អន្តរជាតិ
ឥណ្ឌូណេស៊ី បញ្ជូនកុងតឺន័រសំរាម៧ទូទៅកាន់បារាំងនិងហុងកុងវិញ កុងតឺន័រសំរាមប្លាស្ទិក មកពីអូស្ត្រាលី នៅកំពង់ផែ Batam ប្រទេសឥណ្ឌូណេស៊ី
× ឥណ្ឌូណេស៊ី បានបញ្ជូនត្រឡប់ទៅវិញនូវកុងតឺន័រផ្ទុកសំរាមចំនួន ៧ទូ ដែលនាំចូលខុសច្បាប់ពីប្រទេសបារាំង និងទីក្រុងហុងកុង។ នេះបើតាមការបញ្ជាក់របស់មន្ត្រីគយឥណ្ឌូណេស៊ីនៅថ្ងៃទី៣០ ខែកក្កដា។ ចំណែកសម្រាប់កុងតឺនន័រសំរាម ៤២ទូផ្សេងទៀត អាជ្ញាធរឥណ្ឌូណេស៊ី ក៏ត្រៀមដឹកចេញទៅកាន់ប្រភពដើមវិញផងដែរ។
កុងតឺន័រទាំងនេះ ផ្ទុកពេញទៅដោយសំណល់ប្លាស្ទិក និងសារធាតុគ្រោះថ្នាក់ ដែលល្មើសនឹងច្បាប់នាំចូល។ ប្រាប់ទីភ្នាក់ងារព័ត៌មាន AFP ប្រធានមន្ទីរគយប្រចាំកោះ Batam លោក Susila Brata បានបញ្ជាក់ថា៖ «ទូកុងតឺន័រទាំង៧នោះ ត្រូវបានដឹកចេញពីឥណ្ឌូណេស៊ី កាលពីថ្ងៃចន្ទ ទី ២៩ កក្កដា ហើយមន្ត្រីលោក បានមើលឃើញថា នាវាដឹកសំរាមទាំងនោះ ចាកចេញពីកំពង់ផែទៀតផង»។
បើតាមការបញ្ជាក់របស់លោក Susila កុងតឺន័រសំរាមចំនួន៥ទូ មានទិសដៅទៅកាន់ទីក្រុង ហុងកុង ហើយ ២ទូផ្សេងទៀត ឆ្ពោះទៅកាន់ប្រទេសបារាំង។ ម្យ៉ាងវិញទៀត អាជ្ញាធរឥណ្ឌូណេស៊ី កំពុងត្រៀមលក្ខណៈបញ្ជូនត្រឡប់ទៅវិញនូវ កុងតឺន័រសំរាមប្រមាណ ៤២ទូផ្សេងទៀត ដែលមានទិសដៅ ដូចជា សហរដ្ឋអាមេរិក អូស្ត្រាលី និងអាល្លឺម៉ង់។
នារយៈពេលប៉ុន្មានខែចុងក្រោយនេះ រដ្ឋាភិបាលក្រុងហ្សាការតា បានប្រឹងប្រែងត្រួតពិនិត្យយ៉ាងល្អិតល្អន់លើការនាំចូលសំរាម ដែលស្ថិតជាផ្នែកមួយនៃយុទ្ធនាការប្រឆាំងនឹងការប្រែក្លាយជាធុងសំរាមរបស់បរទេស។
ក្រោយពីចិនបានសម្រេចបិទទ្វារនាំចូលសំរាមពីបរទេស កាលពីដើមឆ្នាំ២០១៨មក សំណល់កែច្នៃមួយចំនួន ត្រូវបានប្រទះឃើញដឹកទៅកាន់ប្រទេសមួយចំនួន ក្នុងតំបន់អាស៊ីអាគ្នេយ៍ ដូចជា ថៃ វៀតណាម ឥណ្ឌូណេស៊ី និងម៉ាឡេស៊ី ។
ពិភពលោក ចាប់ផ្តើមព្រួយបារម្ភជុំវិញការបំពុលប្លាស្ទិក ខណៈប្រទេសអាស៊ីចំនួន ៥ រួមមាន ចិន វៀតណាម ឥណ្ឌូណេស៊ី ហ្វីលីពីន និងថៃ បានក្លាយជាប្រទេសបោះចោលសំរាមប្លាស្ទិកទៅក្នុងសមុទ្ទធំបំផុតក្នុងពិភពលោក។ ការណ៍ បានបង្កឲ្យប៉ះពាល់យ៉ាងធ្ងន់ធ្ងរដល់ជីវិតសត្វរស់នៅក្នុងសមុទ្ទ។
តាមរបាយការណ៍របស់មូលនិធិពិភពលោកសម្រាប់ធម្មជាតិ (WWF) សំរាមប្លាស្ទិកប្រមាណ ៣០០លានតោន ត្រូវបានផលិតជារៀងរាល់ឆ្នាំ ដោយភាគច្រើននៃសំរាមទាំងនោះ ក្លាយជាទីតាំងចាក់សំរាម ឬត្រូវបានគេបោះចោលទៅក្នុងទឹកសមុទ្ទ៕
© រក្សាសិទ្ធិដោយ thmeythmey.com