អន្តរជាតិ
កុមារីស៊ីរីអាយុ៥ឆ្នាំស្លាប់ ក្រោយព្យាយាមសង្គ្រោះប្អូនស្រីខ្លួនពីគំនរបាក់បែក Rihan (ឃើញតែសក់) ព្យាយាមទាញប្អូនខ្លួនពីគំនរបាក់បែក។ រូបថត Aljazeera
× កុមារីស៊ីរីវ័យ៥ឆ្នាំ ម្នាក់បានព្យាយាមសង្គ្រោះប្អូនស្រីរបស់ខ្លួនដែលជាប់ក្នុងគំនរនៃអគារបាក់បែក បន្ទាប់ពីមានការវាយប្រហារពីលើអាកាសនៅភាគខាងជើងនៃប្រទេសស៊ីរី។ នេះបើតាមការផ្សាយរបស់ Al Jazeera ជាមួយនឹងរូបថត និងសង្គ្រោះរបស់កុមារីរូបនោះ។
ឪពុករបស់កុមារី បានឈរស្រែកឲ្យគេជួយសង្គ្រោះកូនស្រីរបស់ខ្លួនក្រោមគំនរបាក់បែក នៅក្រុង Ariha ខេត្ត Idlib ភាគខាងជើងស៊ីរី ដែលរដ្ឋាភិបាលបានទម្លាក់កាលពីថ្ងៃពុធ កន្លងមកដើម្បីវាយដណ្តើមយកតំបន់នោះពីក្រុមឧទ្ទាម ជីហាតវិញ។
អ្នកជិតខាង និងក្រុមសង្គ្រោះបាននាំគ្នាទៅជួយដល់ក្រុមកុមារទាំងនោះ ប៉ុន្តែអគារបន្តបាក់ ហើយក្រុមក្មេងកាន់តែធ្លាក់ចូលយ៉ាងជ្រៅក្នុងគំនរបាក់បែក។ កុមារីអាយុ៥ឆ្នាំ Rihan បានព្យាយាមទាញអាវប្អូនស្រី Tuqa ដែលមានអាយុ៧ខែ។
Rihan បានស្លាប់នៅមន្ទីរពេទ្យដោយសារស្ថានភាពរបួសធ្ងន់ធ្ងរ រីឯប្អូនស្រីរបស់នាងស្ថិតក្រោមការព្យាបាលយ៉ាងយកចិត្តទុកដាក់បំផុត។ តាម BBC ឪពុករបស់កុមារីទាំងនោះ មានឈ្មោះ Amjad al-Abdullah រីឯម្តាយឈ្មោះ Asmaa Nagohl ដែលបានស្លាប់ផងដែរនៅគ្រោះថ្នាក់បាក់អាគារដោយការវាយប្រហារផ្លូវអាកាសនោះ។
បុរសដែលបានថតរូបអគារបាក់បែកនោះ ដំបូងឡើយមិនបានដឹងថា មានក្មេងស្រី និងម្នាក់ផ្សេងទៀតជាប់ក្នុងគំនរនោះទេ ប៉ុន្តែក្រោយឮសំឡេងឪពុក និងក្មេងស្រែក ទើបខ្លួនរត់ទៅជួយសង្គ្រោះកុមារីភ្លាមៗ។
ការទម្លាក់គ្រាប់បែករដ្ឋាភិបាលស៊ីរី ដែលមានជំនួយពីរុស្ស៊ីនោះ បានសម្លាប់មនុស្សយ៉ាងហោចណាស់១៥នាក់ និងរបួសជាច្រើននាក់ ជាពិសេសក្មេងៗ៕
© រក្សាសិទ្ធិដោយ thmeythmey.com