អន្តរជាតិ
ស្រីលង្កាប្រទះឃើញបំណែកសពមនុស្សក្នុងកុងតឺន័រសំរាមពីអង់គ្លេស ប្រភពរូប៖ AFP
× រដ្ឋាភិបាលចក្រភពអង់គ្លេស បានចាប់ផ្តើមបើកការស៊ើបអង្កេតភ្លាមៗ ក្រោយអាជ្ញាធរស្រីលង្កាអះអាងថា ពួកគេ នឹងបញ្ជូនត្រឡប់ទៅវិញនូវកុងតឺន័រជាង១០០ទូ ព្រោះរកឃើញបំណែកសាកសពមនុស្សក្នុងនោះ។
អាជ្ញាធរស្រីលង្កា បានរកឃើញរឿងដ៏រន្ធត់មួយ ខណៈពួកគេចុះត្រួតពិនិត្យក្លិនស្អុយ ដែលភាយចេញពីកុងតឺន័រ ១១១ទូ ដែលបានទុកចោលនៅកំពង់ផែក្រុង កូឡុំបូ កាលពីជាង២ឆ្នាំមុន។ នៅក្នុងទូកុងទឺន័រនោះ មន្ត្រីគយស្រីលង្ការ បានប្រទះឃើញ សារធាតុដែលពួកគេចាត់ទុកថា «គ្រោះថ្នាក់បំផុត» លាយឡំក្នុងសំណល់ប្លាស្ទិក និងវេជ្ជសាស្ត្រ។
តាមការចុះផ្សាយរបស់ទីភ្នាក់ងារព័ត៌មាន AFP មន្ត្រីម្នាក់មកពីក្រសួងហិរញ្ញវត្ថុស្រីលង្កា ដែលទទួលខុសត្រូវនាយកដ្ឋានគយ បានលើកឡើងថា ខ្លួន នឹងលើកយកបញ្ហានេះទៅពិភាក្សាជាមួយអាជ្ញាធរអង់គ្លេស ក្រោយពីបញ្ជូនកុងទឺន័រផ្ទុកសំរាមគ្រោះថ្នាក់ ដោយពុំបានពិនិត្យឲ្យបានច្បាស់ជាមុន ។
ក្រោយទទួលដំណឹងនេះ ក្រសួងបរិស្ថានអង់គ្លេស នៅយប់ថ្ងៃទី ២៣ ខែកក្កដា បានបើកការស៊ើបអង្កេតភ្លាមៗលើរបាយការណ៍ដែលបានចុះផ្សាយថា បំណែកសាកសព និងគ្រឿងក្នុងមនុស្ស ត្រូវបានរកឃើញក្នុងកុងទឺន័រ ដែលមានប្រភពដើមពីចក្រភពអង់គ្លេស។ យ៉ាងណាមិញ អាជ្ញាធរអង់គ្លេស បន្ថែមថា ខ្លួននៅមិនទាន់ផ្តល់ដំណឹងទៅកាន់រដ្ឋាភិបាលស្រីលង្កានៅឡើយទេ ប៉ុន្តែកំពុងធ្វើការលើរឿងនេះ។
សូមបញ្ជាក់ថា ចំណាត់ការរបស់រដ្ឋាភិបាលស្រីលង្កា កើតឡើងខណៈឥណ្ឌូណេស៊ី និងហ្វីលីពីន ក៏បានប្រកាសឲ្យដឹកជញ្ជូនសំរាមបរទេស ទៅកាន់ប្រភពដើមវិញ។ តួយ៉ាង កាលពី២សប្តាហ៍មុន ឥណ្ឌូណេស៊ី បានប្រកាសបញ្ជូមសំរាម២១០តោន ត្រឡប់ទៅកាន់អូស្ត្រាលី ហើយកាណដាបានយល់ព្រមទទួលសំរាម ៦៩កុងទឺន័រ ដែលខ្លួនដឹកទៅកាន់ហ្វីលីពីន ចន្លោះឆ្នាំ២០១៣ និង ២០១៤៕
Tag:
ស្រីលង្កា
ចក្រភពអង់គ្លេស
សំរាម
© រក្សាសិទ្ធិដោយ thmeythmey.com