កូរ៉េខាងត្បូង កៀងគរការគាំទ្រពីអន្តរជាតិក្នុងជម្លោះពាណិជ្ជកម្មជាមួយជប៉ុន

អន្តរជាតិ

កូរ៉េខាងត្បូង កៀងគរការគាំទ្រពីអន្តរជាតិក្នុងជម្លោះពាណិជ្ជកម្មជាមួយជប៉ុន

22, Jul 2019 , 3:30 pm

រូបភាព

ស្លាកសញ្ញាបង្ហាញពីការធ្វើពហិការទំនិញជប៉ុនក្នុងផ្សារមួយនៅកូរ៉េខាងត្បូង។ រូបភាព AFP

ដោយ: តន ចាន់រិទ្ធារ៉ា

កូរ៉េខាងត្បូង នឹងបញ្ជូនទៅប្រតិភូមួយក្រុមទៅកាន់អង្គការពាណិជ្ជកម្មអន្តរជាតិដើម្បីកៀងគរការគាំទ្រ ក្នុងជម្លោះពាណិជ្ជកម្មជាមួយជប៉ុន។ គោលដៅនៃដំណើររបស់អនុរដ្ឋមន្ត្រីពាណិជ្ជកម្មម្នាក់របស់កូរ៉េខាងត្បូង គឺទៅប្រាប់ប្រទេសនានាពីសកម្មភាពបំពានច្បាប់របស់ជប៉ុនដែលរឹតត្បិតការនាំចេញសារធាតុគីមីទៅកូរ៉េខាងត្បូង។ ទោះមិនមានចំណាត់ការតបវិញ កូរ៉េខាងត្បូង ធ្លាប់ព្រលយថា ខ្លួនឹងប្ដឹងជប៉ុនទៅអង្គការពាណិជ្ជកម្មអន្តរជាតិ។

អនុរដ្ឋមន្ត្រីពាណិជ្ជកម្មទទួលបន្ទុកកិច្ចការពហុភាគី និងច្បាប់ Kim Seung-ho នឹងចូលរួមក្នុងកិច្ចប្រជុំក្រុមប្រឹក្សទូទៅនៃអង្គការពាណិជ្ជកម្មអន្តរជាតិ (WTO) នៅថ្ងៃទី២៣ ខែកក្កដា ។ នេះបើតាមការប្រកាសរបស់ក្រសួងពាណិជកម្មកូរ៉េខាងត្បូងនៅថ្ងៃទី២២ ខែកក្កដា។ បេសកកម្មសំខាន់របស់លោក Kim គឺការប្រាប់សមាជិកអង្គការ WTO ពីសកម្មភាពបំពានរបស់ជប៉ុនជុំវិញការរឹតត្បិតការនាំចេញសារធាតុគីមីដែលចាំបាច់ក្នុងផលិតកម្មបន្ទះឈីប និងទូរសព្ទឆ្លាតវៃ។

ដោយមានសំណើពីកូរ៉េខាងត្បូង ជំនួបក្រុមប្រឹក្សាទូទៅរបស់ WTO ដែលធ្វើនៅទីក្រុងហ្សឺណែវ ក៏បានបញ្ចូលការសម្រេចចិត្តរឹតត្បិតពាណិជ្ជកម្មរបស់ជប៉ុនជារបៀបវារៈរបស់ខ្លួនផងដែរ។ ក្រុមប្រឹក្សាទូទៅនេះ ជាស្ថាប័នដែលមានសិទ្ធិសម្រេចចិត្តលំដាប់ទីពីរបន្ទាប់ពីជំនួបថ្នាក់រដ្ឋមន្ត្រី។

