ជាតិ
សង្គមជាតិ
×![]()
ភ្នំពេញ៖ ក្រុមស្ត្រី LBT ដែលមាន ស្ត្រីស្រលាញ់ស្ត្រី ស្ត្រីស្រលាញ់ភេទទាំងពីរ និងស្ត្រីប្ដូរយេនឌ័រជាបុរស ភាគច្រើនទទួលរងអំពើហិង្សាពីគ្រួសារ តាំងពីវ័យក្មេង។ អំពើហិង្សាដែលក្រុមនេះ ទទួលរងពីគ្រួសារ មានអំពើហិង្សាផ្លូវចិត្ត ផ្លូវភេទ និងផ្នែកសេដ្ឋកិច្ច។ នេះយោងតាមរបាយការណ៍ស្រាវជ្រាវរបស់សហគមន៍ឥន្ទធនូកម្ពុជា ដែលបានបង្ហាញកាលពីថ្ងៃទី១៧កក្កដា ឆ្នាំ២០១៩។
សហគមន៍ឥន្ទធនូកម្ពុជា បានសិក្សាស្រាវជ្រាវលើក្រុមស្ត្រីLBT ចំនួន៦១នាក់ មកពីខេត្តចំនួន៨នៅកម្ពុជា ក្នុងនោះមាន៣១នាក់ ដែលមានអាយុក្រោម៣៥ឆ្នាំ បានទទួលរងអំពើហិង្សាពីគ្រួសារតាំងពីនៅវ័យក្មេងម្ល៉េះ។ ក្រុមស្ត្រី LBT អាយុក្រោម៣៥ឆ្នាំនោះ មានចំនួន៨១ភាគរយ ជួបប្រទះអំពើហិង្សាផ្លូវចិត្ត មាន១០ភាគរយ ទទួលរងនូវអំពើហិង្សាផ្លូវភេទ និងចំនួន៣៥ភាគរយទៀត គឺជាក្រុមដែលធ្លាប់គិតចង់សម្លាប់ខ្លួន ឬក៏ធ្លាប់សម្លាប់ខ្លួនហើយតែមិនបានសម្រេច។
ក្រុមស្ត្រីដែលទទួលរងអំពើហិង្សាលើផ្លូវចិត្តពីគ្រួសារ ព្រោះតែនៅក្នុងស្ថានភាពគ្រួសារ ស្ត្រីទាំងនោះរមែងទទួលបានការរើសអើង និងមិនទទួលបានការរាប់រកពីសមាជិកគ្រួសារទេ នេះគឺកើតឡើងនៅពេលដែលពួកគាត់បង្ហាញពីអត្តសញ្ញាណយេនឌ័ររបស់ខ្លួន។
ឯអំពើហិង្សាលើផ្លូវភេទវិញ គឺកើតឡើងនៅពេលក្រុមស្ត្រី LBT ត្រូវបានសមាជិកក្រុមគ្រួសាររបស់ពួកគាត់បង្ខំឱ្យរៀបអាពាហ៍ពិពាហ៍ជាមួយបុរសដែលពួកគាត់មិនស្រលាញ់។ ក្រៅពីអំពើហិង្សាលើផ្លូវចិត្ត និងផ្លូវភេទនោះ ក៏មានអំពើហិង្សាលើផ្លូវកាយ ដែលក្រុមស្ត្រីទាំងនោះទទួលរងការវាយដំពីសមាជិកគ្រួសារ ក៏ដូចជាអំពើហិង្សាលើសេដ្ឋកិច្ច ដែលក្រុមស្ត្រីទាំងនោះ ត្រូវបានឪពុកម្ដាយ ដកហូតទ្រព្យសម្បត្តិមិនឱ្យប្រើប្រាស់ ឬចាយវាយជាដើម។ នេះបើរបាយការណ៍ដដែលបានរៀបរាប់ពីស្ថានភាពហិង្សាលើក្រុមស្ត្រីLBT។
ការរើសអើង មើលងាយ ស្អប់ខ្ពើមដែលចេញមកពីគ្រួសារទាំងនេះ ការស្រាវជ្រាវបានបញ្ជាក់ថា ជាទូទៅក្រុមស្ត្រី LBT រមែងតែទទួលបានការបាក់ទឹកចិត្តលើខ្លួនឯង។
របាយការណ៍នេះ បានសង្កត់ធ្ងន់ថា ក្នុងសង្គមកម្ពុជា មានរាជរដ្ឋាភិបាល ក៏ដូចជាប្រជាជនទូទៅអះអាងថា ពួកគេទទួលស្គាល់ដោយមើលឃើញពីស្ថានភាពនៃការរើសអើងក្រុមស្ត្រី LBT មានការថយចុះ និងមានលក្ខណៈល្អប្រសើរច្រើន ប៉ុន្តែធាតុពិតទៅ ក្រុមស្ត្រី LBT ផ្ទាល់គឺមិនបានមើលឃើញយ៉ាងដូច្នេះទេ។ ផ្ទុយទៅវិញ ពួកគាត់មើលឃើញថា សង្គមគឺនៅតែបន្តរើសអើង មើលងាយ និងស្អប់ខ្ពើមពួកគាត់ដដែល៕
Tag:
LBT
ហិង្សា
© រក្សាសិទ្ធិដោយ thmeythmey.com
