ស្ត្រីជាប់ទោស១៦៥ឆ្នាំ នឹងត្រូវអនុវត្តទោសធ្ងន់ធ្ងរ១ ក្នុងចំណោម៩ករណី ក្រោយបញ្ចប់នីតិវិធីតុលាការ

ជាតិ

ស្ត្រីជាប់ទោស១៦៥ឆ្នាំ នឹងត្រូវអនុវត្តទោសធ្ងន់ធ្ងរ១ ក្នុងចំណោម៩ករណី ក្រោយបញ្ចប់នីតិវិធីតុលាការ

31, Jul 2019 , 7:39 pm

រូបភាព

រូបពីគណៈកម្មាធិការសិទ្ធិមនុស្សកម្ពុជា

ដោយ: ធឿន បញ្ញាឬទិ្ធ

ភ្នំពេញ៖ ស្ត្រីម្នាក់ត្រូវបានគេរកឃើញថា កំពុងជាប់ទោស១៦៥ឆ្នាំនៅក្នុងពន្ធនាគារ តាមរយៈអំណាចសាលក្រមចំនួន៩ របស់តុលាការ។ ប៉ុន្តែទោសនេះ នឹងថមថយមកវិញ នៅពេលដែលតុលាការបញ្ចប់នីតិវិធីរបស់ខ្លួន។

អ្នកនាំពាក្យក្រសួងយុត្តិធម៌ លោក ជិន ម៉ាលីន បាននិយាយថា ទោស១៦៥ឆ្នាំរបស់ស្ត្រីម្នាក់នោះ គឺជាការបូកបញ្ចូលគ្នានៃទោសសរុប តាមសាលក្រមចំនួន៩ ដែលគាត់រងការចោទប្រកាន់ពីតុលាការ។ លោក ជិន ម៉ាលីន បានបន្ថែមថា សាលក្រមទាំង៩របស់ស្ត្រីរូបនេះ ត្រូវបានប្ដឹងផ្ដល់ឡើងមកដល់សាលាឧទ្ធរណ៍ហើយ ដែលតុលាការត្រូវការបន្តនីតិវិធីខ្លួន ឲ្យបានចប់សព្វគ្រប់សិន មុននឹងសម្រេចឲ្យស្ត្រីរូបនោះ អនុវត្តទោសធ្ងន់ធ្ងរមួយ ក្នុងចំណោមទោសទាំង៩នេះ ពោលគឺនាងមិនអាចជាប់ទោសរហូតដល់១៦៥ឆ្នាំឡើយ។

ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះ បាននិយាយដូច្នេះថា៖«ក្រោយយើងសិក្សាស្រាវជ្រាវមើលទៅ គឺទោសគាត់មិនមែន១៦៥ឆ្នាំទេ គឺគាត់មានសំណុំរឿង៩ផ្សេងគ្នា ហើយសាលក្រមនីមួយៗនេះ មានសាលក្រមខ្លះផ្តន្ទាទោសគាត់ ១៨ឆ្នាំ ខ្លះ២០ឆ្នាំ ដូច្នេះបានបូកបញ្ចូលរហូតដល់ជាង១០០ឆ្នាំ។ ប៉ុន្តែនៅក្នុងនីតិវិធីរបស់តុលាការ បានន័យថា ស្ត្រីរូបនោះ គាត់បានប្ដឹងទៅឧទ្ធរណ៍ ហើយនៅពេលតុលាការសម្រេចចុងក្រោយ ដែលដល់នីតិវិធី(បញ្ចប់សវនានៅត្រឹមឧទ្ធរណ៍)ចុងក្រោយ គឺតុលាការនឹងស្រូបទោសនេះបញ្ចូលគ្នា។ ប៉ុន្តែជាធម្មតាគេស្រូបទោសចូលគ្នានេះ គឺបានន័យថា គេមិនមែនបូកទោសនៃសាលក្រមទាំងអស់បញ្ចូលគ្នានោះទេ គឺគេ(តុលាការ)នឹងយកទោសណា ដែលធ្ងន់ជាងគេ នៅក្នុងចំណោមបទល្មើសទាំងអស់ហ្នឹង(សម្រេចឲ្យស្ត្រីនោះអនុវត្ត)។ ដូច្នេះយើងសិក្សាមើលទៅវាជានីតិវិធីតុលាការ»។

កាលពីថ្ងៃទី២ ខែកក្កដា ឆ្នាំ២០១៩នេះ គណៈកម្មាធិការសិទ្ធិមនុស្ស បានពិភាក្សាជាមួយអង្គការការអភិវឌ្ឍកុមារកម្ពុជា ហើយបានចុះទៅមណ្ឌលអប់រំកែប្រែទី២ ដើម្បីធ្វើបែបបទរដ្ឋបាល និងនីតិវិធីច្បាប់ ក្នុងការទទួលយកក្មេងចេញពីពន្ធនាគារ ប្រគល់ទៅឲ្យអង្គការការអភិវឌ្ឍកុមារកម្ពុជា ដែលស្ថិតនៅភូមិព្រែកត្រែង ឃុំសិត្បូ ស្រុកស្អាង ខេត្តកណ្តាល។ នៅគ្រាដែលក្រុមការងារគណៈកម្មាធិការសិទ្ធិមនុស្ស ចុះទៅជួបស្ត្រីនិងកូនក្នុងពន្ធនាគារនោះ ក៏បានរកឃើញស្ត្រីម្នាក់ មានទោសជាច្រើនបូកផ្សំបញ្ចូលគ្នា រហូតដល់ទៅមានទោសសរុប១៦៥ឆ្នាំ ដោយមានទាំងកូនប្រុសតូចម្នាក់អាយុទើបឆ្នាំ៣ឆ្នាំនៅជាមួយផង។ ស្ត្រីរូបនេះ បានអនុវត្តទោស៣ឆ្នាំមកហើយ។

បើតាមរបាយការណ៍នៃសាលក្រម ដែលតុលាការបានបញ្ជូនទៅលោក អង្គ វង្ស វឌ្ឍនា នោះ គឺការផ្ដន្ទាទោសស្ត្រីខាងលើនោះ ដោយយោងតាមបទល្មើសព្រហ្មទណ្ឌ ដែលស្ត្រីរូបនោះ បានជាប់ពាក់ព័ន្ធនឹងករណីប្លន់ជាមួយស្វាមីកន្លងមក។ ត្រង់ចំណុចនេះលោក វឌ្ឍនា បានបញ្ជាក់ថា សាលក្រមនីមួយៗបានកាត់ទោសឲ្យស្ត្រីរូបនោះ ជាប់ទោសពី៨ឆ្នាំឡើងទៅ។ បើតាមលោក វឌ្ឍនា ស្វាមីរបស់ស្ត្រីរូបនេះ ជាក្រុមចោរប្លន់យ៉ាងសាហាវ ដោយក្នុងមួយឆ្នាំចេញប្លន់យ៉ាងតិច៩ករណី។

តែយ៉ាងណារដ្ឋមន្ត្រីយុត្តិធម៌ បានសង្កត់ធ្ងន់ថា យោងតាមក្រមព្រហ្មទណ្ឌកម្ពុជា និងនីតិវិធីច្បាប់កម្ពុជា គឺតម្រូវឲ្យជនល្មើសជាប់ទោសណាមួយ ដែលតុលាការកាត់ឲ្យជាប់ពន្ធនាគារច្រើនជាងគេ ក្នុងចំណោមទោសដែលបានប្រព្រឹត្តប៉ុណ្ណោះ ៕