ជាតិ
ឧតុនិយម៖ មូសុងនិរតីក្នុងកម្រិតមធ្យមធ្វើឲ្យធាតុអាកាសកម្ពុជាល្អរហូតដល់ចុងខែ
×
ដោយ៖ សុវណ្ណ ស្រីពេជ្រ
ភ្នំពេញ៖ ក្រសួងធនធានទឹក និងឧតុនិយម បានព្យាករថា ចាប់ពីថ្ងៃទី២៣-២៩ កក្កដានេះ កម្ពុជានឹងមានអាកាសធាតុវិជ្ជមានឡើងវិញ ដែលធ្វើឲ្យតំបន់មួយចំនួនមានភ្លៀងធ្លាក់ពីមធ្យមទៅច្រើន។ នេះបើតាមសេចក្ដីជូនដំណឹងរបស់ក្រសួងធនធានទឹក ដែលចេញផ្សាយនាថ្ងៃទី២៣ កក្កដានេះ។
បើតាមសេចក្ដីប្រកាសរបស់ក្រសួងធនធានទឹក មូលហេតុដែលនាំឲ្យអាកាសធាតុត្រឡប់មកល្អប្រសើវិញនោះ គឺដោយសារតែជ្រលងសម្ពាធទាប ដែលស្ថិតនៅភាគខាងលើកម្ពុជាបច្ចុប្បន្ន បានរំកិលចុះមកក្រោម ទន្ទឹមនឹងខ្យល់មូសុងនិរតី ដែលកំពុងមានឥទ្ធិពលក្នុងកម្រិតមធ្យម។
ក្រសួងធនធានទឹក បញ្ជាក់ថា បណ្ដាខេត្តមួយចំនួននៅភាគខាងលើ នឹងមានភ្លៀងធ្លាក់បានល្អពីកម្រិតមធ្យមទៅច្រើន ហើយភាពរាយប៉ាយក៏ប្រសើរផងដែរ។
ដោយឡែកនៅតាមបណ្ដាខេត្ត និងរាជធានីនៃទំនាបកណ្ដាលភាគខាងក្រោម នឹងអាចមានភ្លៀងក្នុងកម្រិតពីតិចទៅបង្គួរ ខណៈបណ្ដាខេត្តជាប់សមុទ្រ នឹងអាចមានភ្លៀងក្នុងកម្រិតពីតិចទៅមធ្យម។ ឯបាតុភូត រន្ទះ និងខ្យល់កន្ត្រាក់ មានសភាពធូរស្រាលជាងមុនផងដែរ។ នេះបើតាមក្រសួងធនធានទឹក និងឧតុនិយម៕
© រក្សាសិទ្ធិដោយ thmeythmey.com