ជាតិ
បទយកការណ៍ / បទសម្ភាសន៍
យុទ្ធនាការសម្អាតបរិស្ថាននៅខេត្តសៀមរាប បំផុសស្មារតីអ្នករកស៊ីឲ្យមានទំនួលខុសត្រូវសង្គម
×![]()
សៀមរាប៖ សំរាមនៅតែជាបញ្ហាដ៏ស្មុគស្មាញសម្រាប់សង្គមជាតិ ដ្បិតថាការងារនេះត្រូវចាយពេល ទាំងចំណេះដឹង និងការចូលរួមពីប្រជាពលរដ្ឋគ្រប់រូប។ អ្នករកស៊ីក៏ដូចជាប្រជាពលរដ្ឋរស់នៅក្នុងសង្កាត់សាលាកំរើក ក្រុងសៀមរាបឯណេះវិញ ក៏បានធ្វើយុទ្ធនាការចូលរួមសម្អាតបរិស្ថាន ដោយការដើររើសសំរាមតាមតំបន់ជុំវិញ និងបានបង្កើតគម្រោងផែនទីក្នុងភូមិសាស្ដ្រដែលពួកគេរស់នៅ បំណងធ្វើយ៉ាងណារៀបចំសង្កាត់សាលាកំរើកនេះ ជាសង្កាត់គំរូគ្មានប្លាស្ទិក។ ពួកគេយល់ថា នៅពេលបរិស្ថានស្អាត នោះការរកស៊ីរបស់ពួកគេក៏មានភាពល្អប្រសើរ និងទាក់ទាញចំណាប់អារម្មណ៍ពីភ្ញៀវទេសចរកាន់តែច្រើនបន្ថែមទៀត។ យុទ្ធនាការនេះក៏ដើម្បីបំផុសស្មារតីឱ្យអ្នករកស៊ីទាំងអស់មានទំនួសខុសត្រូវផ្នែកសង្គមផងដែរ។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ
សំរាមបានក្លាយជាបញ្ហាដ៏ធំមួយសម្រាប់សង្គមជាតិ ដ្បិតវាមានផលប៉ះពាល់ខ្លាំងដល់ការរស់នៅរបស់ប្រជាពលរដ្ឋ ដូចជាបង្កជាជំងឺ និងបរិស្ថានមិនស្អាតជាដើម។ នរណាៗក៏មិនចូលចិត្តសំរាមដែរ ហើយសំរាមដែលប៉ពាល់ខ្លាំងក្លានោះ គឺជាប្រភេទប្លាស្ទិកតែម្ដង។ ក្រៅពីបង្កជាជំងឺ ប្លាស្ទិកនៅបង្កមហន្តរាយធ្ងន់ធ្ងរដល់ភពផែនដី ព្រោះថាវាត្រូវការប្រើពេលច្រើនរយឆ្នាំដើម្បីរលាយពីភពផែនដីនេះ។ សកម្មភាពជាច្រើនត្រូវបានបង្កើតឡើង ក្នុងបំណងតែម្យ៉ាងគឺដើម្បីបំបាត់និងកាត់បន្ថយការប្រើប្រាស់ប្លាស្ទិកនេះ។ មានអ្នកខ្លះ បានយកសំរាមប្លាស្ទិកទៅកែច្នៃជាវត្ថុប្រើប្រាស់ផ្សេងៗទៅទៀត។
ងៀកមកមើលអ្នករកស៊ីនិងអាជ្ញាធរនៅសង្កាត់សាលាកំរើក ក្រុងសៀមរាបឯណេះវិញ ក៏បានខិតខំរិះរកមធ្យោបាយគៀងគរការចូលរួម និងផ្សព្វផ្សាយពីការថែរក្សាបរិស្ថានខ្លាំងក្លាដែរ។ កម្មវិធីសម្អាតបរិស្ថានជាទ្រុងទ្រាយធំមួយ ត្រូវបានរៀបចំឡើងនៅចុងខែ កក្កដា ដោយមានអ្នកចូលរួមទាំងប្រជាពលរដ្ឋខ្មែរនិងបរទេស ដែលពួកគេបង្ហាញពីការយកចិត្តទុកដាក់ និងខ្វល់ពីសំរាមប្លាស្ទិកនេះ។
នៅព្រឹកព្រលឹមថ្ងៃទី២០ កក្កដា មនុស្សចំនួន៧៥០នាក់ បានជួបជុំគ្នានៅសង្កាត់សាលាកំរើក ដើម្បីបែងចែកគោលដៅសម្រាប់ចុះសម្អាតនិងប្រមូលសំរាមប្លាស្ទិកតាមដងវិថីជុំវិញសង្កាត់។ អ្នកដែលចូលរួមនៅពេលនោះ មានមកពីវិស័យសណ្ឋាគារ ភោជនីយដ្ឋាន សាលារៀន សិស្សានុសិស្ស ប្រជាពលរដ្ឋ រួមនិងមន្ត្រីរាជការក្នុងសង្កាត់សាលាកំរើកផងដែរ។
