សង្គមអន្តរជាតិ
អន្តរជាតិ
ប្រទេសកោះខ្លះនៅសមុទ្រប៉ាស៊ីហ្វិកនឹងត្រូវលិចបាត់ បើកម្ពស់ទឹកសមុទ្រនៅបន្តកើន
× ការកើនឡើងនៃកម្តៅផែនដី បង្កឲ្យមានការរលាយផ្ទាំងទឹកកកនៅឯតំបន់ប៉ូល និងជំរុញឲ្យកម្ពស់ទឹកសមុទ្រកំពុងកើនឡើងជាលំដាប់។ វាជាគ្រោះថ្នាក់សម្រាប់បណ្តាប្រទេសកោះនានាក្នុងមហាសមុទ្រប៉ាស៊ីហ្វិក ដ្បិតវានឹងអាចលិចលង់ក្រោមទឹកទាំងស្រុង បើកម្រិតទឹកសមុទ្របន្តកើន។
អតីតប្រធានាធិបតីកោះ Marshall នៃមហាសមុទ្រប៉ាស៊ីហ្វិក លោក Christopher Loeak ធ្លាប់លើកឡើងក្នុងពេលកិច្ចប្រជុំជំនួបអន្តរជាតិអំពីការប្រែប្រួលអាកាសធាតុកាលពីឆ្នាំ២០១៣ថា កោះក្នុងសមុទ្រប៉ាស៊ីហ្វិកកំពុងតែប្រយុទ្ធនឹងការប្រែប្រួលបរិយាកាសដើម្បីបន្តជីវិតរស់នៅរបស់ខ្លួន។
បណ្តុំកោះ Marshall ដែលជាប្រជុំកោះមួយមានកោះតូចៗប្រមាណជា២៩កោះ មានទីតាំងភូមិសាស្ត្រនៅចន្លោះប្រទេសអូស្ត្រាលី និងកោះហាវ៉ៃ របស់សហរដ្ឋអាមេរិក។ ប្រជុំកោះមួយនេះមានកម្ពស់ជាមធ្យមប្រមាណតែពីរម៉ែត្រប៉ុណ្ណោះពីនីវ៉ូទឹកសមុទ្រ ដែលធ្វើឲ្យវាអាចរងនឹងគ្រោះថ្នាក់បានយ៉ាងងាយ។
នៅមានកោះជាច្រើនទៀត ដែលជារដ្ឋតូចៗនៅតាមមហាសមុទ្រប៉ាស៊ីហ្វិក ដែលមានដូចជាកោះ Solomons កោះ Tuvalu និងកោះ Carteret ជាដើមបានជួបប្រទះគ្រោះមហន្តរាយធម្មជាតិទាំងនេះ។ ការបាក់ច្រាំង កម្ពស់ទឹកជោរខ្ពស់ និងទឹកជំនន់ព្យុះភ្លៀង កំពុងតែជាបញ្ហាមួយចំនួនដែលប្រទេសទាំងនោះបានជួបប្រទះ។
អតីតប្រធានាធិបតីនៃកោះ Kiribati លោក Anote Tong ធ្លាប់ព្យាករកន្លងមកថា ក្នុងរយៈពេលជិត៦០ឆ្នាំទៀត ប្រទេសកោះដ៏តូចនៃមហាសមុទ្រប៉ាស៊ីហ្វិក នឹងកាន់តែលំបាកខ្លាំងក្នុងការទ្រទ្រង់ជីវិតប្រជាជនឲ្យរស់នៅបានស្រួល។ Kiribati បានគ្រោងទិញដីកោះពីប្រទេសជិតខាង ក្នុងនោះមានដូចជាកោះ ហ្វីជី ដើម្បីប្រើប្រាស់ដីសម្រាប់ដាំដំណាំ និងសម្រាប់ពលរដ្ឋរស់នៅក្នុងពេលអនាគត។
ប្រទេសកោះតូចៗទាំងនោះបានទាមទារឲ្យមានការជួយគិតគូរពីសំណាក់ប្រទេសមានឧស្សាហកម្មឈានមុខដែលបញ្ចេញឧស្ម័នផ្ទះកញ្ចក់ខ្លាំងទៅបរិយាកាស មានដូចជាអាមេរិក និងចិន ក្នុងការជួយកាត់បន្ថយការបំភាយផ្សែងពុលរបស់ខ្លួន ទៅកាន់បរិយាកាស។ តិចជាង០.១ភាគរយនៃការបំភាយឧស្ម័នផ្ទះកញ្ចក់ ត្រូវបានបញ្ចេញដោយក្រុមកោះទាំងនោះ។ ប្រទេសកោះទាំងនោះ ដែលមានដូចជា Marshall និង Tuvalu បានរិះរកដំណោះស្រាយទៅរកការប្រើប្រាស់ថាមពលបៃតង មានដូចជាថាមពលពន្លឺព្រះអាទិត្យ ឬការប្រើប្រាស់ជីវឥន្ធនៈជាដើម៕
© រក្សាសិទ្ធិដោយ thmeythmey.com