ជាតិ
នយោបាយជាតិ
ករណីមូលដ្ឋានទ័ពចិន៖ អ្នកនាំពាក្យប្រាប់អាមេរិកឲ្យឈប់បំពុលព័ត៌មានដដែលៗ
×![]()
ភ្នំពេញ៖ គ្មានឡើយ ទីតាំងមូលដ្ឋានទ័ពចិន ឈរជើងនៅកម្ពុជា។ នេះជាការបដិសេធជាថ្មីរបស់ក្រសួងការពារជាតិ ចំពោះការលើកឡើងរបស់អាមេរិក ដែលដាក់ការសង្ស័យថា កម្ពុជា នឹងចុះកិច្ចព្រមព្រៀងជាមួយចិន សម្រាប់ផ្ដល់កន្លែងឲ្យទ័ពចិនឈរជើង។
«ខ្ញុំមិនដឹងថា បដិសេធយ៉ាងម៉េចទៀតទេ ព្រោះវាមិនមែនជាការពិត»។ នេះជាការលើកឡើងរបស់លោក ឈុំ សុជាត អ្នកនាំពាក្យក្រសួងការពារជាតិ ដែលចាត់ទុកការលើកឡើងរបស់អាមេរិក ជាការចោទប្រកាន់ដោយគ្មានមូលដ្ឋានច្បាស់លាស់ និងបំផ្លើសការពិត ដើម្បីធ្វើឲ្យមតិជាតិ និងអន្តរជាតិយល់ច្រឡំ។
លោក ឈុំ សុជាត បានអះអាងដាច់អហង្ការថា កម្ពុជា មិនអនុញ្ញាតឲ្យកងទ័ពចិន និងបរទេសណា សង់មូលដ្ឋាននៅក្នុងទឹកដីខ្លួនឡើយ។ ថ្លែងប្រាប់សារព័ត៌មាន ThmeyThmey អ្នកនាំពាក្យក្រសួងការពារជាតិរូបនេះ បានលើកឡើងដូច្នេះថា៖«ដំណឹងទាំងអស់នេះ គឺជាដំណឹងបំផ្លើស គ្មានការពិតជាក់ស្ដែង ដែលមិនអាចទទួលយកបានហើយសុំឲ្យបញ្ឈប់ការលើកឡើងដោយគ្មានមូលដ្ឋានពិតប្រាកដហ្នឹង ធ្វើឲ្យមានការភាន់ច្រឡំមកលើអធិបតេយ្យភាពកម្ពុជា។ ក្រសួងការពារជាតិបដិសេធដាច់អហង្ការថា គ្មានបញ្ហាអ្វីទេ ហើយសុំឲ្យអស់លោក(អាមេរិក)ហ្នឹង ឈប់បំពុល ដែលនាំឲ្យប្រទេសកម្ពុជា និងអន្តរជាតិដទៃមានបញ្ហា។ ហើយបញ្ហាភាគច្រើន ជារឿងបញ្ហាភូមិសាស្ត្រនយោបាយនៅកម្ពុជា និងភូមិសាស្ត្រនយោបាយរវាងអាមេរិកនិងចិន»។
សារព័ត៌មាន The Wall Street Journal របស់អាមេរិក បានចុះផ្សាយថា ចិន នឹងអាចឈរជើងទ័ពជើងទឹកនៅកម្ពុជា តាមរយៈកិច្ចព្រមព្រៀងសម្ងាត់រវាងរដ្ឋាភិបាលប្រទេសទាំងពីរ។ សារព័ត៌មានដដែល បានស្រង់សម្តីមន្ត្រីអាមេរិកម្នាក់ ដែលអះអាងបានឃើញកិច្ចព្រមព្រៀងនោះថា កម្ពុជាបានអនុញ្ញាតឲ្យចិនប្រើប្រាស់មូលដ្ឋានទ័ពនៅសមុទ្ររាម ខេត្តព្រះសីហនុ រយៈពេល៣០ឆ្នាំ ហើយអាចបន្តសុពលភាពជាស្វ័យប្រវត្តិរៀងរាល់១០ឆ្នាំម្ដង។ បើតាម The Wall Street Journal មូលដ្ឋានទ័ពចិននេះ នឹងមានកន្លែងស្ដុកអាវុធ និងកន្លែងចតកប៉ាល់ចម្បាំងជាដើម។