លោក ស៊ា សុផល អ្នកសម្របសម្រួលនិងដឹកនាំកម្មវិធីសម្អាតបរិស្ថានៅពេលនោះបានឱ្យដឹងថា កម្មវិធីសម្អាតបរិស្ថានគឺជាគំនិតផ្តួចផ្តើមដោយអ្នករកស៊ីសហការជាមួយអាជ្ញាធរ ដោយបង្កើតជាសហគមន៍មួយឈ្មោះថា Southside ក្នុងបំណងធ្វើយ៉ាងណាឱ្យសង្កាត់សាលាកំរើក ឬតំបន់ប៉ែកខាងត្បូងនៃក្រុងសៀមរាបនេះ ក្លាយជាសង្កាត់គំរូគ្មានសំរាមប្លាស្ទិក។ «យើងបានកំណត់ផែនទីយុទ្ធសាស្ដ្រគឺចាប់ពីរង្វង់មូលវត្តដំណាក់ជាគោលមកទិសខាងកើតតាមផ្លូវ៧មករា (វិទ្យាល័យអង្គរ) រហូទដល់ផ្លូវក្រវ៉ាត់ក្រុង និងពីរង្វង់មូលចុះមកមាត់ស្ទឹងទៅត្បូងដល់អាងក្រពើ វត្តស្វាយ និងរហូតដល់ផ្លូវក្រវ៉ាត់ក្រុង»។ នេះជាការលម្អិតពីផែនទីយុទ្ធសាស្ដ្រក្នុងយុទ្ធនាការសម្អាតបរិស្ថានរបស់ Southside ហើយលោក សុផល បញ្ជាក់ថា យុទ្ធនាការនេះចង់បង្កើតអត្ដសញ្ញាណថ្មីដល់ Southside ថាជាកន្លែងដែលគិតគូរពីបរិស្ថាន គិតគូរពីការទទួលខុសត្រូវសង្គម សុខភាព បរិស្ថាន និងព្យាយាមបំផុសចលនាឱ្យមានអ្នកស្រឡាញ់បរិស្ថាន និងស្រឡាញ់សុខភាព។
Southside មានសមាជិកចម្រុះវិស័យប្រមាណ២០ស្ថាប័ន ដែលក្នុងនោះមានក្នុងវិស័យសណ្ឋាគារ ភោជនីយដ្ឋាន សាលារៀន មានទាំងអាជីវករជាជនជាតិខ្មែរនិងបរទេស ដែលពួកគេយល់ពីការថែរក្សាបរិស្ថាន ការសម្អាត និងព្យាយាមកាត់បន្ថយការប្រើប្រាស់ប្លាស្ទិកនៅក្នុងអាជីវកម្មពួកគេ។ លោក ស៊ា សុផល ពន្យល់ថា នេះជាយុទ្ធនាការដំបូងដែលចាប់ផ្តើមនៅក្នុងសង្កាត់សាលាកំរើក ហើយជ្រើសរើសថង់ប្លាស្ទិកជាសំរាមដែលត្រូវប្រមូលវេចខ្ចប់ឱ្យបានត្រឹមត្រូវ។ លោកពន្យល់ថា៖« ការសម្អាតថ្ងៃនេះ សំដៅលើប្លាស្ទិកដោយសារកាកសំណល់សំរាមរាល់ថ្ងៃស្រុកយើងមានតែប្លាស្ទិកទេ ដោយសារវាស្របពេលយុទ្ធនាការពិភពលោកឈ្មោះថា Plastic Free July ដែលមានកំណើតនៅប្រទេសអូស្ដ្រាលីពីឆ្នាំ២០១១ និងមកដល់ស្រុកខ្មែរនៅឆ្នាំ២០១៥ ដែលមានចលនានេះក្នុងខែកក្កដា គេមិនប្រើប្លាស្ទិកទេ...»។
