សម្តេច ហ៊ុន សែន ប្រាប់តំណាង UN ផ្នែកកសិកម្ម «ពីកង្វល់នៃការនាំចេញអង្ករ»

ជាតិ

សេដ្ឋកិច្ច

សម្តេច ហ៊ុន សែន ប្រាប់តំណាង UN ផ្នែកកសិកម្ម «ពីកង្វល់នៃការនាំចេញអង្ករ»

26, Jul 2019 , 3:34 pm

រូបភាព

ជំនួបរវាងនាយករដ្ឋមន្រ្តីកម្ពុជា និង ប្រធាន IFAD នៅវិមានសន្តិភាព នាថ្ងៃទី២៦ ខែកក្កដា ឆ្នាំ២០១៩

ដោយ: ថ្មីៗ

ក្នុងជំនួបជាមួយលោក Gilbert F. Houngbo ប្រធានមូលនិធិអន្តរជាតិសម្រាប់ការអភិវឌ្ឍវិស័យកសិកម្មនៃអង្គការសហប្រជាតិ (IFAD) សម្តេចនាយករដ្ឋមន្ត្រី ហ៊ុន សែន បានបង្ហាញក្តីកង្វល់និងការព្រួយបារម្ភពីរយ៉ាង ក្នុងវិស័យកសិកម្ម គឺផលិតកម្ម និងបរិមាណនៃការនាំចេញអង្ករ ទៅកាន់ទីផ្សារខាងក្រៅ។ ជំនួបនេះ ធ្វើឡើងនៅវិមានសន្តិភាព នាព្រឹកថ្ងៃទី២៦ ខែកក្កដា ឆ្នាំ២០១៩។

សម្តេចនាយករដ្ឋមន្ត្រី លើកឡើងថា កន្លងមក កម្ពុជា មានគម្រោងនាំអង្ករចេញឲ្យបាន១លានតោន ប៉ុន្តែជាក់ស្តែង ការនាំចេញបានតែ៥០ភាគរយប៉ុណ្ណោះ។ សំណេរលើទំព័រហ្វេសប៊ុករបស់សម្តេចនាយករដ្ឋមន្ត្រី បានសរសេរយ៉ាងដូច្នេះថា៖«ចំពោះការផលិតស្រូវ គឺមានការកើនឡើងតាមគោលដៅមែន ប៉ុន្តែការនាំចេញ គឺពុំទាន់បានទទួលជោគជ័យនៅឡើយទេ»។

ប្រមុខរដ្ឋាភិបាល អះអាងថា មូលហេតុ ដែលនាំឲ្យការនាំចេញស្រូវ-អង្ករ មិនទទួលបានជោគជ័យ គឺ ទី១ បណ្ដាប្រទេសក្នុងតំបន់អាស៊ាន ផលិតស្រូវ-អង្ករ ដើម្បីនាំចេញដែរ និងទី២ ការផលិតរបស់កម្ពុជា នៅមានតម្លៃខ្ពស់នៅឡើយ។ ប្រមុខរដ្ឋាភិបាល បានស្នើសុំឲ្យអង្គការ IFAD ជួយពិនិត្យ និងចែករំលែកបទពិសោធ ដើម្បីជួយកម្ពុជាក្នុងវិស័យកសិកម្ម។

មេដឹកនាំកម្ពុជា ក៏បារម្ភផងដែរ ពីការកើនឡើងនូវចំនួនប្រជាជន ដែលតម្រូវការលើទំហំដីសម្រាប់ធ្វើកសិកម្មកាន់តែច្រើនឡើង។ មេដឹកនាំកម្ពុជា បានប្រាប់ប្រធាន IFAD ថា កម្ពុជា កំពុងខិតខំធ្វើយ៉ាងណាឲ្យប្រជាកសិករ ដាំដុះនៅលើទីតាំងដី ដែលសមស្របនឹងដំណាំកសិកម្មនីមួយៗ ដែលអាចទទួលបានផលច្រើន និង ជំរុញការអនុវត្តប្រពលវប្បកម្ម ដើម្បីទទួលផលច្រើននៅលើផ្ទៃដីដែលមានស្រាប់ ដោយពុំចាំបាច់ពង្រីកផ្ទៃដីឡើយ។

ចំណែក ការប្រែប្រួលអាកាសធាតុ ក៏ជាកង្វល់មួយដែរ ព្រោះតំបន់មួយចំនួននៅកម្ពុជាគឺមានកម្តៅឡើងជាង៤២អង្សារហើយ ដែលអាចបំផ្លាញដំណាំស្រូវបាន។ ប្រមុខរដ្ឋាភិបាលកម្ពុជា ថ្លែងថា ការប្រែប្រួលអាកាសធាតុនេះ គឺតម្រូវឲ្យមានការសិក្សាស្រាវជ្រាវ ដើម្បីធ្វើយ៉ាងណាឲ្យមានពូជ ដែលអាចបន្សាំទៅនឹងការប្រែប្រួលអាកាសធាតុបាន។

ព័ត៌មានលើទំព័រហ្វេសប៊ុករបស់នាយករដ្ឋមន្ត្រី ពុំបានសរសេរពីសម្តីរបស់ លោក Gilbert ច្រើនឡើយ។ ប្រភពនេះ គ្រាន់តែបញ្ជាក់ថា លោក Gilbert បានសរសើរពីការរីកចម្រើនរបស់កម្ពុជា ហើយលោក បានបង្ហាញការគោរពចំពោះវីរភាពរបស់សម្តេច ហ៊ុន សែន។

មុនបញ្ចប់ទស្សនកិច្ច នៅថ្ងៃទី២៧ ខែកក្កដា លោក Gilbert និងក្រុមការងារ នឹងចុះទៅខេត្តកណ្ដាល ដើម្បីពិនិត្យមើលស្ថានភាពកសិកម្ម៕