អន្តរជាតិ
ចិន ធ្វើសមយុទ្ធយោធាក្នុងដែនសមុទ្រពីរក្បែរតៃវ៉ាន់ ក្រោយព្រមានផ្ទុះសង្គ្រាម ប្រធានាធិបតីចិន ស៊ី ជិនភីង នាពិធីត្រួតពិនិត្យក្បួនដង្ហែជើងទឹកនៅសមុទ្រចិនខាងត្បូងនាពេលកន្លងមក។ រូបភាព Xinhua
× យោធាចិន នៅថ្ងៃទី២៩ ខែកក្កដានេះ កំពុងធ្វើសមយុទ្ធយោធាក្នុងដែនសមុទ្រចំនួនពីរស្ថិតក្បែរកោះតៃវ៉ាន់។ សមយុទ្ធនេះ ធ្វើឡើងបន្ទាប់ពីក្រសួងការពារជាតិចិនកាលពីសប្ដាហ៍មុនព្រមានពីការផ្ទុះសង្គ្រាម បើតៃវ៉ាន់ងាកទៅរកការផ្ដាច់ខ្លួននោះ។ លំហាត់របស់កងទ័ពរំដោះប្រជាជនចិននេះ ក៏កើតឡើងក្រោយអាមេរិកបញ្ជូននាវាចម្បាំងមួយគ្រឿងឲ្យបើកកាត់ច្រកសមុទ្រតៃវ៉ាន់ដែលខណ្ឌចែកទឹកដីចិនទាំងពីរនេះផងដែរ។
ក្នុងសេចក្ដីជូនដំណឹងរបស់រដ្ឋបាលសន្តិសុខលំហសមុទ្រចិននៅថ្ងៃទី២៨ និងទី២៩ ខែកក្កដា អាជ្ញាធរចិនបានប្រាប់កប៉ាល់នានា និងយន្តហោះផងនោះឲ្យធ្វើដំណើរ ឬហោះចេញឆ្ងាយពីដែនអាកាស និងដែនទឹកនៅសមុទ្រចិនខាងកើតនៃខេត្តជឺជាំង និងសមុទ្រចិនខាងត្បូងនៃខេត្តគ័ងតុង ព្រោះកំពុងមានសកម្មភាពយោធានៅទីនោះ។ យ៉ាងណាមិញ សេចក្ដីជូនដំណឹងនេះ មិនបានបញ្ជាក់ពីទំហំ ឬចំនួនទាហាន និងសព្វាវុធដែលចូលរួមក្នុងការសមយុទ្ធនេះទេ។
បើតាមសេចក្ដីជូនដំណឹងដែលផ្សាយទីភ្នាក់ងារព័ត៌មាន AFP សមយុទ្ធនៅសមុទ្រចិនខាងកើត នឹងធ្វើរហូតដល់ថ្ងៃទី១ ខែសីហា ឯសមយុទ្ធនៅសមុទ្រចិនខាងត្បូង នឹងបញ្ចប់នៅថ្ងៃទី២ ខែសីហា។ បើគិតភូមិសាស្ត្រ សមុទ្រចិនខាងកើតស្ថិតនៅខាងជើងតៃវ៉ាន់ ខណៈសមុទ្រចិនខាងត្បូង ស្ថិតនៅភាគពាយព្យតៃវ៉ាន់។
មិនមែនជារឿងចម្លែកឡើយដែលចិនធ្វើសមយុទ្ធនៅកៀកតៃវ៉ាន់បែបនេះ ប៉ុន្តែសមយុទ្ធព្រមគ្នាលើកនេះ ធ្វើឡើងស្របពេលដែលស្ថានការណ៍នៅច្រកសមុទ្រតៃវ៉ាន់កំពុងឡើងកម្ដៅខ្លាំង។ ថ្មីៗនេះ ក្រុងប៉េកាំងក្ដៅស្លឹកត្រចៀកខ្លាំង ក្រោយក្រុងវ៉ាស៊ីនតោនយល់ព្រមលក់អាវុធតម្លៃ២,២ពាន់លានដុល្លារឲ្យតៃវ៉ាន់ដើម្បីពង្រឹងសមត្ថភាព។ ប៉េកាំង ក៏ចេញសៀវភៅសការពារជាតិមួយ ដែលបង្ហាញពីធ្វើសង្គ្រាម បើតៃវ៉ាន់ចង់បានឯករាជ្យនោះ។
តាមពិតទៅ ការព្រួយបារម្ភពីសន្តិសុខនេះហើយដែលនាំឲ្យតៃវ៉ាន់ស្វះស្វែងរកទិញអាវុធថ្មីៗទំនើបៗពីអាមេរិកដើម្បីការពារខ្លួន ឬយ៉ាងហោចណាស់ អាចធ្វើឲ្យចិនខាតបង់ធំធេងក្នុងពេលមានជម្លោះប្រដាប់អាវុធនោះ។ អាមេរិកឯណេះ ទោះគ្មានទំនាក់ទំនងផ្លូវការជាមួយតៃវ៉ាន់ក្ដី ក៏តែងជួយទំនុកបម្រុងកោះមួយនេះរហូតមក ហើយថែមទាំងមានច្បាប់មួយដែលចងគ្រប់រដ្ឋាភិបាលរបស់ខ្លួនឲ្យជួយតៃវ៉ាន់ក្នុងពេលចាំបាច់ទៀតផង។
ទំនាក់ទំនងឆ្លងសមុទ្រតៃវ៉ាន់ បានយ៉ាប់យ៉ឺនខ្លាំងតាំងពីការឡើងកាន់តំណែងរបស់ប្រធានាធិបតីតៃវ៉ាន់ Tsai Ing-wen ក្នុងឆ្នាំ២០១៦ មក។ ម្ដងដងជាពីរដង រដ្ឋាភិបាលលោកស្រី Tsai Ing-wen បានធ្វើឲ្យដីគោកខឹងសម្បារយ៉ាងខ្លាំងតាមរយៈការគំរាមផ្ដាច់ខ្លួនជាផ្លូវការ។ ប៉េកាំងឯណោះវិញ ក៏បានព្រមានមិនតិចដងដែរ គឺបើតៃវ៉ាន់ហ៊ានប្រកាសឯករាជ្យ សង្គ្រាមនឹងផ្ទុះឡើង ហើយក៏ប្រាប់ប្រទេសផ្សេងឲ្យឈរនៅឆ្ងាយផងដែរ៕
Tag:
ចិន
តៃវ៉ាន់
សមុទ្រចិនខាងត្បូង
សមុទ្រចិនខាងកើត
© រក្សាសិទ្ធិដោយ thmeythmey.com