ជាតិ
បើរបបទឹកទន្លេមេគង្គទាប បឹងទន្លេសាបអាចនឹងខ្សត់ត្រី? លោក ថាច់ ផាណារ៉ា (ពាក់អាវខៀវ) ជាមន្ត្រីវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល និងលោក បណ្ឌិត ហ្សេប ហូហ្គេន អ្នកដឹកនាំគម្រោង អច្ឆរិយភាពនៃទន្លេមេគង្គ ក្នុងពេលចុះសិក្សាស្រាវជ្រាវអំពីដំណើរបណ្តែតខ្លួនតាមចរន្តទឹកនៃពពួកកូនត្រីធ្វើចរាចរផ្លាស់ទី ចេញពីទន្លេមេគង្គ ឆ្ពោះទៅបឹងទន្លេសាប។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
× គម្រោងអច្ឆរិយភាពនៃទន្លេមេគង្គ (Wonders of the Mekong) សហការជាមួយវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល បានចុះធ្វើការសិក្សាស្រាវជ្រាវមួយ ស្តីអំពីដំណើរនៃការបណ្តែតខ្លួនតាមចរន្ត នៃកូនត្រីប្រភេទធ្វើចរាចរផ្លាស់ទី ដែលត្រីមេពូជបានទម្លាក់ពង និងញ៉ាស់បណ្តែតទឹកពីទន្លេមេគង្គ ចូលទៅក្នុងបឹងទន្លេសាប និងតំបន់វាលទំនាបលិចទឹកផ្សេងៗ។
ការសិក្សានេះ គឺមានគោលបំណងចង់ដឹងអំពីចំនួនកូនត្រី និងប្រភេទត្រីអ្វីខ្លះ ដែលបានពង និងញ៉ាស់ ហើយកូនត្រីនោះបណ្តែតខ្លួនតាមចរន្តទឹក ហូរចូលទៅក្នុងបឹងទន្លេសាប និងតំបន់វាលទំនាបលិចទឹកផ្សេងៗ ប្រយោជន៍ ដើម្បីអាចវាយតម្លៃអំពីផលចាប់នៅរដូវបើកនេសាទ។
ជាទូទៅ ត្រីរៀល (Gymnostomus spp.) ដែលតំណាងឲ្យផលចាប់ត្រីទឹកសាប ក្នុងប្រទេសកម្ពុជា បាននាំមុខគេ ព្រមទាំងពពួកស្លឹកឬស្សី (Paralaubuca spp.) ត្រីលេញ (Thynnichthys thynnoides) កញ្ជ្រូក (Yasuhikotakia spp.) ។ល។ ដែលជាប្រភេទត្រីតូចៗ និង ពពួកត្រីប្រា (Pangasius spp.) ត្រីប្រាធំ (Pangasianodon hypophthalmus) ត្រីពោ (Pangasius larnaudii) ត្រីឆ្កោក (Cyclocheilos enoplos) ត្រីឆ្ពិន (Hypsibarbus spp.) ត្រីក្រឡង់ / ត្រីព្រួល (Cirrhinus microlepis) ត្រីក្រាយ ត្រីគល់រាំង (Catlocarpio siamensis) ត្រីរាជ (Pangasianodon gigas)។ល។ ប្រភេទត្រីធំៗ ។
ជាប្រចាំឆ្នាំ នៅដើមរដូវវស្សា ចាប់ពីដើមខែឧសភា ត្រីមេពូជចាប់ផ្តើមទម្លាក់ពងនៅក្នុងទន្លេមេគង្គលើ ជាពិសេសនៅតាមអន្លង់ទឹកជ្រៅនៅក្នុងខេត្តក្រចេះ ស្ទឹងត្រែង និងរតនគិរី។ ពងនោះ ក៏ចាប់ផ្តើមញ៉ាស់ជាបណ្តើរៗ ហើយក៏អណ្តែតខ្លួនតាមចរន្តទឹកហូរចូលទៅក្នុងបឹងទន្លេសាប និងតាមតំបន់វាលទំនាបលិចទឹកផ្សេងៗ ដើម្បីរកចំណី និងធំធាត់។
