ជាតិ
ក្រុមហ៊ុន Michelin ផ្តល់ជំនួយគម្រោងសុវត្ថិភាពចរាចរណ៍ដល់កម្ពុជា
× ក្រុមហ៊ុន Michelin ROH ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Michelin Group បានចុះហត្ថលេខាលើអនុស្សារណៈនៃការយោគយល់ជាមួយក្រសួងសាធារណការ និងដឹកជញ្ជូន និងក្រុមហ៊ុន World Bridge Trading ស្តីពីការពង្រឹងសុវត្ថិភាពចរាចរណ៍ផ្លូវគោក។ ពិធីចុះហត្ថលេខាត្រូវបានរៀបចំធ្វើនៅក្រសួងសាធារណការ កាលពីថ្ងៃទី១៦ខែកក្កដាកន្លងទៅ។
អនុស្សារណៈនេះនឹងត្រូវអនុវត្តក្រោមគម្រោងមួយដែលមានឈ្មោះថា Michelin សុវត្ថិភាពលើដងផ្លូវ «Michelin Safe on the Raod»។
Michelin គឺជាក្រុមហ៊ុនផលិតសំបកកង់យានយន្តនាំមុខមួយលំដាប់ពិភពលោក។
សេចក្តីប្រកាសព័ត៌មានរួមបានសរសេរថា នៅក្នុងក្របខណ្ឌនៃអនុស្សារណៈយោគយល់នេះ ក្រុមហ៊ុន Michelin ROH នឹងផ្តល់ជំនួយហិរញ្ញវត្ថុ និងបច្ចេកទេស ដើម្បីធ្វើយ៉ាណាឱ្យការអនុវត្តគម្រោងសុវត្ថិភាពតាមដងផ្លូវនេះមានប្រសិទ្ធភាព និងទទួលបានជោគជ័យ។ សេចក្តីប្រកាសព័ត៌មានដដែលបន្តថា ក្រុមហ៊ុន Worldbridge Trading ដែលជាក្រុមហ៊ុនក្នុងស្រុក និងជាអ្នកនាំចូលសំបកកង់ម៉ាក Michelin គឺជាអ្នកសម្របសម្រួល និងជាអ្នកផ្តល់ហិរញ្ញវត្ថុ ដល់ក្រសួងសាធារណការដែលជាអ្នកអនុវត្តគម្រោងសុវត្ថិភាពចរាចរណ៍ផ្លូវគោកនេះ។
លោក Segsam Trai-Ukos អគ្គលេខាធិការនៃក្រុមហ៊ុន Michelin ROH បានបញ្ជាក់នៅក្នុងពិធីចុះហត្ថលេខានោះថា គម្រោង Michelin safe on the raod ត្រូវបានរំពឹងថានឹងជួយជំរុញក្នុងយុទ្ធនាការជាតិស្តីពីសុវត្ថិភាពចរាចរណ៍ផ្លូវគោកឱ្យសម្រេចបានប្រសិទ្ធភាពយ៉ាងលឿន ក្នុងការពង្រីកវិសាលភាពនៃការផ្សព្វផ្សាយចំពីចំណេះដឹងផ្នែកសុវត្ថិភាពចរាចរណ៍ផ្លូវគោកដល់សាធារណជន និងជួយកាត់បន្ថយករណីគ្រោះថ្នាក់ចរាចរណ៍។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនត្រូវបានស្រង់សំដីនៅក្នុងសេចក្តីប្រកាសព័ត៌មានដដែល ដែលនិយាយថា ក្រសួងរបស់លោកត្រូវការសហការ និង ភាពជាមួយដៃគូជាមួយវិស័យឯកជន អង្គការក្រៅរដ្ឋាភិបាល និងអ្នកពាក់ព័ន្ធនានាផ្សេងទៀត ដើម្បីអំពាវនាវដល់អ្នកប្រើប្រាស់ទ្រូងផ្លូវ ឱ្យគោរពច្បាប់ចរាចរណ៍ និងជាពិសេសសូមឲ្យម្ចាស់យានយន្តទាំងអស់ត្រូវតែប្រាកដប្រជាថា យានយន្តរបស់ពួកគេមានសុវត្ថិភាព មុននឹងពួកគេធ្វើដំណើរ៕
© រក្សាសិទ្ធិដោយ thmeythmey.com