ភាពយន្តជោគជ័យបំផុតទីមួយរបស់ផលិតកម្ម Marvel Studios មានចំណងជើងថា «Iron Man» ដែលបានចាក់បញ្ចាំងក្នុងរោងកុន កាលពីឆ្នាំ២០០៨ ។ គ្រាន់តែបើកចាក់បញ្ចាំងក្នុងសប្តាហ៍ទីមួយ ភាពយន្តដកស្រង់ពីសៀវភៅរូបត្លុក ដែលមានតារាសម្តែងអាមេរិកលោក Robert Downey Jr ដើរតួជា Iron Man រកចំណូលបាន ១០០លានដុល្លារ មុននឹងឈានដល់ ៦០០លានដុល្លារ ពីការលក់សំបុត្រនៅទូទាំងពិភពលោក។
មួយឆ្នាំក្រោយមក ពោលគឺក្នុងឆ្នាំ ២០០៩ ក្រុមហ៊ុនផលិតភាពយន្ត Walt Disney Studios បានសម្រេចចិត្តទិញផលិតកម្ម Marvel Studios ក្នុងទំហំទឹកប្រាក់ ៤ពាន់លានដុល្លារ។ កាលនោះ នាយកប្រតិបត្តិក្រុមហ៊ុន Disney លោក Robert Iger បានបញ្ជាក់ថា ការសម្រេចចិត្តនេះ គឺល្អបំផុតសម្រាប់ទស្សនៈវិស័យយុទ្ធសាស្ត្រ ដ្បិតថា តួអង្គច្រើនជាង ៥ពាន់ ដែលមានក្នុងសៀវភៅត្លុករបស់ចក្រវាល Marvel នឹងផ្តល់សក្តានុពលខ្លាំងបន្ថែមដល់ក្រុមហ៊ុនលោកឲ្យធ្វើកាន់តែល្អបំផុតក្នុងវិស័យភាពយន្ត។
ការលើកឡើងរបស់លោក Iger ហាក់ដូចជាត្រឹមត្រូវ។ ចាប់តាំងពីចាក់បញ្ចាំងភាពយន្តក្នុងចក្រវាល Marvel ដំបូង ដែលក្រុមហ៊ុន Disney ជាអ្នកផលិត ក្នុងឆ្នាំ២០១២មក បច្ចុប្បន្ន ក្រុមហ៊ុននេះ រកចំណូលបានច្រើនជាង ១៨,២ពាន់លានដុល្លារ ពីការលក់សំបុត្រនៅទូទាំងពិភពលោក។
គិតមកត្រឹមឆ្នាំ២០១៩នេះ Disney ផលិតបានភាពយន្តចំនួន ១៦ហើយ ដែលក្នុងនោះ ក្រុមហ៊ុន Paramount ជាតំណែងចែកចាយរឿង Iron Man, Captain American: The First Avenger, Thor និង Iron Man 2 ។ ចំណែកក្រុមហ៊ុន Universal ជាតំណាងចែកចាយ រឿង The Incredible Hulk ដែលជាផ្នែកមួយនៃកិច្ចព្រមព្រៀង នៅពេលដែល Disney ទិញយក Marvel ។ ហើយកាលពីថ្មីៗនេះ ក្រុមហ៊ុន Sony បានផលិតរឿង Spider-Man ចំនួន ២ រួមមាន Homecoming និង Far From Home ដែលសហការជាមួយ Disney ។
សរុបមក ខ្សែភាពយន្តទាំងអស់ ក្នុងចក្រវាល Marvel ដែលផលិតចេញពីសៀវភៅរូបថ្លុករបស់លោក Stan Lee និងអ្នកនិពន្ធល្បីៗផ្សេងទៀត រកចំណូលបានជាង ២២ពាន់លានដុល្លារពីការលក់សំបុត្រនៅទូទាំងពិភពលោក។ យ៉ាងណាមិញ ចំណូលទាំងនេះ ពុំបានគិតបញ្ចូល ថ្លៃចំណាយផលិត ឬថ្លៃទីផ្សារនោះទេ។ ហើយ វា ក៏មិនរាប់បញ្ចូលថ្លៃចំណាយលើការផ្សព្វផ្សាយនានា ដែលក្រុមហ៊ុន Disney បានចំណាយក្នុងរយៈពេលមួយទសវត្សរ៍ចុងក្រោយផងដែរ។
រឿង Avengers: Endgame ទម្លាក់ Avatar ពីតំណែងលេខមួយ
សប្តាហ៍ដំបូងនៃការចាក់បញ្ចាំង រឿង Avengers: Endgame របស់ Marvel រកចំណូលបាន ៣៥៧លានដុល្លារ ក្នុងសហរដ្ឋអាមេរិក និង១,២ពាន់លានដុល្លារ ពីការលក់សំបុត្រនៅទូទាំងពិភពលោក។ អ្នកវិភាគក្នុងខ្សែភាពយន្តមួយចំនួន បានគិតទុកថា រឿងនេះ អាចបំបែកកំណត់របស់ Avatar ។
៨៧ថ្ងៃក្រោយមក ពោលគឺនៅថ្ងៃអាទិត្យទី ២១ កក្កដា Avenger: Endgame របស់ចក្រវាល Marvel បានក្លាយជាភាពយន្តរកចំណូលបានច្រើនបំផុត ដោយរកបាន ២,៧៩ពាន់លានដុល្លារ ខណៈកំណត់ត្រារបស់ Avatar ស្មើនឹង ២,៧៨៩៧ពាន់លានដុល្លារ។
យោងតាមការចុះផ្សាយរបស់ទីភ្នាក់ងារព័ត៌មាន AFP ខាងក្រោមនេះ គឺជាចំណាត់ថ្នាក់នៃភាពយន្តកំពូលទាំង ១០ ដែលរកចំណូលបានច្រើនបំផុត៖
ទី១៖ Avenger: Endgame (ឆ្នាំ២០១៩) រកចំណូលបាន ២,៧៩ពាន់លានដុល្លារ,
ទី២៖ Avatar (២០០៩) រកចំណូលបាន ២,៧៨៩៧ពាន់លានដុល្លារ,
ទី៣៖ Titanic (១៩៩៧) រកចំណូលបាន ២,១៩ពាន់លានដុល្លារ,
ទី៤៖ Star Wars: The Force Awakens (២០១៥) រកចំណូលបាន ២,០៧ពាន់លានដុល្លារ,
ទី៥៖ Avengers: Infinity War (២០១៨) រកចំណូលបាន ២,០៥ពាន់លានដុល្លារ,
ទី៦៖ Jurassic World (២០១៥) រកចំណូលបាន ១,៦៧ពាន់លានដុល្លារ,
ទី៧៖ The Avengers (២០១២) រកចំណូលបាន ១,៥១ពាន់លានដុល្លារ,
ទី៨៖ Fast & Furious 7 (២០១៥) រកចំណូលបាន ១,៥១ពាន់លានដុល្លារ,
ទី៩៖ Avengers: Age of Ultron (២០១៥) រកចំណូលបាន ១,៤០ពាន់លានដុល្លារ,
ទី១០៖ Black Panther (២០១៨) រកចំណូលបាន ១,៣៥ពាន់លានដុល្លារ៕