្រៀតជ្រែកចូលកិច្ចការផ្ទៃក្នុងរបស់កម្ពុជា»។
ចំណែកខ្លឹមសារនៃសេចក្តីថ្លែងការរបស់អ្នកនាំពាក្យរដ្ឋសភា គឺស្រដៀងនឹងខ្លឹមសារនៃសេចក្តីថ្លែងការណ៍របស់អ្នកនាំពាក្យក្រសួងការបរទេស។ ក្នុងសេចក្តីថ្លែងការណ៍របស់ខ្លួន អ្នកនាំពាក្យរដ្ឋសភា ប្រកាសគាំទ្រសេចក្តីថ្លែងការណ៍របស់អ្នកនាំពាក្យក្រសួងការបរទេស។
ជានីតិវិធី បើព្រឹទ្ធសភាអាមេរិក យល់ព្រមអនុម័តនោះ សេចក្តីស្នើច្បាប់ នឹងត្រូវបញ្ជូនទៅប្រធានាធិបតី (ដូណាល់ ត្រាំ)។ សេចក្តីស្នើច្បាប់ នឹងក្លាយជាច្បាប់ បើប្រធានាធិបតី ចុះហត្ថលេខា។ យ៉ាងណា ប្រធានាធិបតី អាចបដិសេធសេចក្តីស្នើច្បាប់ (សិទ្ធិ Veto)៕