អន្តរជាតិ
លោក ឌូទើតេ បញ្ជាឲ្យព្យួរតំណែងចៅហ្វាយខេត្ត-ក្រុងដែលមិនព្រមរំដោះផ្លូវក្នុងទឹកដីរបស់ខ្លួន
ប្រធានាធិបតីហ្វីលីពីន រ៉ូឌ្រីហ្គោ ឌូទើតេ នាឱកាសថ្លែងសុន្ទរកថាទៅកាន់ប្រជាជាតិ។ រូបភាព AFP
×![]()
ដោយ: តន ចាន់រិទ្ធារ៉ា
នៅថ្ងៃទី២២ ខែកក្កដា ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានបញ្ជាឲ្យរដ្ឋមន្ត្រីមហាផ្ទៃ ព្យួរតំណែងអភិបាលខេត្ត ឬក្រុងទាំងឡាយណាដែលមិនអនុវត្តបញ្ជាក្នុងការរំដោះផ្លូវដែលត្រូវបានប្រើប្រាស់ដោយឯកជន។ លោក ឌូទើតេ អះអាងថា មន្ត្រីទាំងនោះ មិនព្រមចាត់ការតាមបញ្ជា ដើម្បីតែបំពេញចិត្តអ្នកបោះឆ្នោតក្នុងតំបន់របស់ពួកគេ។ 
បញ្ហាកកស្ទះចរាចរណ៍ក្នុងទីក្រុង និងខេត្តនានានៅហ្វីលីពីន ពិសេសរដ្ឋធានីម៉ានីលនៅតែមិនទាន់ស្រាកស្រាន្ត ទោះជាមានបញ្ជាពីប្រធានាធិបតី រ៉ូឌ្រីហ្គោ ឌូទើតេ ។ នៅថ្ងៃទី២២ ខែកក្កដា លោក ឌូទើតេ ប្រកាសចាត់វិធានការក្ដៅលើថ្នាក់ដឹកនាំខេត្ត និងក្រុងនានាដែលមិនព្រមរំដោះផ្លូវសាធារណៈក្នុងទីក្រុង ដែលត្រូវបានរំលោភបំពានដោយឯកជន។
នាឱកាសថ្លែងសុន្ទរកថាទៅកាន់ប្រជាជាតិលើកទីបួននៅវិមានរដ្ឋសភាក្នុងទីក្រុងម៉ានីល លោក ឌូទើតេ ដាក់បញ្ជាក់ថា ត្រូវតែដណ្ដើមយកផ្លូវសាធារណៈដែលកំពុងត្រូវបានប្រើប្រាស់ដោយឯកជនមកវិញឲ្យបានទាំងអស់។ លោក ឌូទើតេ ក៏បានណែនាំឲ្យរដ្ឋមន្ត្រីមហាផ្ទៃ Eduardo Año តាមដានកិច្ចការនេះ និងដាក់ពិន័យចៅហ្វាយខេត្ត ឬក្រុងដែលមិនអនុវត្តតាមបញ្ជាទេនោះ។
«ប្រសិនបើមានអភិបាលខេត្ត ឬក្រុង ឬអ្នកក៏ដោយ លោក Año ព្យួរតំណែងពួកគេទៅ។» នេះជាបញ្ជារបស់លោក ឌូទើតេ ចំពោះមុខសមាជិកព្រឹទ្ធសភា រដ្ឋសភា និងមន្ត្រីរដ្ឋាភិបាលជាច្រើនទៀត។ ប៉ុន្តែប្រធានាធិបតីហ្វីលីពីនរូបនេះ ក៏បានផ្ដល់ឱកាសឲ្យចៅហ្វាយខេត្ត ឬក្រុងទាំងនោះ ធ្វើការរបស់ពួកគេ ហើយបើធ្វើមិនកើត លោកសំណូមពរឲ្យពួកគេ ទៅសម្រាកទៅ។
សម្រាប់លោក ឌូទើតេ រឿងមិនព្រមរំដោះផ្លូវនេះ កើតឡើងក្នុងតំបន់ដែលមន្ត្រីរដ្ឋាភិបាលចូលចិត្ត។ សម្រាប់ករណីបែបនេះ មន្ត្រីទាំងនោះ អាចអនុញ្ញាតឲ្យមានការលក់ដូរដោយខុសច្បាប់លើផ្លូវសាធារណៈ ហើយគ្មានការអនុញ្ញាតពីរដ្ឋាភិបាលផង ដែលនេះឲ្យមានការបិទផ្លូវធ្វើដំណើរទៅមកសម្រាប់ប្រជាជនឯទៀត។
ឆ្លៀតឱកាសនោះ លោក ឌូទើតេ ដែលមានកេរ្តិ៍ឈ្មោះល្អពេលធ្វើជាចៅហ្វាយក្រុង Davao ជាងម្ភៃឆ្នាំមុនក្លាយជាប្រធានាធិបតី ក៏បង្គាប់ឲ្យរដ្ឋាភិបាលដោះស្រាយបញ្ហាចរាចរណ៍ក្នុងរដ្ឋធានីម៉ានីលផងដែរ។ បើតាមលោក ឌូទើតេ ការកកស្ទះចរាចរណ៍ក្នុងទីក្រុងដ៏ធំ និងមមាញឹកមួយនេះធ្វើឲ្យខាតបង់ថវិកាប្រមាណ៣,៥ពាន់លានដុល្លារពឺសូក្នុងមួយថ្ងៃ ដែលស្មើនឹងជាង៦៤លានដុល្លារឯណោះ។ ដូចនេះ លោកចង់រំឭកពីបទបញ្ជារដ្ឋាភិបាលទៅកាន់អភិបាលខេត្ត-ក្រុងនានាឲ្យដោះស្រាយបញ្ហាចរាចរណ៍ សំដៅសម្រួលការធ្វើដំណើរ៕
Tag:
ហ្វីលីពីន
រ៉ូឌ្រីហ្គោ ឌូទើតេ
ចរាចរណ៍
© រក្សាសិទ្ធិដោយ thmeythmey.com
