អន្តរជាតិ
ប្រភពរូប៖ វេបសាយ Thaiger
×![]()
អ្នកជិះម៉ូតូ ដែលត្រូវសមត្ថកិច្ចចាប់បានពេលបើកបរលើផ្លូវថ្មើរជើងក្នុងរាជធានីបាងកក នៃប្រទេសថៃ នឹងប្រឈមនឹងការពិន័យ ២ពាន់បាត ឬស្មើនឹងប្រមាណ ៦៥ដុល្លារ ។ ការអនុវត្តបទបញ្ជានេះ នឹងត្រូវធ្វើឡើងចាប់ពីថ្ងៃទី១ ខែសីហាតទៅ។ 
នៅថ្ងៃទី ២៤ ខែកក្កដា លោកអភិបាលរងក្រុងបាងកក Sakoltee Phattiyakul គូសបញ្ជាក់ថា សាលាក្រុង បានសម្រេចចិត្តដំឡើងប្រាក់ពិន័យទ្វេដង ព្រោះថា អ្នកជិះម៉ូតូ នៅតែរឹងទទឹងបន្តប្រើប្រាស់ផ្លូវថ្មើរជើងដដែល ទោះបីជាមានការព្រមានជាច្រើនដងក៏ដោយក្តី។ តាមការចុះផ្សាយរបស់កាសែតបាងកកប៉ុស្តិ៍ ការលើកឡើងរបស់លោក បានធ្វើឡើងក្រោយពីជួបប្រជុំជាមួយមន្ត្រីជាន់ខ្ពស់មកពីនាយកដ្ឋានអនុវត្តច្បាប់នៃរដ្ឋបាលក្រុងបាងកក។
សាលាក្រុងបាងកក បានដាក់ចេញបញ្ជាឲ្យមន្ត្រីមូលដ្ឋានទាំងអស់ហាមឃាត់អ្នកជិះម៉ូតូប្រើប្រាស់ផ្លូវថ្មើរជើង និងបង្កើតមជ្ឈមណ្ឌលបង់ប្រាក់ពិន័យទៀតផង។ នេះជាការអះអាងរបស់លោកអភិបាលរងក្រុង Sakoltee ដោយសង្កត់ធ្ងន់ថា ការដាក់ពិន័យត្រឹម ១ពាន់បាត ឬស្មើនឹង ៣២,៣ដុល្លារ ទទួលបរាជ័យក្នុងការកាត់បន្ថយចំនួនអ្នកជិះម៉ូតូលើផ្លូវថ្មើរជើង។
ការដាក់ពិន័យថ្មីចំនួន ២ពាន់បាត នឹងត្រូវអនុវត្តចាប់ពីដើមខែសីហា តទៅ។ ទន្ទឹមនឹងគ្នានេះ នាយកដ្ឋានអនុវត្តច្បាប់ថៃ ក៏នឹងបង្កើតកម្មវិធីទូរសព្ទមួយសម្រាប់ត្រួតពិនិត្យតួលេខអ្នកជិះម៉ូតូដែលប្រើប្រាស់ផ្លូវថ្មើរជើងថែមទៀតផង។
សូមបញ្ជាក់ថា រយៈពេលមួយឆ្នាំចុងក្រោយនេះ អ្នកជិះម៉ូតូសរុបចំនួន ២០ ៦៥៩នាក់ ត្រូវបានចាប់ពាក់ព័ន្ធការបើកបរលើផ្លូវថ្មើរជើង។ ក្នុងនោះ មនុស្ស ៤១៩៧នាក់ ត្រូវបានអាជ្ញាធរព្រមាន និងដោះលែងទៅវិញ ចំណែក ១៤៨៧៩នាក់ទៀត នឹងប្រឈមមុខនឹងផ្លូវច្បាប់។ អ្នកបើកបរដែលនៅសេសសល់ចំនួន ១៧៨៤នាក់ កំពុងស្ថិតក្នុងដំណើរការផ្លូវច្បាប់។ កន្លងទៅ ប្រព័ន្ធផ្សព្វផ្សាយថៃ បានផ្សាយថា លុយពិន័យសរុបដែលប្រមូលបានមានចំនួន ៣៦,១ម៉ឺនដុល្លារ៕
Tag:
ថៃ
ម៉ូតូ
© រក្សាសិទ្ធិដោយ thmeythmey.com