ជុំវិញការលើកឡើងនេះសម្ដេចនាយករដ្ឋមន្ត្រី ហ៊ុន សែន បានចេញប្រតិកម្មថា ព័ត៌មានដែលនិយាយពីកម្ពុជាបើកផ្លូវឲ្យទ័ពចិនឈរជើងនៅខេត្តព្រះសីហនុនេះ ជារឿងប្រឌិត។ តាមរយៈសារព័ត៌មាន Fresh News ប្រមុខរដ្ឋាភិបាល បានអះអាងដូច្នេះថា៖«នេះជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា។ គ្មានរឿងបែបនេះកើតឡើងនោះទេ ព្រោះមូលដ្ឋានយោធា បរទេសវាបានប្រឆាំងនឹងរដ្ឋធម្មនុញ្ញរបស់កម្ពុជា»។
ដើមចមដែលនាំឲ្យអាមេរិកសង្ស័យថា កម្ពុជា នឹងបើកផ្លូវឲ្យចិន មានមូលដ្ឋានទ័ពជើងទឹកសមុទ្ររាមនោះ គឺកើតឡើងក្រោយពីកម្ពុជា បដិសេធបំណងអាមេរិក ដែលគ្រោងជួយស្ថាបនាអគារទ័ពកម្ពុជានៅសមុទ្ររាមឡើងវិញ។ កញ្ចប់ថវិការបស់អាមេរិក សម្រាប់ជួយស្ថាបនាអគារទ័ពកម្ពុជានេះ ត្រូវបានអនុម័តកាលពីខែមេសា បន្ទាប់ពីឧបការីរងក្រសួងការពារជាតិអាមេរិកទទួលបន្ទុកតំបន់អាស៊ីខាងត្បូង និងអាស៊ីអាគ្នេយ៍លោក Joseph Felter បានធ្វើដំណើទស្សនកិច្ចមូលដ្ឋានទ័ព នៅខេត្តព្រះសីហនុ កាលពីអំឡុងខែមករា ដើមឆ្នាំ២០១៩។
ប៉ុន្តែការសង្ស័យនេះ ត្រូវបានលោក ឈុំ សុជាត បកស្រាយថា មូលហេតុដែលកម្ពុជា មិនទទួលយកជំនួយស្ថាបនាអគារទ័ពនោះ ដោយសារតែកម្ពុជា ចង់ផ្លាស់ប្ដូរមូលដ្ឋានទ័ពទៅកន្លែងថ្មី ទើបមិនចង់ឲ្យមានការជួសជុលអគារចាស់បែបនេះ។ «យើងបានបដិសេថថា យើងអត់មានគម្រោងជួសជុលទេ។ ហើយក្រសួងការពារជាតិ បានអញ្ជើញអនុពន្ធយោធាអាមេរិក កាលពីថ្ងៃទី១ កក្កដា មកជួបនៅក្រសួងការពារជាតិ ដោយបានប្រាប់អនុពន្ធយោធាថា យើងអត់មានគម្រោងជួសជុលទេ ព្រោះទីតាំងលំហរសមុទ្រយើងត្រូវប្ដូរទីតាំងទៅកន្លែងផ្សេង ដោយសារអគ្គលេខាធិការលំហរសមុទ្រ ត្រូវការទីតាំងទូលាយសម្រាប់បណ្ដុះបណ្ដាល…។ ចំណែកទីតាំងសមុទ្ររាម យើងទុកកសាងឲ្យវាមានភាពប្រសើរឡើងថែមទៀត មិនមែនទុកឲ្យចិន ឲ្យអ្នកណាវិនិយោគទេ គឺទុកឲ្យកងទ័ពជើងទឹកកម្ពុជាឈរជើងដដែល ប៉ុន្តែយើងកសាងទីតាំងហ្នឹងឲ្យវាទាន់សម័យថែមទៀត ព្រោះយើងត្រូវការនាវាចត កប៉ាល់ចតច្រើន ដោយប្រទេសជាតិមានការរីកចម្រើន»។ នេះជាការបញ្ជាក់បន្ថែមរបស់អ្នកនាំពាក្យក្រសួងការពារជាតិ។
ក្រៅពីមូលដ្ឋានទ័ពនៅសមុទ្ររាម ក៏មានតំបន់ឆ្នេរតារាសាគរ ដែលកម្ពុជា ច្រានចោលការលើកឡើងរបស់អាមេរិក ដែលសង្ស័យថា កម្ពុជាផ្ដល់ឲ្យចិនឈរជើងដែរ៕
ក្រៅពីមូលដ្ឋានទ័ពនៅសមុទ្ររាម ក៏មានតំបន់ឆ្នេរតារាសាគរ ដែលកម្ពុជា ច្រានចោលការលើកឡើងរបស់អាមេរិក ដែលសង្ស័យថា កម្ពុជាផ្ដល់ឲ្យចិនឈរជើងដែរ៕
Tag:
ឈុំ សុជាត
កងទ័ព
ចិន
© រក្សាសិទ្ធិដោយ thmeythmey.com
