ជាតិ
អន្តរជាតិ
នៅពេលដែលយុវជនពីលោកខាងលិច មកសុំទាននៅអាស៊ីអាគ្នេយ៍សម្រាប់ដំណើរកម្សាន្ត!
×![]()
ដោយ: រួបរួម
និន្នាការថ្មីសម្រាប់យុវជនមួយចំនួនពីបណ្តាប្រទេសលោកខាងលិច! ពួកគេមកកាន់ទ្វីបអាស៊ី ពិសេសនៅតំបន់អាស៊ីអាគេ្នយ៍ ដោយនាំគ្នាដើរសុំទានដើម្បីរកលុយសម្រាប់ដំណើរទេសចរណ៍កម្សាន្តពីប្រទេសមួយទៅប្រទេសមួយទៀត។ នេះបើតាមការផ្សាយរបស់ Business Insider និងបណ្តាសារព័ត៌មានធំៗលើពិភពលោក។
អាស៊ីអាគ្នេយ៍ ពោរពេញទៅពលរដ្ឋដែលមានទឹកចិត្តល្អប្រពៃ មានក្តីអាណិតអាសូរ និងចូលចិត្តជួយយកអសារអ្នកដទៃ។ យុវជនមួយចំនួនពីប្រទេសលោកខាងលិច ជាពិសេសអ្នកដែលមិនសូវមានធនធានគ្រប់គ្រាន់ ចាប់បានចំណុចនេះ ដោយពួកគេប្រឹងធ្វើសកម្មភាពកម្សត់គ្រប់បែបយ៉ាងដើម្បីរកលុយសម្រាប់ដំណើរកម្សាន្តរបស់ខ្លួនពីប្រទេសមួយទៅប្រទេសមួយទៀត។
អាជ្ញាធរនៅតំបន់ទេសចរណ៍ធំៗ ដូចជា ក្រុងបាលី (ប្រទេសឥណ្ឌូណេស៊ី) ប្រទេសថៃ និងហុងកុងជាដើម បានហាមប្រាមរាល់សកម្មភាព ដូចជា ការដើរសុំទានផ្ទាល់ពីកន្លែងមួយទៅកន្លែងមួយ ការផ្តិលអង្គុយសុំទាន ការប្រគំតន្ត្រី និងការលក់រូបថត តាមផ្លូវជាដើម។
អ្នកសុំទានពីលោកខាងលិចមួយចំនួន បានអះអាងថា ពួកគេត្រូវចោរលួចលិខិតឆ្លងដែន ឬកាបូបលុយ ដែលធ្វើឲ្យពួកគេមិនមានហិរញ្ញវត្ថុគ្រប់គ្រាន់សម្រាប់ដំណើរវិលត្រឡប់ទៅវិញ។ ពិតណាស់អ្នកខ្លះ មានករណីនេះ កើតឡើងពិតប្រាកដ តែអ្នកខ្លះ គ្រាន់តែជាការភូតកុហកបោកបញ្ឆោត។
យោងតាម The Guardian អាជ្ញាធរថៃ បានដាក់កំហិតដល់ភ្ញៀវទេសចរ បង្ហាញភស្តុតាងថា ពួកគេមានលុយគ្រប់គ្រាន់ដើម្បីទ្រទ្រង់ដំណើរកម្សាន្តរបស់ពួកគេនៅថៃ រីឯគោលការណ៍នៅកោះបាលី ប្រទេសឥណ្ឌូណេស៊ីឯណោះវិញ ប្រសិនគេប្រទះឃើញករណីបរទេសសុំទានតាមផ្លូវ ឬប្រគំតន្ត្រី អាជ្ញាធរនឹងដឹកនាំបញ្ជូនពួកគេភ្លាមៗទៅកាន់បណ្តាស្ថានទូតពាក់ព័ន្ធ។
តាមពិតទៅអំពើសប្បុរសធម៌ មិនខុសនោះឡើយ ប៉ុន្តែបណ្តាពលរដ្ឋនៅអាស៊ីអាគ្នេយ៍ជាទូទៅមានកម្រិតជីវភាពចាញ់ពលរដ្ឋនៅលោកខាងលិចជាពិសេសអូស្ត្រាលី អង់គ្លេស និងរុស្ស៊ី ជាដើម ដូច្នេះវាជារឿងមួយដែលត្រូវគិតគូឲ្យបានវែងឆ្ងាយនៅពេលដែលពួកគេសម្រេចដាក់ទានដល់អ្នកដែលមានជាងខ្លួន។
នៅហុងកុង សកម្មភាពសុំទាន និងការសម្តែងតាមផ្លូវរបស់ជនបរទេស នៅក្រៅស្ថានីយរថភ្លើង តាមគល់ស្ពាន និងផ្លូវដើរ ត្រូវបានហាមឃាត់ដោយច្បាប់។ នេះបើតាមការផ្សាយរបស់ South China Morning Post។
កម្ពុជាក៏ជួបករណីនេះញឹកញាប់ផងដែរ ដោយខ្លះជារឿងពិត ហើយខ្លះទៀតជារឿងប្រឌិត។ ជាទូទៅ ពលរដ្ឋខ្មែរ តែងតែមានសមានចិត្តចំពោះជនបរទេស នៅពេលដែលឃើញពួកគាត់ឃើញអ្នកទាំងនោះ ស្ថិតក្នុងស្ថានភាពដុនដាប។ បណ្តាញសង្គមហ្វេសប៊ុក បានចែករំលែកព័ត៌មានទៅមនុស្សជាច្រើន នៅពេលដែលមានអ្នកបង្ហោះរូបថតជាមួយនឹងសំណេរបែបអាណិតអាសូរ និងសុំការជួយសង្គ្រោះ ជាពិសេសករណីបរទេសបាត់លិខិតឆ្លងដែន ឬត្រូវចោរឆក់កាបូបលុយ។
«ក្នុងចំណោមមនុស្សពីរនាក់ បុរសចំណាស់ខ្មែរ និងជនបរទេស ដែលស្ថិតក្នុងស្ថានភាពតោកយ៉ាក អត់ឃ្លានដូចគ្នា។ មួយចំនួនធំផ្តោតទៅលើជនបរទេស ជាមួយក្តីអាណិតអាសូរ ដោយមិនបានចាប់អារម្មណ៍លើជាតិសាសន៍ខ្លួនឯង»។ នេះជាការកត់សម្គាល់របស់យុវជនម្នាក់ ដោយបន្ថែមថា ពលរដ្ឋខ្មែរអាចជួយជនបរទេសទាំងនោះបាន តាមរយៈការទាក់ទងទៅកាន់ស្ថានទូតរបស់ពួកគេ។ «អ្នកខ្លះតែងតែឲ្យតម្លៃរដ្ឋាភិបាលបរទេសដែលយកចិត្តទុកដាក់ពលរដ្ឋរបស់ខ្លួន ដូច្នេះស្ថានទូតរបស់ពួកគេច្បាស់ជាមិនបិទភ្នែកនោះឡើយនៅពេលដែលឃើញពលរដ្ឋខ្លួនមានបញ្ហា ជាពិសេសករណីបាត់លិខិតឆ្លងដែន ឬចោរឆក់កាបូបលុយជាដើម»៕
© រក្សាសិទ្ធិដោយ thmeythmey.com
