កូរ៉េខាងជើង បាញ់មីស៊ីលចម្ងាយខ្លីពីរគ្រាប់ទៀតហើយនៅថ្ងៃនេះ

អន្តរជាតិ

កូរ៉េខាងជើង បាញ់មីស៊ីលចម្ងាយខ្លីពីរគ្រាប់ទៀតហើយនៅថ្ងៃនេះ

31, Jul 2019 , 9:02 am

រូបភាព

មីស៊ីលចម្ងាយខ្លីដែលកូរ៉េខាងជើងបាញ់កាលពីថ្ងៃទី២៦ ខែកក្កដា។ នៅថ្ងៃទី៣១ ខែកក្កដានេះ កូរ៉េខាងជើង បានបាញ់មីស៊ីលចម្ងាយខ្លីពីរគ្រាប់ទៀត។ រូបភាព KCNA

ដោយ: តន ចាន់រិទ្ធារ៉ា

កូរ៉េខាងជើង នៅថ្ងៃទី៣១ ខែកក្កដានេះ បានបាញ់មីស៊ីលចម្ងាយខ្លីចំនួនពីរគ្រាប់ចេញពីតំបន់ឆ្នេរភាគខាងកើតរបស់ខ្លួន។ នេះបើតាមការប្រកាសរបស់យោធាកូរ៉េខាងត្បូង។ នេះជាលើកទីពីរហើយក្នុងរយៈពេលមិនដល់មួយសប្ដាហ៍ផងដែលក្រុងព្យុងយ៉ាងបាញ់មីស៊ីលបន្តបន្ទាប់បែបនេះ។ ប្រមុខការពារជាតិកូរ៉េខាងត្បូងនិយាយថា មីស៊ីលដែលបាញ់លើកនេះ ខុសពីមីស៊ីលដែលបាញ់លើកមុន។

អត្ថបទទាក់ទង

យោធាកូរ៉េខាងត្បូង៖ កូរ៉េខាងជើងបាញ់មីស៊ីលចម្ងាយខ្លីពីរគ្រាប់ចូលសមុទ្រជប៉ុន

មីស៊ីលទីមួយបាញ់ចេញនៅម៉ោង៥ និង៦នាទី ហើយគ្រាប់ទីពីរបាញ់នៅម៉ោង៥ និង២៧នាទីព្រឹកថ្ងៃទី៣១ ខែកក្កដា។ នេះបើតាមការបញ្ជាក់របស់សេនាធិការចម្រុះកងទ័ពកូរ៉េខាងត្បូង។ មីស៊ីលទាំងពីរ ហោះក្នុងចម្ងាយប្រមាណ២៥០គីឡូម៉ែត្រ និងហោះក្នុងកម្ពស់ប្រហែល៣០គីឡូម៉ែត្រ។ សេអ៊ូល និងវ៉ាស៊ីនតោន កំពុងត្រួតពិនិត្យព័ត៌មានបន្ថែម។

ការបាញ់លើកនេះ មានរយៈពេល៦ថ្ងៃគត់ក្រោយកូរ៉េខាងជើងបានបាញ់មីស៊ីលចំនួនពីរគ្រាប់ដូចគ្នានេះកាលពីសប្ដាហ៍មុន ដែលបានធ្លាក់ចូលសមុទ្រខាងកើត ឬសមុទ្រជប៉ុន។ មីស៊ីលដែលបាញ់ថ្ងៃទី២៦ ខែកក្កដា ជាប្រភេទមីស៊ីល KN-23 ដែលកូរ៉េខាងជើងចម្លងតាមមីស៊ីលរុស្ស៊ី Iskandar ។ រដ្ឋមន្ត្រីការពារជាតិកូរ៉េខាងត្បូង Jeong Kyeong-doo និយាយថា មីស៊ីលបាញ់ថ្ងៃទី៣១ ខែកក្កដា ជាមីស៊ីលផ្សេង ប៉ុន្តែមិនផ្ដល់ព័ត៌មានលម្អិតឡើយ។

មិនទាន់មានការបញ្ជាក់មូលហេតុ ឬព័ត៌មានពីកូរ៉េខាងជើងឡើយ។ យ៉ាងណាមិញ ក្រោយការបាញ់មីស៊ីលកាលពីសប្ដាហ៍មុន ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានស្រង់សម្ដីលោក គីម ជុងអ៊ុន ប្រមុខដឹកនាំកំពូល ថា ជាការព្រមានម៉ឺងម៉ាត់មួយសម្រាប់យោធាកូរ៉េខាងត្បូងដែលល្មោភសង្គ្រាម ព្រោះហ៊ាននាំចូលអាវុធទំនើបៗ និងធ្វើសមយុទ្ធយោធា។ លោក គីម ចង់និយាយដល់ការពង្រាយយន្តហោះ F-35 របស់អាមេរិក និងសមយុទ្ធយោធារួមគ្នារវាងសេអ៊ូល និងវ៉ាស៊ីនតោន។

ក្រោយបាញ់ចុងក្រោយនេះ ប្រមុខការពារជាតិកូរ៉េខាងត្បូងយល់ថា កូរ៉េខាងជើងគួរតែត្រូវបានចាត់ទុកជាសត្រូវហើយ។ បើតាមទីភ្នាក់ងារព័ត៌មាន Yonhap លោក Jeong បញ្ជាក់ថា៖ «របបកូរ៉េខាងជើង និងយោធារបស់ខ្លួន ពិតណាស់ស្ថិតក្នុងលក្ខណៈជាសត្រូវ ប្រសិនបើពួកគេគំរាមយើង ហើយដុតបញ្ឆេះយើងនោះ។»

អាមេរិកឯណោះវិញ បានឆ្លើយតបដោយប្រុងប្រយ័ត្នចំពោះសកម្មភាពបង្ករឿងរបស់កូរ៉េខាងជើង។ អ្នកនាំពាក្យក្រសួងការបរទេសអាមេរិកម្នាក់ប្រាប់ Yonhap ថា អាមេរិកដឹងពីព័ត៌មាននៃការបាញ់មីស៊ីលរបស់កូរ៉េខាងជើង ហើយបន្តតាមដានស្ថានការណ៍ទៀត៕