ជាតិ
នយោបាយជាតិ
មួយឆ្នាំក្រោយការបោះឆ្នោត អាមេរិក ស្នើជាថ្មីឲ្យឈប់ចោទលោក កឹម សុខា លោក កឹម សុខា និង ភរិយា ជួបសំណេះសំណាលជាមួយក្រុមមេធាវីនាពេលកន្លងមក (រូបពីគណនីហ្វេសប៊ុក Chantha Muth)
× រដ្ឋាភិបាលអាមេរិក តាមរយៈស្ថានទូតខ្លួន បានអំពាវនាវជាថ្មី ឲ្យរដ្ឋាភិបាលកម្ពុជា ក៏ដូចជា តុលាការ ទម្លាក់បទចោទចេញពីលោក កឹម សុខា ប្រធាននៃអតីតគណបក្សប្រឆាំង ដែលកំពុងស្ថិតនៅក្នុងផ្ទះក្រោមការត្រួតពិនិត្យរបស់តុលាការ រួមទាំងអ្នកទោសនយោបាយដទៃទៀត។ ការអំពាវនាវរបស់សហរដ្ឋអាមេរិកនាពេលនេះ គឺធ្វើឡើងក្រោយពីការបោះឆ្នោតអាណត្តិទី៦ នៅកម្ពុជា កាលពីថ្ងៃទី២៩ ខែកក្កដា ឆ្នាំ២០១៨ បានកន្លងផុតទៅមួយឆ្នាំ។
លើសពីនេះ សហរដ្ឋអាមេរិក បានស្នើឲ្យរដ្ឋាភិបាលកម្ពុជា បញ្ចប់ការចោទប្រកាន់ប្រជាពលរដ្ឋ ដោយគ្មានមូលដ្ឋាន និង ក្រោមហេតុផលនយោបាយ។ ស្ថានទូតអាមេរិក បានសរសេរលើទំព័រហ្វេសប៊ុកដូច្នេះថា៖«ប្រជាពលរដ្ឋកម្ពុជា គួរតែអាចប្រើសិទ្ធិរបស់ខ្លួន ក្នុងការសម្តែងមតិដោយសេរី និងអាចប្រមូលផ្តុំគ្នាដោយសន្តិវិធី....»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ចាត់ទុកការអំពាវនាវរបស់សហរដ្ឋអាមេរិក ថាប្រៀបដូចជាចូលរួមបំផ្លាញប្រជាធិបតេយ្យនិងនីតិរដ្ឋនៅកម្ពុជា។ តាមរយៈកិច្ចសម្ភាសជាមួយសារព័ត៌មានថ្មីៗ អ្នកនាំពាក្យបក្សកាន់អំណាច បានថ្លែងដូច្នេះថា៖«សហរដ្ឋអាមេរិក កាន់ជើងអតីតបក្សប្រឆាំង»។
បច្ចុប្បន្ន សំណុំរឿងរបស់លោក កឹម សុខា កំពុងស្ថិតក្នុងដៃចៅក្រមស៊ើបសួរនៅឡើយទេ។ ដ្បិតលោក ត្រូវបានអនុញ្ញាតឲ្យនៅក្រៅឃុំក្តី តែចៅក្រមស៊ើបសួរ បានដាក់បម្រាមចំពោះលោក ដោយមិនឲ្យលោកចេញទៅណាឆ្ងាយពីផ្ទះនោះទ។
បើតាមសារលើទំព័រហ្វេសប៊ុកដដែល សហរដ្ឋអាមេរិក បានហៅការបោះឆ្នោតអាណត្តិទី៦នេះ ថាមានកំហុសឆ្គងយ៉ាងខ្លាំង ដោយមិនមានលក្ខណៈសេរី និងយុត្តិធម៌ឡើយ ហើយក៏មិនឆ្លុះបញ្ចាំងពីឆន្ទៈរបស់ប្រជាពលរដ្ឋកម្ពុជាដែរ។ សហរដ្ឋអាមេរិក យល់ដូច្នេះ ក៏ព្រោះតែការបោះឆ្នោតនេះ ពុំមានវត្តមានអតីតគណបក្សប្រឆាំង។
លោក ផៃ ស៊ីផាន អ្នកនាំពាក្យរដ្ឋាភិបាល បង្ហោះសារលើគណនីហ្វេសប៊ុក តបទៅសហរដ្ឋអាមេរិកថា ប្រជាពលរដ្ឋកម្ពុជា ក៏ដូចប្រជាពលរដ្ឋអាមេរិកដែរ គឺមិនចង់ឃើញបរទេសណាមួយ ឈ្លានពានអធិបតេយ្យភាពរបស់ខ្លួន ដែលប៉ះពាល់ការបោះឆ្នោតឡើយ។ លោក សរសេរបែបនេះថា៖«ប្រជាពលរដ្ឋខ្មែរយល់ច្បាស់អំពីសិទ្ធិសម្រេចលើជោគវាសនារបស់ខ្លួន ដូចដែលបានចែងក្នុងរដ្ឋធម្មនុញ្ញរបស់ខ្លួន ក៏ដូចជាធម្មនុញ្ញអង្គការសហប្រជាជាតិ ដែលជាតម្លៃពិតប្រាកដនៃសិទ្ធិមនុស្ស និងប្រជាធិបតេយ្យ»។
សូមរម្លឹកថា ការបោះឆ្នោតថ្នាក់ជាតិអាណត្តិទី៦ មានគណបក្សទាំងអស់២០ ដែលចូលរួមប្រកួតប្រជែង។ តែលទ្ធផល មានតែគណបក្សប្រជាជនកម្ពុជាប៉ុណ្ណោះ ដែលទទួលបានអាសនៈ៕
Tag:
អាមេរិក
កឹម សុខា
បោះឆ្នោត
© រក្សាសិទ្ធិដោយ thmeythmey.com