បណ្តាញសង្គមថ្មី ដែលមានទម្រង់ដូចនឹង Facebook ឈ្មោះថា Gapo ត្រូវបានដាក់ដំណើរការជាផ្លូវការ ក្នុងប្រទេសវៀតណាម នៅថ្ងៃអង្គារ ទី២៣ ខែកក្កដា ជាមួយទុនវិនិយោគ ២២លានដុល្លារ។ ការដាក់ដំណើរការនេះ ធ្វើឡើងក្រោយពីរដ្ឋាភិបាលកុម្មុយនីស្តវៀតណាម បានអំពាវនាវឲ្យបណ្តាក្រុមហ៊ុនបច្ចេកវិទ្យាក្នុងស្រុក បង្កើតបណ្តាញសង្គមថ្មី ដើម្បីជំនួស Facebook និង Google របស់ក្រុមហ៊ុនយក្សអាមេរិក។
ថ្លែងនៅក្នុងពិធីដាក់ដំណើរការកម្មវិធីនេះ លោក Ha Trung Kien នាយកប្រតិបត្តិក្រុមហ៊ុនបច្ចេកវិទ្យា G-Group បានបញ្ជាក់ឲ្យដឹងថា សហគ្រាស និងអ្នកប្រើប្រាស់វៀតណាម កំពុងពឹងផ្អែកខ្លាំងពេកលើបណ្តាញសង្គម Facebook ខណៈប្រទេសវៀតណាម ពុំមានបណ្តាញសង្គមច្រើនសម្រាប់ឲ្យពួកគេជ្រើសរើសប្រើប្រាស់។
តាមការចុះផ្សាយរបស់ទីភ្នាក់ងារព័ត៌មាន Reuters លោក Kien រំពឹងទុកថា បណ្តាញសង្គមថ្មី Gapo ដែលផលិតក្នុងប្រទេសវៀតណាមនេះ អាចមានអ្នកប្រើប្រាស់ដល់ទៅ ៣លាននាក់ ក្នុងឆ្នាំ២០១៩នេះ និង២០លាននាក់ ត្រឹមខែមករា ឆ្នាំ២០២១ ។
ស្រដៀងនឹង Facebook របស់អាមេរិកដែរនោះ កម្មវិធីទូរសព្ទ Gapo អនុញ្ញាតឲ្យអ្នកប្រើប្រាស់បង្កើត Profile ផ្ទាល់ខ្លួន, បង្ហោះវីដេអូ និងរូបភាព ព្រមទាំងចែករំលែកការបង្ហោះទាំងនោះទៅកាន់ «News Feed» ដែលដូចទៅនឹង Facebook ។ មិនត្រឹមតែប៉ុណ្ណោះ វាក៏មានមុខងារ Livestream ក៏ដូចជាចំណាយតាមអនឡាញ ឬប្រើប្រាស់សេវាកម្មសាធារណៈផ្សេងៗផងដែរ។
ការដាក់ដំណើរការបណ្តាញសង្គម Gapo ថ្មីនេះ ធ្វើឡើងក្រោយពីក្រសួងទូរគមនាគមន៍ និងព័ត៌មាន បានស្នើឲ្យមានការបង្កើតបណ្តាញសង្គមក្នុងស្រុក ខណៈវត្តមាននៃក្រុមហ៊ុនបរទេស កើនឡើងកាន់តែខ្លាំងក្នុងទីផ្សារវៀតណាម។ កន្លងទៅ បណ្តាញសង្គមមួយចំនួនរបស់វៀតណាម ត្រូវបានបង្កើតឡើង ដូចជា VietnamTa និង Hahalolo ប៉ុន្តែកម្មវិធីទាំងនេះ ពុំទទួលបានជោគជ័យឡើយ។
