អន្តរជាតិ
នាយករដ្ឋមន្រ្តី បូរីស ចនសុន ។ រូបភាព AFP
×![]()
ដោយ: តន ចាន់រិទ្ធារ៉ា
អតីតរដ្ឋមន្ត្រីការបរទេសអង់គ្លេស បូរីស ចនសុន នៅថ្ងៃទី២៣ ខែកក្កដា បានទទួលជោគជ័យក្នុងការប្រជែងតំណែងប្រធានបក្សអភិរក្សនិយម ដែលជាបក្សកាន់អំណាចនៅអង់គ្លេស ក្រោយផ្ដួលគូប្រជែង ជេរេមី ហាន់ ។ លោក ចនសុន នឹងស្នងតំណែងបន្តពីលោកស្រី ថេរ៉េសា ម៉េយ៍ ដែលនឹងចាកចេញនៅថ្ងៃទី២៤ ខែកក្កដា។ ការងារសំខាន់របស់លោក ចនសុន គឺការចាកចេញពីសហភាពអឺរ៉ុប ដែលសព្វថ្ងៃនៅជាប់គាំងមិនទៅមុខ ខណៈដែលកាលបរិច្ឆេទចាកចេញចុងក្រោយកាន់តែខិតជិតហើយនោះ។
ជាប់ឆ្នោតជាប្រធានបក្សកាន់អំណាច លោក បូរីស ចនសុន អតីតអភិបាលក្រុងឡុងដ៍ នឹងក្លាយជានាយករដ្ឋមន្ត្រីអង់គ្លេសដោយស្វ័យប្រវត្តិ។ លោក នឹងចូលកាន់តំណែងផ្លូវការនៅថ្ងៃទី២៤ ខែកក្កដានេះ បន្ទាប់ពីលោកស្រី ថេរ៉េសា ម៉េយ៍ ប្រគល់លិខិតលាលែងពីតំណែងថ្វាយមហាក្សត្រីយ៍ Elizabeth ទីពីរ។ សារអបអរសាទរ និងសារព្រមានបានធ្លាក់មកជាបន្តបន្ទាប់ក្រោយលោក ចនសុន ត្រូវបានប្រកាសជានាយករដ្ឋមន្ត្រីជាប់ឆ្នោត។
លោក ចនសុន ទទួលបានសំឡេងច្រើនជាងគូប្រជែង គឺប្រមុខការទូតអង់គ្លេសសព្វថ្ងៃ ជេរេមី ហាន់ ក្នុងការបោះឆ្នោតដោយសមាជិកបក្សអភិរក្សចំនួន១៦ម៉ឺននាក់មកពីទូទាំងចក្រភពអង់គ្លេស។ រឿងធំទីមួយដែលរង់ចាំលោកនាយករដ្ឋមន្ត្រីថ្មី គឺការដើរចេញពីសហភាពអឺរ៉ុប (Brexit) ។ លោក ចនសុន ដែលដឹកនាំយុទ្ធនាការចាកចេញពីក្នុងពេលធ្វើប្រជាមតិឆ្នាំ២០១៦ នោះ មានជំហរដាច់ខាតក្នុងរឿងចាកចេញនេះ ទោះមាន ឬគ្មានកិច្ចព្រមព្រៀងក្ដី។
ថ្លែងទៅកាន់សមាជិកក្រោយទទួលបានជ័យជម្នះ លោក ចនសុន និយាយថា អង់គ្លេសនឹងសម្រេចឲ្យបាន Brexit នៅត្រឹមថ្ងៃទី៣១ ខែតុលា ដែលជាកាលបរិច្ឆេទចុងក្រោយ។ សព្វថ្ងៃ អង់គ្លេស មានកិច្ចព្រមព្រៀងជាមួយអឺរ៉ុបហើយលើការចាកចេញនេះ ដែលជាសមិទ្ធផលរបស់លោកស្រី ម៉េយ៍ ប៉ុន្តែឆ្លងមិនផុតរដ្ឋសភាដល់ទៅបីដងឯណោះ។ អឺរ៉ុបវិញក៏និយាយច្រើនដងហើយថា ខ្លួននឹងមិនចរចាជាមួយអង់គ្លេសទៀតទេ។
និយាយរឿងជ័យជម្នះរបស់លោក ចនសុន វិញ ប្រធានាធិបតីអាមេរិក ដូណាល់ ត្រាំ ជាមនុស្សដំបូងគេដែលបានអបអរនាយករដ្ឋមន្ត្រីថ្មីរូបនេះ។ លោក ត្រាំ បានសរសេរលើ Twitter ថា៖ «សូមសាទរលោក បូរីស ចនសុន ដែលក្លាយជានាយករដ្ឋមន្ត្រីនៃចក្រភពអង់គ្លេស។ លោកនឹងក្លាយជាមេដឹកនាំដ៏អាស្ចារ្យ។» ប្រធានាធិបតីបារាំង អេម៉ានុយអែល ម៉ាក្រុង វិញ ក៏ប្រកាសថា នឹងធ្វើការជាមួយលោក ចនសុន ឲ្យជិតស្និទ្ធលើបញ្ហាអឺរ៉ុប និងអ៊ីរ៉ង់ជាដើម។
ទន្ទឹមនឹងសារអបអរ លោក ចនសុន ក៏ទទួលបានសារព្រមាន និងសារប្រាប់ឲ្យប្រុងប្រយ័ត្នដែរ។ អនាគតប្រធានគណៈកម្មការអឺរ៉ុប អឺស៊ុឡា វ៉ុន ដឺ លៃអេន ដែលបានសាទរនាយករដ្ឋមន្ត្រីជាប់ឆ្នោតអង់គ្លេសដែរនោះ លើកឡើងថា នៅមានបញ្ហាជាច្រើនដែលត្រូវដោះស្រាយរួមគ្នា ហើយពេលវេលាលំបាកកំពុងឈរខាងមុខ។ អ៊ីរ៉ង់ដែលកំពុងទាស់គ្នាជាមួយអង់គ្លេសនោះ ក៏អបអរការជាប់ឆ្នោតរបស់លោក ចនសុន ដែរ។
រដ្ឋមន្ត្រីការបរទេសអ៊ីរ៉ង់ មហាម៉ាត់ ចាវ៉ាដ ហ្សារីហ្វ បានបង្ហោះសារលើ Twitter អបអរលោក ចនសុន ដែលជាអតីតសមភាគីរបស់លោក។ យ៉ាងណាមិញ លោកក៏ឆ្លៀតផ្ញើសារព្រមានដែរថា អ៊ីរ៉ង់មិនចង់បង្កើតការប្រឈមមុខអ្វីទេ ប៉ុន្តែយើងនឹងការពារដែនទឹករបស់យើង។ មន្ត្រីអ៊ីរ៉ង់រូបនេះ ចង់សំដៅដល់ការឃាត់កប៉ាល់ដោយទង់អង់គ្លេសនៅច្រកសមុទ្រ Hormuz ដែលបង្កទៅជាការប្រទាំងប្រទើសយ៉ាងខ្លាំង៕
Tag:
អង់គ្លេស
បូរីស ចនសុន
ថេរ៉េសា ម៉េយ៍
© រក្សាសិទ្ធិដោយ thmeythmey.com
