អន្តរជាតិ
លោក ចូកូវី៖ ហ្សាការតា ត្រូវការជញ្ជាំងសមុទ្ទយក្សដើម្បីទប់ស្កាត់ការលិចបាត់ក្រោមផ្ទៃទឹក
ប្រភពរូប៖ ទីភ្នាក់ងារព័ត៌មាន AP
×![]()
ប្រធានាធិបតីឥណ្ឌូណេស៊ី លោក ចូកូ វីដូដូ (Joko Widodo) បានលើកឡើងថា លោកចង់ឃើញការសាងសង់ជញ្ជាំងសមុទ្ទយក្សដ៏ឆាប់រហ័សមួយនៅជុំវិញរដ្ឋធានីហ្សាការតា ដើម្បីទប់ស្កាត់ទីក្រុងដែលមានសណ្ឋានដីទាបមួយនេះពីការលិចបាត់ទៅក្រោមផ្ទៃសមុទ្ទ។ ផែនការរបស់មេដឹកនាំរូបនេះ លេចរូបរាងក្រោយពីមានការព្យាករណ៍របស់អ្នកជំនាញជាច្រើនថា បើផ្អែកលើស្ថានភាពបច្ចុប្បន្ន ទំហំដី១ភាគ៣នៃទីក្រុងហ្សាការតា អាចលិចបាត់ក្រោមផ្ទៃទឹក ត្រឹមឆ្នាំ២០៥០ខាងមុខ។ 
វិបត្តិជន់លិចនេះ កើតចេញពីមូលហេតុចម្បងៗមួយចំនួន រួមមាន ការអភិវឌ្ឍដោយគ្មានការត្រួតពិនិត្យតាមលក្ខណៈបច្ចេកទេសរយៈពេលរាប់ទសវត្សរ៍, ភាពមិនច្បាស់លាស់នៃការធ្វើនគររូបនីយកម្ម និងការគ្រប់គ្រងដោយគ្មានប្រសិទ្ធភាពរបស់មន្ត្រីគ្រាក់ៗក្នុងទីក្រុង ដែលបម្រើផលប្រយោជន៍ផ្ទាល់ខ្លួនច្រើនជាងប្រយោជន៍សាធារណៈ។
ម្យ៉ាងវិញទៀត ដោយសារកង្វះខាតបណ្តាញបំពង់បង្ហូរទឹកទូលំទូលាយ ម្ចាស់រោងចក្រ និងប្រជាជន បានបង្ហូរកាកសំណល់រាវចូលទៅក្នុងដីស្រទាប់ក្រោម (Aquifer) របស់ទីក្រុង ដែលបង្កឲ្យការដីផ្ទៃខាងលើស្រុតចុះយ៉ាងលឿនរហ័សនៅតំបន់ភាគខាងជើងនៃទីក្រុងហ្សាការតា ។ តំបន់នេះ មានប្រជាជនឥណ្ឌូណេស៊ីរស់នៅប្រមាណពី ២ ទៅ ៣លាននាក់ ។
ត្រង់តំបន់ដដែលនេះ ដីបែបភក់ លិចបាត់ក្រោមផ្ទៃទឹកនៅអត្រាជាមធ្យម ១០ សង់ទីម៉ែត្រក្នុងមួយឆ្នាំៗ។ ការកើនឡើងនៃកម្រិតទឹកសមុទ្ទ ដែលបង្កមកពីកំណើននៃកម្តៅផែនដី នឹងអូសបន្លាយបញ្ហានេះ ក្នុងរយៈពេលរាប់ទសវត្សន៍ខាងមុខទៀត។