ទន្ទឹមនឹងគ្នានេះ ក្រុមហ៊ុនបច្ចេកវិទ្យាយក្សអាមេរិក ដូចជា Facebook និង YouTube កំពុងជួបប្រទះនឹងបញ្ហាប្រឈមមួយចំនួន ពាក់ព័ន្ធនឹងការបង់ពន្ធ និងសន្តិសុខព័ត៌មាន ខណៈកំពុងប្រតិបត្តិការក្នុងប្រទេសកុម្មុយនីស្តនេះ។
តាមរយៈរបាយការណ៍ស្រាវជ្រាវទីផ្សារមួយចំនួន Facebook និង YouTube គ្របដណ្តប់ស្ទើរ ៧០ភាគរយនៃប្រាក់ចំណូលការផ្សព្វផ្សាយពាណិជ្ជកម្ម ក្នុងឆ្នាំ២០១៨។ ហើយសារព័ត៌មានក្នុងស្រុកវៀតណាម ក្នុងឆ្នាំ២០១៨ ដដែល បានចុះផ្សាយថា ក្នុងចំណោមប្រជាជនវៀតណាមសរុប ៩៧លាននាក់ ជនជាតិវៀតណាមប្រមាណ ៤២លាននាក់ កំពុងប្រើប្រាស់ Facebook ជារៀងរាល់ថ្ងៃ។
ទោះបីជាបានធ្វើកំណែទម្រង់សេដ្ឋកិច្ច និងបើកចំហកាន់តែទូលាយសម្រាប់ការផ្លាស់ប្តូរសង្គម គណបក្សកុម្មុយនីស្តវៀតណាមដ៏មានឥទ្ធិពល នៅតែរឹតបន្តឹតខ្លាំងលើសេរីភាពប្រព័ន្ធផ្សព្វផ្សាយក្នុងប្រទេសស និងមិនសន្តោសប្រណីសោះឡើយចំពោះការបញ្ចេញមតិរិះគន់រដ្ឋាភិបាល។
សកម្មជន និងមនុស្សដែលមាននិន្នាការប្រឆាំងនឹងគោលនយោបាយរបស់បក្សកុម្មុយនីស្តវៀតណាមកាន់តែច្រើន ត្រូវបានឃាត់ខ្លួន ឬកាត់ទោស ក្នុងរយៈពេល១ឆ្នាំចុងក្រោយនេះ ដោយសារការបង្ហោះសារតាមប្រព័ន្ធអនឡាញ ដែលរដ្ឋាភិបាលវៀតណាម ចាត់ទុកថា «ប្រឆាំងរដ្ឋ»។
អង្គការ Amnesty អន្តរជាតិ បានបញ្ជាក់ក្នុងសេចក្តីថ្លែងកាណ៍កាលពីខែឧសភាថា ប្រមាណ ១០ភាគរយនៃអ្នកទោសចំនួន ១២៨នាក់ ដែលត្រូវបានចាប់ខ្លួនក្នុងប្រទេសវៀតណាមក្រោមបទចោទ បញ្ចេញមតិប្រឆាំង ត្រូវបានដាក់ពន្ធធនាគារ ដោយសារ ពួកគេ បានបង្ហោះមតិរិះគន់ប្រឆាំងរដ្ឋាភិបាលលើបណ្តាញសង្គម ដូចជា Facebook ជាដើម។
ម្យ៉ាងវិញទៀត វៀតណាម ក៏បានចាប់ផ្តើមដាក់សម្ពាធលើក្រុមហ៊ុនបរទេស ដូចជា Google និង Facebook ដោយអនុម័តច្បាប់សន្តិសុខអ៊ីនធឺណិតដ៏ចម្រូងចម្រាសមួយ ដែលបានចូលជាធរមាន កាលពីខែមករា ដើមឆ្នាំ២០១៩កន្លងទៅ។ ច្បាប់នេះ តម្រូវឲ្យក្រុមហ៊ុនបច្ចេកវិទ្យាបរទេសទាំងអស់ បង្កើតការិយាល័យក្នុងប្រទេសវៀតណាម និងរក្សាទិន្នន័យអ្នកប្រើប្រាស់នៅទីនោះតែម្តង៕