នាយសេនាធិការចម្រុះ ណែនាំនាយទាហានឲ្យគោរពបញ្ជារដ្ឋាភិបាល

ជាតិ

នាយសេនាធិការចម្រុះ ណែនាំនាយទាហានឲ្យគោរពបញ្ជារដ្ឋាភិបាល

20, Jul 2019 , 9:59 pm

រូបភាព

នាយឧត្តមសេនីយ៍ ឥត សារ៉ាត់ នាយសេនាធិការចម្រុះនៃកងយោធពលខេមរភូមិន្ទ ថ្លែងក្នុងកិច្ចប្រជុំ (រូបពីក្រសួងការពារជាតិ)

ដោយ: ថ្មីៗ

នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទ បានណែនាំនាយទាហានតាមអង្គភាពនានា ឲ្យគោរពឲ្យបានម៉ឺងម៉ាត់នូវបទបញ្ជារបស់ប្រមុខរដ្ឋាភិបាលកម្ពុជា ក្នុងការការពារជាតិ អធិបតេយ្យ និងបូរណភាពទឹកដី។

ការណែនាំរបស់នាយឧត្តមសេនីយ៍ ឥត សារ៉ាត់ គឺធ្វើឡើងក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ នៃឆ្នាំ២០១៩ របស់អគ្គមេបញ្ជាការដ្ឋាននៃកងយោធពលខេមរភូមិន្ទ នៅថ្ងៃទី១៩ ខែកក្កដា ឆ្នាំ២០១៩។ ខ្លឹមសារនៃកិច្ចប្រជុំ និងប្រសាសន៍របស់នាយសេនាធិការចម្រុះរូបនេះ ត្រូវបានចុះផ្សាយលើគេហទំព័ររបស់ក្រសួងការពារជាតិ។

កិច្ចប្រជុំនេះ មានការចូលរួមពីនាយរងសេនាធិការចម្រុះ នាយក នាយករងគ្រប់ទីចាត់ការ និងបណ្តាស្ថាប័នទ័ពជំនាញផ្សេងៗ ដែលចំណុះឲ្យអគ្គមេបញ្ជាការដ្ឋាននៃកងយោធពលខេមរភូមិន្ទ។ ក្នុងកិច្ចប្រជុំ នាយសេនាធិការចម្រុះ ឥត សារ៉ាត់ បានវាយតម្លៃខ្ពស់ចំពោះការប្រឹងប្រែងបំពេញការងាររបស់មេបញ្ជាការ មេបញ្ជាការង និងនាយទាហាន នៅគ្រប់កងឯកភាពចំណុះឲ្យអគ្គមេបញ្ជាការដ្ឋាននៃកងយោធពលខេមរភូមិន្ទ ក្នុងរយៈពេល១ឆមាសនេះ។

នាយឧត្តមសេនីយ៍រូបនេះ បានជំរុញគ្រប់កងឯកភាពទាំងអស់ ឲ្យបន្តកិច្ចប្រឹងប្រែនេះ ជាពិសេសត្រូវយកចិត្តទុកដាក់បង្កើនការហ្វឹកហ្វឺនលើគ្រប់ជំនាញ ដល់ទាហាន និងនាយទាហាន ឲ្យកាន់មានសមត្ថភាព ក្នុងការចូលរួមការពារសន្តិភាព ដែលបានខិតខំកសាងអស់រយៈពេលជាង៤០ឆ្នាំកន្លងមក៕