តាមរយៈការសិក្សាស្រាវជ្រាវកន្លងទៅថ្មីៗ ក្នុងខែកក្កដានេះ បានបង្ហាញឲ្យឃើញថា កូនត្រីគ្រប់ប្រភេទ នៅពុំទាន់មានវត្តមានបណ្តែតតាមចរន្តទឹកចេញពីទន្លេមេគង្គចូលទៅក្នុងបឹងទន្លេសាបនៅឡើយទេ។ ការណ៍នេះ អាចបណ្តាលមកពីរបបទឹកទន្លេមេគង្គនៅតិច ពុំទាន់ហូរចុះមកក្រោម និងនាំកូនត្រីទាំងនោះ ចូលទៅក្នុងបឹងទន្លេសាប និងតាមតំបន់វាលទំនាបលិចទឹកដូចឆ្នាំកន្លងទៅនៅឡើយទេ។
វាជាការព្រួយបារម្ភមួយ បើរបបទឹកទន្លេមេគង្គទាបចំពេលដែលពពួកត្រីធ្វើចរាចរផ្លាស់ទីពង-កូនតាមវដ្តជីវិតរបស់ពួកវា ជាពិសេស ពពួកត្រីរៀល (Gymnostomus spp.) ស្លឹកឬស្សី (Paralaubuca spp.) ត្រីលេញ (Thynnichthys thynnoides) ។ល។ ដែលជាពពួកត្រីដែលផ្តល់ប្រូតេអ៊ិនចំណីអាហារដល់ប្រជាជនខ្មែរយ៉ាងច្រើននោះ ត្រូវបានអាក់ខាន។ ពពួកត្រីទាំងនេះ វានឹងចាប់ផ្តើមទម្លាក់ពងនៅដើមរដូវវស្សា និងញ៉ាស់ជាបណ្តើរបណ្តែតតាមចរន្តទឹកហូរ។ បើរបបទឹកទន្លេមេគង្គទាបទឹកមិនហូរ វាក៏ពុំអាចបណ្តែតខ្លួនចូលទៅក្នុងបឹងទន្លេសាប និងតាមតំបន់វាលទំនាបលិចទឹកផ្សេងៗបានដែរ។ ពង ឬកូនត្រីដែលទើបនឹងញ៉ាស់ទាំងនោះ នឹងវិលវល់នៅមួយកន្លែងមិនទៅណាឆ្ងាយទេ ហើយក៏ត្រូវបានចាប់ជាចំណីពីពពួកត្រីផ្សេងៗ អស់ទៅ។ របបទឹកទន្លេមេគង្គ ឡើង-ស្រកតាមវដ្ដរដូវ គឺមានសារៈសំខាន់ណាស់ ចំពោះធនធានជលផល។
បើយោងតាមសេចក្តីថ្លែងការណ៍របស់លេខាធិការដ្ឋានគណៈកម្មការទន្លេមេគង្គ បានប្រកាសកាលពីថ្ងៃទី ១៨ ខែកក្កដា នេះថា ទឹកទន្លេមានកម្រិតទាបបំផុតក្នុងកំឡុងពេលរដូវទឹកជំនន់ដំបូងចាប់ពីខែមិថុនាដល់ពាក់កណ្តាលខែកក្កដានេះ។ សេចក្តីថ្លែងការណ៍បាននិយាយថា ចាប់ពីទន្លេមេគង្គលើនៅប្រទេសថៃ និងប្រទេសឡាវ រហូតដល់ប្រទេសកម្ពុជា កម្រិតទឹកគឺទាបជាងកម្ពស់ទឹកដែលទាបបំផុត នេះបើយោងតាមការកត់ត្រាតាំងពីឆ្នាំ ១៩៩២ មក។ ដូច្នេះ យើងត្រូវតែចូលរួមថែរក្សាការពារទន្លេមេគង្គ និងធនធានជលផលរបស់ប្រទេសយើងទាំងអស់គ្នា!
© រក្សាសិទ្ធិដោយ thmeythmey.com