ថ្លែងនៅក្នុងបទសម្ភាសជាមួយទីភ្នាក់ងារព័ត៌មាន AP នៅថ្ងៃទី២៦ ខែកក្កដា ប្រមុខរដ្ឋឥណ្ឌូណេស៊ី លោក ចូកូ វីដូដូ បានបញ្ជាក់ឲ្យដឹងថា នេះ គឺជាពេលដែលគួរចាប់ផ្តើមដំណើរការជញ្ជាំងសមុទ្ទ។ គម្រោងដែលរដ្ឋាភិបាលបានលើកយកមកពិចារណាជាលើកដំបូង កាលពី១០ឆ្នាំមុន។ ត្រង់ចំណុចនេះ លោក គូសបញ្ជាក់បែបនេះ៖ «គម្រោងដ៏ធំសម្បើមនេះ នឹងត្រូវការសម្រេចបញ្ចប់ឲ្យបានឆាប់បំផុតដើម្បីទប់ស្កាត់ទីក្រុងហ្សាការតា ពីការលិចបាត់ចូលទៅក្រោមផ្ទៃសមុទ្ទ» ។
ប្រធានាធិបតីឥណ្ឌូណេស៊ីដែលត្រូវបានស្គាល់ជាទូទៅថា វីដូដូ អះអាងថា លោកតាំងចិត្តយ៉ាងមុតមាំជំរុញការកសាងជញ្ជាំងសមុទ្ទយក្សហ៊ុមព័ទ្ធទីក្រុងហ្សារកាតានេះ តាមរយៈការធ្វើកំណែទម្រង់ និងគម្រោងស្នូលមួយចំនួន ទោះជាគំនិតនេះ ពុំសូវពេញនិយមក៏ដោយក្តី។ ដោយទើបតែឈ្នះការបោះឆ្នោតឡើងវិញ កាលពីថ្មីៗនេះ លោក ចូកូវី សង្កត់ធ្ងន់ថា លោកនឹងរងសម្ពាធពីនយោបាយក្នុងស្រុកតិចជាងមុនក្នុងអាណត្តិទីពីររយៈពេល៥ឆ្នាំរបស់លោក។
ទន្ទឹមនឹងគ្នានេះ មេដឹកនាំវ័យ៥៨ឆ្នាំរូបនេះ ក៏បានបង្ហើបគម្រោងពីគម្រោងមហិច្ឆតាផ្សេងទៀតសម្រាប់ទីក្រុងហ្សាការតា ដែលពោរពេញដោយការកកស្ទះ និងបំពុល ។ បច្ចុប្បន្ន រដ្ឋធានីហ្សាការតា មានប្រជាជនរស់នៅជាង១០លាននាក់ ប៉ុន្តែមនុស្សច្រើនជាងបីដងនៃចំនួននេះ កំពុងរស់នៅទីក្រុងជុំវិញនោះ ដែលស្ថិតលើកោះជ្វា ។ កោះជ្វា គឺជាកោះដែលមានប្រជាជនរស់នៅច្រើនបំផុតមួយ ដែលស្មើនឹងជិត៦០ភាគរយនៃប្រជាជនឥណ្ឌូណេស៊ីសរុបទាំង ២៦០លាននាក់ ហើយសកម្មភាពសេដ្ឋកិច្ចប្រមូលផ្តុំនៅទីនោះ។
«យើងចង់ចែកដាច់ដោយឡែករវាង រដ្ឋធានី មជ្ឈមណ្ឌលរដ្ឋាភិបាល និងហ្សាការតា។ យើងមិនចង់ឲ្យលុយទាំងអស់ប្រមូលផ្តុំតែលើកោះជ្វារមួយឡើយ។ យើង មានគម្រោងរើវាចេញពីកោះជ្វារផងដែរ»។ នេះជាការលើកឡើងជាថ្មីរបស់លោកប្រធានាធីបតី ចូកូវី ដោយសង្កត់ធ្ងន់ថា ដោយសារតំបន់នេះជួបប្រទះញឹកញាប់នូវបញ្ហាគ្រោះរញ្ជួយដី និងទឹកជំនន់ លោកចង់ធានាឲ្យបានថា រដ្ឋធានីរបស់ឥណ្ឌូណេស៊ីមានសុវត្ថិភាពពីគ្រោះធម្មជាតិទាំងនេះ៕
Tag:
ឥណ្ឌូណេស៊ី
ហ្សាការតា
ចូកូ វីដូដូ
© រក្សាសិទ្ធិដោយ thmeythmey.com