ក្រសួងពាណិជ្ជកម្មកូរ៉េខាងត្បូង បញ្ជាក់ថា លោក Kim នឹងបង្ហាញពីទង្វើរំលោភពបំពានគោលការណ៍ WTO របស់ក្រុងតូក្យូ ហើយស្នើឲ្យប្រទេសផ្សេងៗចូលរួមក្នុងការទាមទារឲ្យក្រុងតូក្យូដកវិធានការរបស់ខ្លួនដែលអាចបង្កផលប៉ះពាល់ដល់សង្វាក់ផលិតកម្មជុំវិញពិភពលោកវិញ។ ក្នុងបេសកកម្មលើកនេះ មន្ត្រីជាន់ខ្ពស់រូបនេះ រំពឹងថា នឹងទទួលបានការគាំទ្រពីអន្តរជាតិក្នុងការប្រឈមមុខជាមួយអ្នកជិតខាងរបស់ខ្លួន។

ជប៉ុន បានប្រកាសពីវិធានការរឹតត្បិតរបស់ខ្លួននៅដើមខែកក្កដានេះ ដែលបានចាក់ចំចំណុចសំខាន់របស់ឧស្សាហកម្មផលិតផលអេឡិចត្រូនិករបស់កូរ៉េខាងត្បូងតែម្ដង។ វិធានការនេះ កើតឡើងក្រោយតុលាការកូរ៉េខាងត្បូង បញ្ជាឲ្យក្រុមហ៊ុនជប៉ុនសងលុយជំងឺចិត្តដល់កម្មករកូរ៉េខាងត្បូងដែលត្រូវបង្ខំឲ្យធ្វើការធ្ងន់ក្នុងសម័យសង្គ្រាម ទោះជប៉ុនអះអាងថា បញ្ហានេះត្រូវបានដោះស្រាយជាយូរក្ដី។ សេអ៊ូលចាត់ទុកចំណាត់ការបែបសងសឹកនេះ ជារឿងនយោបាយ ហើយបំពានគោលការណ៍អន្តរជាតិ។

ខណៈដែលជម្លោះរកផ្លូវចេញមិនទាន់ឃើញនោះ គេក៏បារម្ភថា ជម្លោះនេះអាចរាលដល់វិស័យផ្សេងទៀតមិនខាន ពិសេសខាងជប៉ុនដែលគេជឿថា កំពុងគិតគូររឹតត្បិការនាំចេញដទៃទៀតផង។ បើតាមទីភ្នាក់ងារព័ត៌មាន Yonhap ក្រុងតូក្យូ បានគំរាមដកសេអ៊ូលចេញពីបញ្ជីអ្នកនាំចូលដ៏គួរឲ្យទុកចិត្តរបស់ខ្លួន ដែលការណ៍នេះ នឹងប៉ះពាល់ខ្លាំងដល់ដល់វិស័យជាច្រើនរបស់កូរ៉េខាងត្បូងដែលជាមហាសេដ្ឋកិច្ចទីបួននៅអាស៊ីនោះ។

ក្រៅពីវេទិកា WTO កូរ៉េខាងត្បូងក៏ពឹងពាក់អាមេរិកឲ្យជួយដែរ។ ទីប្រឹក្សាសន្តិសុខជាតិរបស់ប្រធានាធិបតីអាមេរិក ដូណាល់ ត្រាំ គឺលោក ចន ប៊ូលតុន នឹងជួបជាមួយមន្ត្រីជាន់ខ្ពស់កូរ៉េខាងត្បូងដើម្បីរកដំណោះស្រាយក្នុងវិបត្តិរវាងសម្ព័ន្ធមិត្តដ៏សំខាន់ទាំងពីរនៅអាស៊ី។ លោក ប៊ូលតុន នឹងទៅដល់ទៅសេអ៊ូលនៅថ្ងៃទី២៣ ខែកក្កដា ។ ក្រៅពីកូរ៉េខាងត្បូង មន្ត្រីអាមេរិករូបនេះក៏ទៅជប៉ុនដែរ។ អាមេរិក ពិតជាបារម្ភនឹងការទាស់ទែងរវាងមិត្តភក្តិទាំងពីរ ព្រោះអាចប៉ះពាល់ដល់បញ្ហាផ្សេង ពិសេសការចរចាដើម្បីរំសាយនុយក្លេអ៊ែរកូរ៉េខាងជើង៕