ជាមួយនឹងការគៀងគរការចូលរួមសកម្មភាពជាច្រើនក្នុងការងារបរិស្ថាននេះ លោក ស៊ា សុផល ដែលជាអ្នកបរិស្ថានមួយរូបយល់ឃើញថា កម្ពុជាមិនត្រូវការពេលយូរពេកទេដើម្បីឱ្យបរិស្ថានស្អាត ជារួមប្រជាជនកម្ពុជាត្រូវបានគេស្គាល់ថាជាពលរដ្ឋស្រឡាញ់ភាពស្អាត និងវប្បធម៌ អារ្យធម៌មួយដែលយល់ពីកិច្ចការនេះ ដូច្នេះមិនត្រូវការការអប់រំច្រើនទៀតទេ។ ពលរដ្ឋខ្មែរយល់ពីកិច្ចការនេះ និងត្រូវចូលរួមអនុវត្តច្បាប់បរិស្ថាន ក៏ដូចជារៀនអភិវឌ្ឍន៍ខ្លួនឯងដូចទៅនឹងប្រជាជននៅប្រទេសជិតខាងផងដែរ។ នេះជាការបញ្ជាក់បន្ថែមពីលោក ស៊ា សុផល។
អ្នកស្រី សារ៉ា ម្ចាស់សាលា ហេយ៍វ៉ិន ដែលបណ្ដុះបណ្ដាលផ្នែកចុងភៅនិងសេវាកម្មដល់យុវជនកម្ពុជាដោយឥតគិតថ្លៃ ក៏ជាសមាជិកនៃសហគមន៍ Southside ផងដែរ។ អ្នកស្រីបាននាំកូនសិស្សប្រមាណជិត១០នាក់ចូលរួមក្នុងយុទ្ធនាការរើសសំរាមនៅពេលនោះ គឺបន្ថែមពីសកម្មភាពប្រចាំថ្ងៃដែលអ្នកស្រីតែងដើររើសសំរាមតាមផ្លូវក្នុងតំបន់ដែលអ្នកស្រីរស់នៅនិងរកស៊ី។
សម្រាប់អ្នកស្រី សារ៉ា ការចូលរួមសម្អាតបរិស្ថានគឺជាការទទួលខុសត្រូវសង្គមមួយសម្រាប់អ្នករកស៊ីគ្រប់រូប។ ការទទួលខុសត្រូវដំបូងបំផុតដែលអ្នកស្រីចង់លើកឡើងនោះ គឺការកាត់បន្ថយការប្រើប្រាស់ប្លាស្ទិកក្នុងផ្ទះឬកន្លែងរកស៊ីរបស់ខ្លួន ដូចជាមិនប្រើបំពង់បឺតប្លាស្ទិក ស្បោង ឬប្រអប់ចានប្លាស្ទិកផ្សេងៗ ដោយជំនួសសម្ភារដែលអាចប្រើប្រាស់ឡើងវិញបាន។ល។
ចៅសង្កាត់សាលាកំរើក លោក សាម ឡន បានកោតសរសើរចំពោះការឈឺឆ្កាលរបស់អ្នករកស៊ីក៏ដូចជាពលរដ្ឋ ក្នុងកិច្ចការសម្អាតបរិស្ថាន។ លោកបន្ថែមថា កម្មវិធីសម្អាតបរិស្ថាននេះជាកម្មវិធីដ៏ល្អសម្រាប់ខេត្តសៀមរាបដែលជាខេត្តទេសចរណ៍ ពិសេសស្របពេលដែលមានការប្រកួតប្រណាំងសង្កាត់ស្អាតផង។ ដូច្នេះជាមួយនឹងកម្មវិធីសម្អាតបរិស្ថានរបស់ក្រុមអ្នករកស៊ីខាងលើនេះ លោកចៅសង្កាត់រំពឹងថា នឹងធ្វើឱ្យសង្កាត់សាលាកំរើកកាន់តែមានសោភណ្ឌភាព និងគ្មានសំរាមនៅទីសាធារណ ឬក្លាយជាសង្កាត់គំរូមួយនាពេលអនាគត លើភាពស្អាតនិងបៃតង។
ការផ្តួចផ្តើមគំនិតចង់ឱ្យសង្កាត់សាលាកំរើកក្លាយជាសង្កាត់គំរូគ្មានប្លាស្ទិក និងមានភាពបៃតង ច្បាស់ណាស់ត្រូវការពេលវេលានិងភាពអត់ធ្មត់ខ្ពស់។ សម្រាប់លោក ស៊ា សុផល ចង់ប្រែក្លាយសង្កាត់នេះមានភាពស្រស់បំព្រង និងក្លាយជាសង្កាត់មួយដែលចង់រស់នៅ។ បន្ថែមពីគោលបំណងនេះ នាពេលអនាគតអ្នកបរិស្ថានរូបនេះចង់ពង្រីកគម្រោងនេះទៅកាន់គោលដៅផ្សេងៗក្នុងក្រុងសៀមរាប និងគម្រោងសម្អាតតាមដងស្ទឹងសៀមរាបរហូតដល់បឹងទន្លេសាបផងដែរ៕
Tag:
សង្កាត់សាលាកំរើក
សំរាម
សង្កាត់គំរូ
ស៊ា សុផល
© រក្សាសិទ្ធិដោយ thmeythmey.com
