អន្តរជាតិ
ចិននិងអាមេរិក ចាប់ផ្ដើមការចរចាឡើងវិញនៅសៀងហៃ តែធ្វើឡើងស្ងាត់ៗ មន្ត្រីចរចាអាមេរិក និងចិននាជំនួបកន្លងមកនៅប៉េកាំង។
× នៅថ្ងៃទី៣០ ខែកក្កដា សហរដ្ឋអាមេរិក និងចិនបានចាប់ផ្ដើមការចរចាឡើងវិញហើយដើម្បីដោះស្រាយជម្លោះពាណិជ្ជកម្ម។ ជំនួបដែលធ្វើឡើងនៅទីក្រុងសៀងហៃ ជាការជួបតទល់លើកដំបូងរវាងក្រុមចរចាទាំងពីរចាប់តាំងពីជំនួបមេដឹកនាំអាមេរិក និងចិនក្នុងខែឧសភា ដែលបានព្រមព្រៀងគ្នាឲ្យមានការចរចាឡើងវិញ។ ការចរចាជុំថ្មីនេះ ទំនងមិនមានលទ្ធផលគាប់ចិត្តឡើយព្រោះទាំងចិន ទាំងអាមេរិក សុទ្ធតែមិនរំពឹងខ្ពស់ដូចគ្នា។
ក្រោយផ្អាកអស់ពេលជាយូរ តំណាងចរចាអាមេរិក និងចិន បានចាប់ផ្ដើមការចរចាជាថ្មីនៅទីក្រុងហិរញ្ញវត្ថុសៀងហៃ។ នេះជាជំនួបលើកទី១២ រវាងប្រតិភូជាន់ខ្ពស់អាមេរិក និងចិន តែជាលើកទីមួយដែលការចរចាធ្វើនៅសៀងហៃ ខណៈជំនួបនៅលើទឹកដីចិនកន្លងមក តែងធ្វើឡើងនៅរដ្ឋធានីប៉េកាំងរហូតមក។ ជំនួបនេះ ធ្វើឡើងក្រោយប្រធានាធិបតីអាមេរិក ដូណាល់ ត្រាំ និងសមភាគីចិន ស៊ី ជិនភីង បើកភ្លើងបៃតងដល់ការចរចាឡើងវិញ។
ប្រតិភូអាមេរិកមិនមានការផ្លាស់ប្ដូរអ្វីទេ ហើយនៅតែដឹកនាំដោយតំណាងចរចាពាណិជ្ជកម្ម Robert Lighthizer និងរដ្ឋមន្ត្រីរតនាគារ Steven Mnuchin ។ តំណាងចរចាចិននៅតែដឹកនាំដោយឧបនាយករដ្ឋមន្ត្រី លីវ ហឺ ដដែល។ ជំនួបនៅសៀងហៃនេះ ក៏មានវត្តមានរដ្ឋមន្ត្រីពាណិជ្ជកម្ម ចុង សាន ដែលត្រូវចេញមុខដោយផ្ទាល់លើកដំបូងផង។ លោក ចុង សាន ត្រូវបានគេស្គាល់ថា ជាមន្ត្រីមានជំហរតឹងរ៉ឹងក្នុងការចរចា។
អ្វីគួរឲ្យកត់សម្គាល់នោះ ជំនួបលើកដំបូងនៅសៀងហៃ ធ្វើឡើងលាក់កំបាំង និងមិនហ៊ឹកហ៊ាក់បើកចំហអ្វីទេ។ ប្រព័ន្ធផ្សព្វផ្សាយក្នុងស្រុកចិន មិនបានរាយការណ៍ច្រើនពីជំនួបថ្ងៃទី៣០ ខែកក្កដានេះ ឡើយ ខណៈដែលសេចក្ដីរាយការណ៍ជាវីដេអូ ឬរូបថតពីការទៅដល់របស់ប្រតិភូអាមេរិក ក៏មិនឃើញមានដែរ ទោះនេះជាជំនួបទល់មុខលើកដំបូងតាំងពីខែឧសភាក្ដី។ ខុសពីលើកមុនៗ កម្មវិធីរបស់ប្រតិភូទាំងពីរក៏ត្រូវបានលាក់បាំងដូចគ្នា។
យ៉ាងណាមិញ ទីភ្នាក់ងារព័ត៌មានរដ្ឋចិន Xinhua តាមរយៈបទវិចារណកថារបស់ខ្លួន បានស្នើឲ្យប្រតិភូអាមេរិករៀនសូត្រពីទស្សនកិច្ចប្រធានាធិបតី រីឆាត និកសុន នៅសៀងហៃក្នុងឆ្នាំ១៩៧២ ។ ទីក្រុងសៀងហៃនេះហើយ ជាទីដែលលោក និកសុន ចុះហត្ថលេខាលើសេចក្ដីប្រកាសទទួលស្គាល់ចិនដោយស្មោះត្រង់ ដូចនេះមន្ត្រីអាមេរិក ក៏ត្រូវបង្ហាញការស្មោះត្រង់ និងមានក្ដីរំពឹងសមរម្យដើម្បីចាប់ផ្ដើមការចរចាម្ដងទៀត។ នេះបើតាមវិចារណកថាដដែល។
ទំនងរំឭកដល់ទស្សនកិច្ចរបស់លោក និកសុន ការចរចាលើកនេះ ក៏រៀបចំឡើងនៅផ្ទះសំណាក់ភ្ញៀវរដ្ឋ Xijiao ដែលលោក និកសុន ស្នាក់អាស្រ័យដើម្បីរៀបចំសេចក្ដីថ្លែងការណ៍ឆ្នាំ១៩៧២ ផងដែរ។ សម្រាប់ជំនួបលើកនេះ គម្រោងទិញផលិតផលកសិកម្មអាមេរិក ទំនងជារបៀបវារៈសំខាន់ ខណៈចិនទំនងប្រើប្រាស់ការទិញនេះដើម្បីយកចិត្តអាមេរិក និងជាថ្នូរការលើកលែងការរឹតត្បិតរបស់អាមេរិកលើផលិតផលចិនមួយចំនួនទៀត៕
Tag:
ចិន
អាមេរិក
ជម្លោះពាណិជ្ជកម្ម
© រក្សាសិទ្ធិដោយ thmeythmey.com