ជាតិ
រូបភាពពីហ្វេសប៊ុកអង្គការមូលនិធិសកលសម្រាប់អភិរក្សធនធានធម្មជាតិ WWF
×![]()
ដោយ: ឡាយ សុភាវតី
ភ្នំពេញ៖ សត្វផ្សោតមួយក្បាលងាប់នៅខេត្តក្រចេះ ដែលត្រូវបានគេសង្ស័យថា ងាប់ដោយសារជាប់ម៉ង ។ នេះជាការសន្និដ្ឋានបឋម របស់រដ្ឋបាលជលផល និងអង្គការមូលនិធិសកលសម្រាប់អភិរក្សធនធានធម្មជាតិ WWF ដែលប្រទះឃើញសត្វផ្សោតងាប់នោះ មានជាប់ស្នាមម៉ងនៅកន្ទុយ។
អង្គការ WWF បានបញ្ជាក់ថា សត្វផ្សោតដែលងាប់ជាផ្សោតឈ្មោល មានប្រវែង១.៩៨ម៉ែត្រ និងមានអាយុប្រហែល១៥ទៅ១៨ឆ្នាំ។ សាកសពសត្វផ្សោតនេះ បានរក្សាទុកក្នុងទូរទឹកកកនៅការិយាល័យWWF ដើម្បីធ្វើកោសល្យវិច័យ។ សត្វផ្សោតដែលងាប់នេះ ត្រូវបានគេប្រទះឃើញនៅភូមិកាកុត ឃុំសំបុក ស្រុកចិត្របុរី ខេត្តក្រចេះ កាលពីថ្ងៃទី២២កក្កដា ឆ្នាំ២០១៩។
បើតាមអង្គការ WWF ការដាក់ម៉ងរបស់ពលរដ្ឋក្នុងតំបន់អភិរក្ស ជាកត្តាចម្បងដែលធ្វើឲ្យប៉ះពាល់ដល់ជីវិតសត្វផ្សោតតាមទន្លេមេគង្គ។ ជាមួយគ្នានេះអង្គការ WWF អំពាវនាវកុំឲ្យពលរដ្ឋនេសាទខុសច្បាប់ក្នុងតំបន់អភិរក្ស ដើម្បីការពារសត្វផ្សោត ដែលជាបេតិកភណ្ឌមានជិវិតនៅកម្ពុជា
គិតចាប់ពីដើមឆ្នាំ២០១៩មក មានសត្វផ្សោត៥ក្បាលហើយ ដែលបានងាប់ ។ រីឯកូនសត្វផ្សោត៩ក្បាលទៀត បានកើត។ នេះបើតាមអង្គការមូលនិធិសកលសម្រាប់អភិរក្សធនធានធម្មជាតិ WWF៕
Tag:
សត្វផ្សោត
© រក្សាសិទ្ធិដោយ thmeythmey.com
