អន្តរជាតិ
ក្រសួងការពារជាតិចិន៖ បើមានសំណើពីហុងកុង កងទ័ពចិនអាចចេញជួយដោះស្រាយបាតុកម្ម
កងទ័ពរំដោះប្រជាជនចិននៅក្នុងបន្ទាយហុងកុង។
×![]()
ដោយ: តន ចាន់រិទ្ធារ៉ា
យោធាចិន នៅថ្ងៃទី២៤ ខែកក្កដា អះអាងថា កងទ័ពរំដោះប្រជាជនចិន (PLA) អាចត្រូវពង្រាយដើម្បីរក្សាសណ្ដាប់ធ្នាប់សង្គមក្នុងទីក្រុងហុងកុង បើមានសំណើពីរដ្ឋាភិបាលនៃតំបន់រដ្ឋបាលពិសេសមួយនេះ។ ការលើកឡើងនេះ ធ្វើឡើងក្រោយពេលដែលអំពើហិង្សាបានផ្ទុះឡើងជាបន្តបន្ទាប់អំឡុងពេលបាតុកម្មនៅហុងកុងនៅរយៈពេលចុងក្រោយនេះ ដែលឈានដល់ការអុកឡុកអាគារការិយាល័យតំណាងរដ្ឋាភិបាលប៉េកាំងក្នុងទីក្រុងនេះទៀតផង។
«យើងតាមដានយ៉ាងដិតដល់ការវិវត្តនៅហុងកុង ពិសេសការវាយប្រហារដោយហិង្សាលើការិយាល័យតំណាងរដ្ឋាភិបាលមជ្ឈិមដោយក្រុមជ្រុលនិយមនៅថ្ងៃទី២១ ខែកក្កដា។» នេះជាការលើកឡើងរបស់លោកវរសេនីយ៍ Wu Qian អ្នកនាំពាក្យក្រសួងការពារជាតិចិននៅថ្ងៃទី២៤ ខែកក្កដា ដែលចាត់ទុកសកម្មភាពរបស់បាតុករជ្រុលនិយមនេះ ជាការតតាំងដោយផ្ទាល់នឹងអំណាចរដ្ឋាភិបាលមជ្ឈិម និងគោលនយោបាយ «ប្រទេសមួយ ប្រព័ន្ធពីរ»។
នៅយប់ថ្ងៃទី២១ ខែកក្កដា បាតុករវ័យក្មេងជាច្រើនដែលមិនទាន់ចែកផ្លូវក្រោយការរំសាយបាតុកម្មអហិង្សានោះ បានចូលអុកឡុកបរិវេណខាងមុខអាគារការិយាល័យតំណាងក្រុងប៉េកាំង ដោយខ្លះគប់ពងដាក់អាគារ ខ្លះទៀតគូសវាសរបង ហើយកាន់តែធ្ងន់ធ្ងរនោះ រូបសញ្ញាជាតិរបស់ចិន ក៏ត្រូវបានបាតុករយកថ្នាំពណ៌ខ្មៅបាញ់ពីលើទៅទៀត។ ទង្វើនេះ ត្រូវបានប៉េកាំងរិះគន់យ៉ាងខ្លាំង និងចាត់ទុកជាការមាក់ងាយប្រជាជនដទៃទៀត។
មកទល់ពេល ប៉ូលិសហុងកុង ជាអ្នកទទួលខុសត្រូវលើការរក្សាសណ្ដាប់ធ្នាប់ក្នុងទីក្រុង និងនៅពេលមានរៀបចំធ្វើបាតុកម្មនានា។ ប៉ុន្តែទំហំនៃអ្នកចូលរួមដែលពេលខ្លះហក់ដល់ខ្ទង់លាននាក់នោះ គឺជាបញ្ហាប្រឈមមួយសម្រាប់អាជ្ញាធរហុងកុង។ ត្រង់ចំណុចនេះ អ្នកសារព័ត៌មានបានសួរលោក Wu Qian អំឡុងការប្រកាសសៀវភៅសការពារជាតិ ថា ក្រសួងការពារជាតិចិន នឹងដោះស្រាយបញ្ហានៅហុងកុង និងក្រុមហ៊ុនមាននិន្នាការឯករាជ្យដោយរបៀបណា។
តបនឹងសំណួរនេះ អ្នកនាំពាក្យខាងលើ ចង្អុលទៅមាត្រា១៤ នៃច្បាប់ស្ដីពីការតាំងទ័ពនៅហុងកុង។ ច្បាប់នេះ ចូលជាធរមាននៅថ្ងៃទី១ ខែកក្កដា ឆ្នាំ១៩៩៧ ពេលអង់គ្លេសផ្ទេរហុងកុងឲ្យចិន។ មាត្រា១៤ ចែងថា រដ្ឋាភិបាលហុងកុង ដោយយោងលើច្បាប់មូលដ្ឋានរបស់ហុងកុង អាចស្នើសុំការជំនួយពីរដ្ឋាភិបាលមជ្ឈិមតាមរយៈការបញ្ចេញកងទ័ពរំដោះប្រជាជនចិនឲ្យជួយរក្សាសណ្ដាប់ធ្នាប់សាធារណៈ និងគ្រោះធម្មជាតិ។
ក្នុងករណីខាងលើ បើសំណើរបស់រដ្ឋបាលតំបន់ស្វយ័តមួយនេះ ត្រូវបានយល់ព្រម នោះកងទ័ពចិននៅហុងកុង អាចចេញជួយក្រោមលក្ខខណ្ឌដូចខាងលើ ហើយពេលចប់ភារកិច្ច ត្រូវត្រឡប់ចូលបន្ទាយវិញភ្លាម។ នេះ ជារឿងកម្រមួយដែលក្រុងប៉េកាំងលើកឡើងពីលទ្ធភាពដែលកងទ័ពចិនអាចចេញពីបន្ទាយដើម្បីធ្វើការអ្វីមួយ ខណៈជាប្រពៃណី យោធាចិនដែលប្រចាំការនៅបន្ទាយហុងកុង មិនលូកលាន់កិច្ចការហុងកុងអ្វីឡើយ៕
Tag:
ចិន
ហុងកុង
© រក្សាសិទ្ធិដោយ thmeythmey.com
