ជាតិ
នយោបាយជាតិ
កម្ពុជា សុំឲ្យជប៉ុន បន្តជួយលើផ្នែក «កងរក្សាសន្តិភាព» ជំនួបរវាងរដ្ឋមន្រ្តីការពារជាតិកម្ពុជា និងអនុរដ្ឋមន្ត្រីការពារជាតិជប៉ុន (រូបពីក្រសួង)
× កម្ពុជា ស្នើឲ្យជប៉ុន បន្តជួយគាំទ្រកងកម្លាំងរក្សាសន្តិភាពនៃកងយោធពលខេមរភូមិន្ទ។ សម្តេច ទៀ បាញ់ រដ្ឋមន្ត្រីក្រសួងការពាជាតិកម្ពុជា លើកសំណើនេះ ក្នុងជំនួបជាមួយលោក Nishida Yasunori អនុរដ្ឋមន្ត្រីការពារជាតិជប៉ុន កាលពីថ្ងៃទី២២ ខែកក្កដា ឆ្នាំ២០១៩។
យោងតាមការចុះផ្សាយរបស់ក្រសួងការពារជាតិកម្ពុជា សម្តេច ទៀ បាញ់ ចាត់ទុកវត្តមានរបស់លោក Nishida ថា បានផ្តល់ភាពកក់ក្តៅដល់កម្ពុជា ជាពិសេសដល់កងកម្លាំងរក្សាសន្តិភាពនៃកងយោធពលខេមរភូមិន្ទ ព្រមទាំងការពង្រឹងឲ្យកាន់តែល្អប្រសើរឡើងថែមទៀតនូវចំណងមិត្តភាព និងកិច្ចសហប្រតិបត្តិការនៃប្រទេសទាំងពីរ។ សម្តេច បានអរគុណជប៉ុន ដែលជួយឧបត្ថម្ភកម្ពុជាជារៀងរហូតមក ក្នុងការស្វែងរកសុខសន្តិភាព ការកសាង និងការអភិវឌ្ឍប្រទេស ជាពិសេសការជួយបណ្តុះបណ្តាលធនធានមនុស្សនៃកងយោធពលខេមរភូមិន្ទផ្នែកកងរក្សាសន្តិភាព។
នាយឧត្តមសេនីយ៍ ឈុំ សុជាត អ្នកនាមពាក្យក្រសួងការពារជាតិ ប្រាប់សារព័ត៌មានថ្មីៗតាមទូរសព្ទថា ជំនួយដែលកម្ពុជាស្នើឲ្យជប៉ុន ជួយលើផ្នែកកងកម្លាំងរក្សាសន្តិភាពនេះ មានដូចជា ការហ្វឹកហ្វឺន និង និងការបណ្តុះបណ្តាល ជាដើម។ លោក បញ្ជាក់ដូច្នេះថា៖«គេ មានបច្ចេកទេសជាងយើង»។
នៅចំពោះមុខលោក Nishida សម្តេច ទៀ បាញ់ លើកឡើងថា កម្ពុជាធ្លាប់ទទួលកងកម្លាំងកងរក្សាសន្តិភាពនៃអង្គការសហប្រជាជាតិ មកជួយស្វែងរកសុខសន្តិភាពនៅកម្ពុជា តែបច្ចុប្បន្នកម្ពុជា បានបញ្ជូនកងកម្លាំងជាច្រើនទៅចូលរួមជាមួយអង្គការសហប្រជាជាតិ ដើម្បីជួយស្វែងរកសន្តិភាព នៅបណ្តាប្រទេសនានាវិញ។ រដ្ឋមន្ត្រីការពារជាតិ សង្កត់ធ្ងន់ដូច្នេះថា៖«កម្ពុជាធ្លាប់ឆ្លងសង្គ្រាម ដូចនេះកម្ពុជាក៏ចង់បាន និងចង់ឃើញបណ្តាប្រទេសដែលមានជម្លោះដទៃទៀតមានសុខសន្តិភាពផងដែរ»។
ក្នុងជំនួបនោះ លោក Nishida តបនឹងសម្តេច ទៀ បាញ់ ថា ជប៉ុន និងកម្ពុជា មានចំណងមិត្តភាពដ៏ល្អនឹងគ្នា ជាពិសេសនៅក្នុងទស្សវត្សរ៍៩០ ដែលជប៉ុនបានបញ្ជូនកងកម្លាំងចូលរួមរក្សាសន្តិភាពជាមួយកងកម្លាំងរបស់អង្គការសហប្រជាជាតិ នៅកម្ពុជា។ លោក បន្តថា កន្លងមក វិស័យការពារជាតិរវាងប្រទេសទាំងពីរ មានកិច្ចសហប្រតិបតិការល្អ ដូចជា ការចូលចតនាវាជប៉ុននៅកម្ពុជា ការផ្លាស់ប្តូរប្រតិភូ និងការបណ្តុះបណ្តាធនធានមនុស្ស ជាដើម។
អនុរដ្ឋមន្ត្រីការពារជាតិជប៉ុនរូបនេះ បញ្ជាក់ថា បច្ចុប្បន្ន ជប៉ុន មានដៃគូជាត្រីកោណរវាងជប៉ុន អង្គការសហប្រជាជាតិ និងជាមួយបណ្តាប្រទេសអាស៊ាន នៅលើវិស័យកងរក្សាសន្តិភាព ហើយជប៉ុន នឹងបន្តកិច្ចសហប្រតិបត្តិការជាមួយកម្ពុជាតទៅទៀតនៅក្នុងវិស័យអប់រំ និងបណ្តុះបណ្តាលធនធានមនុស្ស៕
Tag:
កម្ពុជា-ជប៉ុន
យោធា
© រក្សាសិទ្ធិដោយ thmeythmey.com