អន្តរជាតិ
លោកនាយករដ្ឋមន្ត្រីអេត្យូពី Abiy Ahmed កំពុងដាំដើមឈើ កាលពីថ្ងៃចន្ទទី ២៩ ខែកក្កដា (រូប៖ Twitter )
×![]()
ប្រទេស អេត្យូពី បានដាំកូនឈើច្រើនជាង ៣៥៣លានដើម ក្នុងរយៈពេលត្រឹម ១២ម៉ោងប៉ុណ្ណោះនៅថ្ងៃចន្ទ ទី២៩ ខែកក្កដា ឆ្នាំ២០១៩ ។ ពួកគេ ជឿជាក់ថា នេះជាកំណត់ត្រាពិភពលោកថ្មី ខណៈឥណ្ឌា ជាអ្នកកាន់កាប់កំណត់ត្រាពិភពលោកបច្ចុប្បន្នដាំដើមឈើបាន ៦៦លានដើម ក្នុងឆ្នាំ២០១៧ ដោយប្រើរយៈពេល១២ម៉ោង។ 
ការដាំដើមឈើដ៏ច្រើនសន្ធឹកសន្ធាប់នេះ ជាផ្នែកមួយនៃយុទ្ធនាការដាំដើមឈើ ៤ពាន់លានដើមហៅថា «កេរ្តិ៍ដំណែលបៃតង» ឬ «Green Legacy» ។ គម្រោងបៃតងដែលផ្តួចផ្តើម និងដឹកនាំផ្ទាល់ដោយលោកនាយករដ្ឋមន្ត្រីអេត្យូពី Abiy Ahmed មានគោលដៅប្រយុទ្ធប្រឆាំងនឹងការបាត់បង់ព្រៃឈើ និងបញ្ហាបម្រែបម្រួលអាកាសធាតុ។
ប្រជាជនអេត្យូពីរាប់លាននាក់នៅទូទាំងប្រទេស ត្រូវបានអញ្ជើញឲ្យចូលរួមក្នុងយុទ្ធនាការនេះ ហើយត្រឹមរយៈពេល ៦ម៉ោងដំបូង លោកនាយករដ្ឋមន្ត្រី Ahmed តាមរយៈគណនី Twitter អះអាងថា ដើមឈើប្រមាណ ១៥០លានដើម ត្រូវបានដាំរួចរាល់។
«យើង ធ្វើដំណើរមកដល់ពាក់កណ្តាលផ្លូវនៃគោលដៅយើងហើយ» ។ លោក និយាយបែបនេះ ដើម្បីលើកទឹកចិត្តប្រជាជនអេត្យូពី។ ក្រោយពីបញ្ចប់រយៈពេល១២ម៉ោងរួចមក លោកនាយករដ្ឋមន្ត្រីអេត្យូពី បានប្រកាសតាម Twitter ជាថ្មីថា អេត្យូពី មិនត្រឹមតែសម្រេចគោលដៅយុទ្ធនាការ #GreenLegacy ប៉ុណ្ណោះទេ ប៉ុន្តែសម្រេចហួសពីគោលដៅកំណត់ថែមទៀតផង ។
ដំបូងឡើយ គោលដៅនៃការដាំដើមឈើរយៈពេល១ថ្ងៃរបស់អេត្យូពីនេះ គឺកំណត់ត្រឹមតែ ២០០លានដើមប៉ុណ្ណោះ។ ក្រោយបូកសរុបរួចរាល់ កូនឈើសរុប ៣៥៣ ៦៣៣ ៦៦០ ដើម ត្រូវបានដាំលើផ្ទៃដីអេត្យូពី ក្នុងរយៈពេល ១២ម៉ោង។ នេះការអះអាងរបស់រដ្ឋមន្ត្រីបច្ចេកវិទ្យា និងនវានុវត្តន៍អេត្យូពី Getahun Mekuria ដោយជឿជាក់ថា នេះជាកំណត់ត្រាពិភពលោក។
បច្ចុប្បន្ន កំណត់ត្រាពិភពលោកសម្រាប់ការដាំដើមឈើក្នុងពេលត្រឹមមួយថ្ងៃ ធ្លាប់បានរៀបចំឡើងក្នុងប្រទេសឥណ្ឌា ក្នុងឆ្នាំ២០១៧។ ក្នុងកម្មវិធីនេះ អ្នកស្ម័គ្រចិត្តប្រមាណ១,៥លាននាក់ បានដាំដើមឈើជាង ៦៦លានដើម ក្នុងរយៈពេល១២ម៉ោង។
អេត្យូពី គឺជាប្រទេសមានប្រជាជនច្រើនបំផុតលំដាប់ទី២ ក្នុងតំបន់អាហ្វ្រិក ជាមួយប្រជាជនសរុប ១០០លាននាក់។ យោងតាមរបាយការណ៍របស់អង្គការសហប្រជាជាតិ ប្រទេសនេះ មានព្រៃឈើប្រមាណ ១៤ភាគរយ គ្របដណ្តប់ផ្ទៃដីសរុបក្នុងឆ្នាំ២០១៨៕
Tag:
អេត្យូពី
បម្រែបម្រួលអាកាសធាតុ
ដើមឈើ
© រក្សាសិទ្ធិដោយ thmeythmey.com
