អន្តរជាតិ
ពលរដ្ឋ និងព្រះសង្ឃស្រីលង្កា ធ្វើបាតុកម្មមុខស្ថានទូតអង់គ្លេស ទាមទារឲ្យដឹកសំរាមទៅវិញ
ប្រភពរូប៖ BBC
×![]()
ត្រឹមមួយថ្ងៃប៉ុណ្ណោះ ក្រោយពីអាជ្ញាធរស្រីលង្កា បានប្រាប់ឲ្យចក្រភពអង់គ្លេសទទួលយកទៅវិញនូវកុងតឺន័រចំនួនជាង១០០ទូ ដែលផ្ទុកទៅដោយសំរាមគ្រោះថ្នាក់ បាតុកម្មទ្រង់ទ្រាយតូចមួយ បានផ្ទុះឡើងនៅមុខស្ថានតំណាងអង់គ្លេសប្រចាំស្រីលង្កា។
រូបភាព និងវីដេអូរបស់មន្ត្រីគយស្រីលង្កា កំពុងចុះត្រួតពិនិត្យកុងតឺន័រទាំង១១១ទូ នៅកំពង់ផែកូឡុំបូ ត្រូវបានអ្នកប្រើប្រាស់ Facebook នៅស្រីលង្កាចែករំលែកយ៉ាងសុសសាយ កាលពីថ្ងៃអង្គារទី២៣ កក្កដា។ ដោយសារកំហឹងនឹងរឿងនេះ នៅថ្ងៃទីពុធ ទី២៤ ខែកក្កដា សង្ឃ និងក្រុមអ្នកបរិស្ថានមួយក្រុមតូច បានធ្វើបាតុកម្មនៅក្រៅស្ថានទូតអង់គ្លេសប្រចាំទីក្រុងកូឡុំបូ។
«ស្រីលង្កា ពុំមែនជាធុងសំរាមរបស់អ្នកឡើយ», «ចក្រភពអង់គ្លេស យកសំរាមអ្នកទៅវិញ», «ចក្រភពអង់គ្លេស កំពុងបំពុលទិសដៅទេសចរណ៍ទីមួយរបស់ពិភពលោក»។ នេះជាអ្វីដែលក្រុមបាតុករស្រីលង្កាបានសរសេរដាក់លើបដាពេលឈរនៅមុខស្ថានទូតអង់គ្លេស។
តាមការចុះផ្សាយរបស់សារព័ត៌មាន BBC លោកស្រី Manjuri Sumitrarachi បាតុករម្នាក់ ដែលនាំទាំងគ្រួសារមកចូលរួមក្នុងបាតុកម្មនេះផងនោះ បាននិយាយថា៖ «ខ្ញុំ ធ្វើរឿងនេះ ដើម្បីការពារអនាគតប្រទេសខ្ញុំ និងកូនៗខ្ញុំ»។ លោកស្រី អះអាងទៀតថា៖ «ស្រីលង្កា ជាប្រទេសតតិយលោក ដែលមិនសូវអភិវឌ្ឍ ហើយបច្ចុប្បន្ន យើង កំពុងប្រឈមនឹងបញ្ហាជាច្រើនណាស់ទៅហើយ។ តើយើងអាចទទួលខុសត្រូវចំពោះសំរាមប្រទេសដទៃដោយរបៀបណា?»
នៅក្នុងទូកុងតឺន័រ ដែលបានទុកចោលនៅកំពង់ផែក្រុងកូឡុំបូ តាំងពីជាង២ឆ្នាំមុន មន្ត្រីគយស្រីលង្កា នៅថ្ងៃអង្គារទី ២៣ កក្កដា បានប្រទះឃើញ សារធាតុដែលពួកគេចាត់ទុកថាគ្រោះថ្នាក់បំផុត លាយឡំក្នុងសំណល់ប្លាស្ទិក និងវេជ្ជសាស្ត្រ។
ទាក់ទិននឹងបញ្ហានេះ លោក Avishka Sendanayake សកម្មជនបរិស្ថានស្រីលង្កាម្នាក់ ដែលចូលរួមក្នុងបាតុកម្មនេះ បានប្រាប់ BBC ថា៖ «យើងដឹងថា សំណល់ទាំងនេះ មានផ្ទុកសារធាតុគីមីខ្លះ។ តាមរយៈវីដេអូ យើងមើលឃើញ កាកសំណល់នោះ មានហូរទឹកចេញមកក្រៅទូកុងតឺន័រ»។ លោក បន្តថា លោកចង់ឲ្យរដ្ឋាភិបាលអង់គ្លេសទទួលខុសត្រូវចំពោះបញ្ហានេះ និងស្នើឲ្យរដ្ឋាភិបាលស្រីលង្កាបញ្ជូនសំរាមទាំង១១១ទូនោះត្រឡប់ទៅប្រភពដើមវិញ។
ទោះជាបែបនេះក្តី ភ្នាក់ងារបរិស្ថានអង់គ្លេស គូសបញ្ជាក់ថា ខ្លួន អាចទទួលយកសំណល់ទាំងអស់នេះវិញ ប្រសិនបើមានភស្តុតាងបញ្ជាក់ថា សំរាមនេះ ត្រូវបាននាំចេញដោយខុសច្បាប់ដោយផ្ទាល់ពីប្រទេសអង់គ្លេស។ ហើយចំណាត់ការ នឹងត្រូវដាក់ចេញពីសំណាក់រដ្ឋាភិបាលក្រុងឡុងដ៍ ប្រសិនបើបុគ្គល ឬក្រុមហ៊ុន ដែលបាននាំចេញសំរាមទាំងនោះ ពុំត្រូវបានអាជ្ញាធរស្គាល់អត្តសញ្ញាណ ឬបដិសេធក្នុងការនាំត្រឡប់មកប្រភពដើមវិញទេ៕
Tag:
ស្រីលង្កា
ចក្រភពអង់គ្លេស
សំរាម
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
