អន្តរជាតិ
នយោបាយអន្តរជាតិ
ត្រាំ ថា កូរ៉េខាងជើងបាញ់ផ្លោងមីស៊ីលគ្មានគោលបំណងគំរាមអាមេរិកឡើយ
× ប្រធានាធិបតីអាមេរិក លោក ដូណាល់ ត្រាំ បានអះអាងថាការបាញ់សាកល្បងមីស៊ីរយៈចម្ងាយខ្លីរបស់កូរ៉េខាងជើងមិនប៉ះពាល់ដល់អាមេរិក ហើយឥរិយាបថនេះក៏មិនបង្ហាញពីគោលដៅប្រឆាំងអាមេរិករបស់កូរ៉េខាងជើងដែរ។
មួយថ្ងៃបន្ទាប់ពីក្រុងព្យុងយ៉ាងបាញ់មីស៊ីលរយៈចម្ងាយឆ្ងាយពីរគ្រាប់នៅព្រឹកថ្ងៃព្រហស្បតិ៍ ប្រមុខរដ្ឋអាមេរិក លោក ដូណាល់ ត្រាំ បានចេញមុខសម្រួលស្ថានការណ៍ដោយអះអាងពេញមាត់ថា ឥរិយាបថថ្មីរបស់កូរ៉េខាងជើង គ្មានអ្វីត្រូវបារម្ភទេ។
បើតាមទីភ្នាក់ងារព័ត៌មាន AFP លោក ត្រាំ បានកត់សម្គាល់ថា ការបាញ់មីស៊ីលជាថ្មីនេះជារឿងធម្មតា ហើយវាក៏មានគោលដៅព្រមានតែកូរ៉េខាងត្បូងប៉ុណ្ណោះដោយសារភាគីមានបញ្ហាជម្លោះផ្ទាល់។ លោក ត្រាំ ចង់សម្តៅលើសង្គ្រាមកូរ៉េឆ្នាំ ១៩៥០ដល់ឆ្នាំ ១៩៥៣ ដែលអាមេរិកកាលនោះក៏ធ្វើជាខ្នងបង្អែកកូរ៉េខាងត្បូងដែរ។
«វាមិនមែនជាសញ្ញាព្រមានណាមួយចំពោះអាមេរិកឡើយ។ ប្រទេសទាំងពីរនេះមានជម្លោះផ្ទាល់ខ្លួន»។ នេះជាសម្តីរបស់មេដឹកនាំអាមេរិកដំបូងគេដែលឈានជើងឆ្លងដែនចូលទឹកដីកូរ៉េខាងជើងលោក ត្រាំ នៅចំពោះមុខអ្នកកាសែតនៅថ្ងៃសុក្រ។
លោក ត្រាំ ក៏បានរៀបរាប់ឡើងវិញផងដែរពីទំនាក់ទំនងដ៏ល្អប្រសើររវាងលោក និងមេដឹកនាំកំពូលកូរ៉េខាងជើងលោក គីម ជុងអ៊ុន នាពេលបច្ចុប្បន្ននេះ ក្រោយបានជួបពិភាក្សាគ្នាផ្ទាល់បីដងមកហើយរាប់ចាប់ពីឆ្នាំ ២០១៨មកនោះ។
តាមពិតទៅ បើតាមការចុះផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA លោក គីម ជុងអ៊ុង ជាអ្នកដឹកនាំ និងរៀបចំការបាញ់មីស៊ីលនេះដោយផ្ទាល់ ដោយលោកចាត់ទុកថា ការបង្ហាញអានុភាពយោធានេះ ជាសារព្រមានយោធាកូរ៉េខាងត្បូងដែលស្រឡាញ់សង្គ្រាមតាមរយៈការពង្រាយអាវុធដ៏ទំនើបនៅកូរ៉េខាងត្បូង និងរៀបចំលំហាត់យោធា ទោះខ្លួនបានព្រមានច្រើនលើកហើយក្ដី។
ត្រឡប់មកវិញ វាទំនងដូចអ្វីដែលលោក ត្រាំ និយាយដែរ។ មេដឹកនាំកូរ៉េខាងជើងដាក់គោលដៅប្រឆាំងតែកូរ៉េខាងត្បូង ហើយមិនបានរិះគន់អាមេរិកសូម្បីតែមួយម៉ាត់។ វាអាចថា មេដឹកនាំកូរ៉េខាងជើងចង់បន្តរក្សាទំនាក់ទំនងល្អជាមួយមេដឹកនាំអាមេរិកផង ហើយចង់ឲ្យមានការបន្តការចរចាឡើងវិញដើម្បីពន្លឿនការដោះស្រាយបញ្ហានុយក្លេអ៊ែរឧបទ្វីបកូរ៉េដែរ៕
Tag:
អាមេរិក
កូរ៉េខាងជើង
មីស៊ីល
© រក្សាសិទ្ធិដោយ thmeythmey.com