អន្តរជាតិ
ជម្លោះពាណិជ្ជកម្ម៖ លោក ត្រាំ ផ្ដាំចិនឲ្យចុះកិច្ចព្រមព្រៀងឲ្យហើយ កុំពន្យារពេល ប្រធានាធិបតីអាមេរិក ដូណាល់ ត្រាំ ចាប់ដៃសមភាគីចិន ស៊ី ជិនភីង នាជំនួបនៅជប៉ុន។
× ប្រធានាធិបតីអាមេរិក ដូណាល់ ត្រាំ នៅថ្ងៃទី៣០ ខែកក្កដា បានបង្ហោះសារមិនពេញចិត្តតាមបណ្ដាញសង្គម Twitter ជុំវិញជម្លោះពាណិជ្ជកម្មជាមួយចិន និងចោទចិនថា ព្យាយាមបន្លាយពេលចរចា និងរង់ចាំឲ្យការបោះឆ្នោតនៅអាមេរិកឆ្នាំ២០២០ រួចរាល់សិន។ លោក ត្រាំ ផ្ដាំឲ្យចិនប្រឹងចរចាជាមួយអាមេរិកឲ្យមានកិច្ចព្រមព្រៀងត្រឹមអាណត្តិនេះ ព្រោះនៅអាណត្តិក្រោយ ការចរចានឹងកាន់តែពិបាកខ្លាំងមិនខាន។
ចំថ្ងៃមន្ត្រីជួបគ្នារកដំណោះស្រាយជម្លោះពាណិជ្ជកម្មនៅឯសៀងហៃ ប្រធានាធិបតីអាមេរិក ដូណាល់ ត្រាំ ស្រាប់តែបង្ហាញជំហររំពឹងតិចតួចពីជំនួបនេះទៅវិញ។ លោក ត្រាំ ព្រមានថា កិច្ចព្រមព្រៀងបញ្ចប់ជម្លោះពាណិជ្ជកម្មរវាងមហាអំណាចទាំងពីរនេះ អាចមិនលេចរូបរាងរហូតដល់ពេលក្រោយការបោះឆ្នោតអាមេរិកឡើយ។ បើតាមលោក ត្រាំ ចិនជាអ្នកចង់ពន្យារពេលចរចាដោយរង់ចាំមើលលទ្ធផលបោះឆ្នោតប្រធានាធិបតីអាមេរិកសិន។
«ពួកគេ (ចិន) ចង់ខ្ញុំចាញ់ ន្អាលនឹងចរចាជាមួយអ្នកផ្សេងដូចជាលោកស្រី Elizabeth Warren ឬលោក Joe Biden ឬអ្នកដទៃ។» នេះជាការលើកឡើងរបស់លោក ត្រាំ ដោយសំដៅបេក្ខជនប្រធានាធិបតីបក្សប្រជាធិបតេយ្យ មុននឹងនិយាយដាស់តឿនចិនវិញថា ចិនទៅវិញទេដែលចង់បានកិច្ចព្រមព្រៀងខ្លាំង តែមានឬមិនមាន គឺអាស្រ័យលើរូបលោកផ្ទាល់ មិនមែនចិនឡើយ។ នេះបើតាមការផ្សាយរបស់កាសែតហុងកុង South China Morning Post ។
ការលើកឡើងរបស់លោក ត្រាំ បែបនេះ ទំនងជាសញ្ញាបង្ហាញពីការបន្ថយក្ដីរំពឹងនៃជំនួបចរចាដែលកំពុងធ្វើនៅសៀងហៃ។ វាក៏ហាក់ដូចជាផ្ទុយនឹងជំហរសុទិដ្ឋនិយមរបស់លោក ត្រាំ អំឡុងជំនួបជាមួយសមភាគីចិន ស៊ី ជិនភីង នៅទឹកដីជប៉ុនកាលពីខែមិថុនាផងដែរ។
មិនបញ្ចប់ត្រឹមការចោទថា ចិនបង្អូសពេលចរចាឡើយ។ នៅលើបណ្ដាញសង្គម Twitter ឯណោះវិញ ប្រធានាធិបតីអាមេរិករូបនេះ ក៏ឆ្លៀតអះអាងពីផលអវិជ្ជមាននៃការដំឡើងពន្ធលើសេដ្ឋកិច្ចចិនផងដែរ។ លោក ត្រាំ និយាយថា សេដ្ឋកិច្ចចិនស្ថិតក្នុងពេលវេលាយ៉ាប់បំផុតក្នុងរយៈពេល២៧ឆ្នាំមកដោយសារការដាក់ពន្ធ ហើយក្រុមហ៊ុនជាច្រើនបានចាកចេញពីចិន ដែលនេះជារឿងមិនធ្លាប់ឃើញពីមុនមក ខណៈអាមេរិកវិញរកលុយបានរាប់ពាន់លានដុល្លារពីចិន។
កុំកាប់បំពង់ រង់ចាំទឹកភ្លៀង! នេះជាការព្រមានជាថ្មីរបស់លោក ត្រាំ ក្នុងសារបន្ទាប់ទៀត។ មេដឹកនាំអាមេរិករូបនេះ ផ្ដាំចិនថា បើលោកជាប់ឆ្នោតជាប្រធានាធិបតីមួយអាណត្តិទៀត ការចរចានៅថ្ងៃខាងមុខ នឹងកាន់តែពិបាកខ្លាំង ប្រសិនប៉េកាំងព្យាយាមបន្លាយពេលរហូតដល់ការបោះឆ្នោតឆ្នាំ២០២០ ។ លោកជឿថា ចិនចង់បានប្រធានាធិបតីមកពីបក្សប្រជាធិបតេយ្យវិញដើម្បីអាចសម្រេចបានកិច្ចព្រមព្រៀងមួយដែលអនុញ្ញាតឲ្យពួកគេអាចកេងចំណេញពីអាមេរិកបានដូចមុន។
Tag:
អាមេរិក
ចិន
ដូណាល់ ត្រាំ
ជម្លោះពាណិជ្ជកម្ម
© រក្សាសិទ្ធិដោយ thmeythmey.com