អន្តរជាតិ
ក្រៅពីតំណែងរដ្ឋមន្ត្រីការពារជាតិ លោក ប្រាយុទ្ធ គ្រប់គ្រងស្ថាប័នប៉ូលិសមួយទៀត លោក ប្រាយុទ្ធ ចន្ទអូចា ដែលជានាយករដ្ឋមន្រ្តី និងជារដ្ឋមន្រ្តីការពារជាតិថៃ ប្រកាសត្រួតពិនិត្យប៉ូលិសខ្លួនឯង។
× គ្រប់គ្រងទាំងកងទ័ព ក្ដាប់ទាំងប៉ូលិស! នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី៣០ ខែកក្កដា បានបែងចែកភារកិច្ចទៅឲ្យឧបនាយករដ្ឋមន្ត្រីទាំងប្រាំរបស់លោក។ អ្វីគួរឲ្យចាប់អារម្មណ៍ លោក ប្រាយុទ្ធ ក៏បានទាញយកស្ថាប័នប៉ូលិសមកដាក់ក្រោមការគ្រប់គ្រងផ្ទាល់របស់លោកវិញ ខណៈកាលពីក្នុងរដ្ឋាភិបាលយោធា ស្ថាប័នមួយនេះ ស្ថិតក្រោមការមើលការខុសត្រូវដោយឧបនាយករដ្ឋមន្ត្រី ប្រាវីត វង្សសុវណ្ណ ។
ដោយលើកឡើងពីការបារម្ភសុខភាពរបស់លោក ប្រាវីត វង្សសុវណ្ណ ដែលជាឧបនាយករដ្ឋមន្ត្រី លោក ប្រាយុទ្ធ ចន្ទអូចា បានប្រកាសថា លោកនឹងមើលការខុសត្រូវប៉ូលិសជាតិថៃ និងធ្វើជាប្រធានគណៈកម្មការប៉ូលិសដោយខ្លួនឯង។ លោក ប្រាយុទ្ធ ប្រកាសដូចនេះ អំឡុងពេលចូលកាន់តំណែងជារដ្ឋមន្ត្រីការពារជាតិថៃនៅថ្ងៃទី៣០ ខែកក្កដា។ តំណែងរដ្ឋមន្ត្រីការពារជាតិនេះ ពីមុនក៏ជាកាន់កាប់ដោយលោក ប្រាវីត ដែរ។
លោក ប្រាវីត ដែលមានវ័យជាង៧០ឆ្នាំទៅហើយនោះ ក៏មានបញ្ហាសុខភាពផងដែរ។ ប៉ុន្តែលោក ប្រាយុទ្ធ អះអាងថា អតីតមេទ័ពជើងគោករូបនេះ នៅតែមានការប្ដេជ្ញាចិត្តក្នុងការលីអម្រែកជាច្រើនទៀតដដែល។ សម្រាប់ភារកិច្ចក្នុងរដ្ឋាភិបាលថ្មី លោក ប្រាយុទ្ធ បានឲ្យលោក ប្រាវីត មើលការខុសត្រូវក្រសួងចំនួនបួន ដឹកនាំនាំការងារចារកម្មជាតិ និងគ្រប់គ្រងក្រុមប្រឹក្សាសន្តិសុខជាតិ។ នេះបើតាមសារព័ត៌មានថៃ The Nation ។
ជាមួយនឹងតំណែងរដ្ឋមន្ត្រីការពារជាតិ និងការគ្រប់គ្រងអង្គភាពប៉ូលិសដោយផ្ទាល់បែបនេះ កិច្ចការសន្តិសុខទាំងមូល គឺស្ថិតក្នុងកណ្ដាប់ដៃលោក ប្រាយុទ្ធ តែម្នាក់ឯង។ នាយករដ្ឋមន្ត្រីរូបនេះក៏បានអះអាងថា លោកនឹងត្រួតពិនិត្យដោយផ្ទាល់រាល់សំណើដំឡើងឋានៈទាំងអស់ទាំងក្នុងជួរកងទ័ព និងជួរប៉ូលិសជាតិ សំដៅការពារស្ថិរភាពក្នុងប្រទេស។
ឧត្តមសេនីយ៍ ប្រាវីត រួមនិងរដ្ឋមន្ត្រីមហាផ្ទៃបច្ចុប្បន្ន ឧត្តមសេនីយ៍ អនុពង្ស ផៅចិន្តា ត្រូវបានចាត់ទុកជាបងប្អូនរួមអាវុធរបស់លោក ប្រាយុទ្ធ អំឡុងពេលកាន់កាប់អំណាចក្រោយរដ្ឋប្រហារទម្លាក់រដ្ឋាភិបាលស៊ីវិលនៃបក្សភឿថៃនៅឆ្នាំ២០១៤ មក។ លោក ប្រាវីត លោក អនុពង្ស និងលោក ប្រាយុទ្ធ សុទ្ធតែជាអតីតមេបញ្ជាការកងទ័ពជើងគោកដ៏មានឥទ្ធិពលដូចគ្នា និងមានប្រភពពីសម្ព័ន្ធភាពតែមួយក្នុងជួរកងទ័ពថៃផងដែរ។
ទោះទាញយកប៉ូលិសមកគ្រប់គ្រងមែន លោក ប្រាយុទ្ធ មិនទាន់សម្រេចចិត្តយកនាយកដ្ឋានស៊ើបអង្កេតពិសេស (DSI) ក៏មានឥទ្ធិពល មកដាក់ក្រោមការត្រួតពិនិត្យនៅឡើយទេ ប៉ុន្តែចង់ឃើញអង្គភាពមួយនេះមានកំណែទម្រង់។ ឯរឿងការចំណាយកងទ័ពវិញ នាយករដ្ឋមន្ត្រីរូបនេះ លើកឡើងថា យោធានឹងមិនអាចស្នើសុំការចំណាយបានច្រើនទៀតឡើយ ព្រោះរដ្ឋាភិបាលមិនសូវមានលុយច្រើន តែការទិញសព្វាវុធដែលចាំបាច់ អាចស្នើបាន៕
Tag:
ថៃ
ប្រាយុទ្ធ ចន្ទអូចា
ប្រាវីត វង្សសុវណ្ណ
© រក្សាសិទ្ធិដោយ thmeythmey.com