ជាតិ
កម្ពុជា និងតួកគី ចុះកិច្ចព្រមព្រៀងសន្តិសុខ ហើយប្ដេជ្ញាប្រឆាំងភេរវកម្ម
×![]()
ដោយ: ធឿន បញ្ញាឬទិ្ធ
ភ្នំពេញ៖ កម្ពុជា និងតួកគី ប្ដេជ្ញាប្រឆាំងភេរវកម្មរួមគ្នា ដើម្បីរក្សាសន្តិសុខជាតិ។ នេះជាការលើកឡើងរបស់រដ្ឋមន្ត្រីក្រសួងមហាផ្ទៃ សម្ដេច ស ខេង និងលោក Suleyman Soylu រដ្ឋមន្ត្រីក្រសួងមហាផ្ទៃតួកគី នៅក្នុងពិធីចុះហត្ថលេខាពង្រឹងសន្តិសុខរវាងប្រទេសទាំងពីរ នាទីក្រុងអង់ការ៉ា ប្រទេសតួកគី កាលពីថ្ងៃទី៣០ កក្កដា។
ក្នុងកិច្ចប្រជុំទ្វេរភាគីនោះ ភាគីទាំងពីរបានពិភាក្សាគ្នាអំពីការងារប្រយុទ្ធប្រឆាំងភេវរកម្ម រួមទាំងកិច្ចសហប្រតិបត្តិការសន្តិសុខ។ ភាគីទាំងពីរបានឯកភាពគ្នាពង្រឹងកិច្ចសហប្រតិបត្តិការវិស័យទាំងពីរនេះ ឲ្យកាន់តែមានភាពរឹងមាំ និងទទួលបានលទ្ធផលល្អប្រសើរ។ ជាមួយគ្នារដ្ឋមន្ត្រីក្រសួងមហាផ្ទៃតួកគី ក៏បានសរសើរកម្ពុជា ក្នុងការសហការបង្ក្រាបចលនាភេរវកម្មហ្វេកតូ ដែលបានសម្ងំលាក់ខ្លួននៅកម្ពុជាកន្លងមកផងដែរ។
ហ្វេកប៊ុកសម្ដេច ស ខេង បានស្រង់សម្តីប្រមុខដឹកនាំមហាផ្ទៃតួកគី យ៉ាងដូច្នេះថា៖«អរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា និងសម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកម្ពុជា ដែលបានចាត់វិធានការប្រឆាំងនឹងក្រុមភេរវកម្មហ្វេកតូនាពេលកន្លងមក ហើយថាភាគីទាំងពីរនឹងបន្តការងារយ៉ាងម៉ឺងម៉ាត់បន្ថែមទៀតលើការងារប្រឆាំងភេរវកម្មនេះទៀត»។
ក្រុមភេរវកម្មហ្វេកតូ ដែលរដ្ឋាភិបាលតួកគី តាមកម្ចាត់នេះ ធ្លាប់បានវាយប្រហារនៅក្នុងកន្លែងប្រជុំជនមួយក្នុងប្រទេសតួកគី កាលពីថ្ងៃទី១៥ កក្កដា ឆ្នាំ២០១៦ ដែលបង្កឲ្យមានអ្នកស្លាប់២៥១នាក់ និងអ្នករបួសជិត២២០០នាក់។ ក្រោយបង្កភេរវកម្មហើយ រដ្ឋាភិបាលតួកគី និងកម្ពុជា សហការគ្នាទប់ស្កាត់ក្រុមនេះក្រោយពីដឹងថា មានបណ្ដាញចលនាភេរវករ ដែលមកចង់សម្ងំលាក់ខ្លួននៅកម្ពុជា។
ក្រៅពីចុះកិច្ចព្រមព្រៀងលើវិស័យសន្តិសុខ និងរួមគ្នាប្រឆាំងភេរវកម្មនោះ ភាគីទាំងពីរក៏បានឯកភាពគ្នាចែករំលែកពីកិច្ចការរក្សាសណ្ដាប់ធ្នាប់សាធារណៈ សុវត្ថិភាព និងការគ្រប់គ្រងចរាចរណ៍ រួមទាំងការពង្រឹងភាពជាដៃគូរវាងរដ្ឋាភិបាល និងសង្គមស៊ីវិល។ ជាពិសេសការងារបណ្ដុះបណ្ដាលនគរបាល មន្ត្រីសន្តិសុខ ឆ្មាំសមុទ្រ និងកងរាជអាវុធហត្ថជាដើម។
«អ្វីៗគឺភាគីទាំងពីរបានបង្ហាញឆន្ទៈអនុវត្តហើយ នៅឡើយតែការអនុវត្តជាក់ស្ដែងដើម្បីផ្ដល់ផលប្រយោជន៍ឲ្យគ្នាទៅវិញទៅមក»។ នេះជាការបញ្ជាក់របស់សម្ដេច ស ខេង រដ្ឋមន្ត្រីក្រសួងមហាផ្ទៃ ដែលបានបន្ថែមថា កិច្ចព្រមព្រៀងសន្តិសុខនេះ នឹងជួយលើកស្ទួយទំនាក់ទំនង និងកិច្ចសហប្រតិបត្តិការរវាងភាគីទាំងពីរបន្ថែមទៀត៕
Tag:
ស ខេង
ភេរវកម្ម
តួកគី
© រក្សាសិទ្ធិដោយ thmeythmey.com
