ជាតិ
សេដ្ឋកិច្ច
ត្រឹមឆមាសទី១ កម្ពុជាបាននាំចេញផលិតផលកសិកម្មជាង ២លានតោន ទៅកាន់ទីផ្សារអន្តរជាតិ រូបពីហ្វេសប៊ុកក្រសួងកសិកម្ម រុក្ខាប្រមាញ់ និងនេសាទ
× ភ្នំពេញ៖ កម្ពុជាបាននាំចេញផលិតផលកសិកម្មទៅកាន់ទីផ្សារបរទេសបានចំនួន ២,៣៧ លានតោន ក្នុងរយៈពេល៧ ឆ្នាំ២០១៩ នេះ។ នេះបើតាមការលើកឡើងរបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅក្នុងជំនួបលោក Eldeen Hasaaini bin Mohd ឯកអគ្គរដ្ឋទូតម៉ាឡេស៊ីប្រចាំកម្ពុជា ស្ដីពីការពង្រឹង និងពង្រីកកិច្ចសហប្រតិបត្តិការលើវិស័យកសិកម្ម កាលពីថ្ងៃទី ៣០ ខែកក្កដា។
លោក វេង សាខុន បានលើកឡើងពីភាពជោគជ័យរបស់កម្ពុជា ប្រាប់លោកទូតម៉ាឡេស៊ីថ្មីថា កម្ពុជាបានអភិវឌ្ឍន៍ខ្លួនពីប្រទេសដែលគ្មានលទ្ធភាពក្នុងការផ្គត់ផ្គង់ស្បៀងដល់ប្រជាជន ក្លាយជាប្រទេសដែលមានអតិរេកស្បៀងជាអង្ករជិត ៤លានតោន និងបានក្លាយជាប្រទេសដែលនាំចេញផលិតផលកសិកម្មទៅកាន់ទីផ្សារពិភពលោកផងដែរ។
ក្រៅពីបង្ហាញពីភាពជោគជ័យរបស់កម្ពុជា លោករដ្ឋមន្ត្រីកសិកម្ម ក៏បានស្នើឲ្យលោកទូតម៉ាឡេស៊ី ជួយជំរុញ វិនិយោគិនម៉ាឡេស៊ីឲ្យមកវិនិយោគលើការកែច្នៃផលិតផលកសិកម្មនៅកម្ពុជា ដើម្បីពង្រីកការនាំចូលផលិតផលកសិកម្មទៅម៉ាឡេស៊ីឲ្យកាន់តែច្រើនថែមទៀត។
គិតត្រឹមខែកក្កដា ឆ្នាំ២០១៩នេះ កម្ពុជាបាននាំចេញផលិតផលកសិកម្មសរុបជាង ២,៣៧លានតោន។ នេះបើតាមលោក វេង សាខុន ដែលបានបន្ថែមថា សមិទ្ធផលមួយទៀតដែលកម្ពុជា សម្រេចបាននាថ្មីៗនេះ គឺការនាំចេញចេកអំបូងលឿងឆ្ពោះត្រង់ទៅកាន់ទីផ្សារចិន។
ជាការឆ្លើយតបអគ្គរដ្ឋទូតម៉ាឡេស៊ី សន្យាជំរុញកិច្ចសហប្រតិបត្តិការលើវិស័យកសិកម្មនេះ ឲ្យកាន់តែរីកចម្រើនប្រកបដោយចីរភាព សម្រាប់ជាប្រយោជន៍ដល់ប្រទេសទាំងពីរ ក្នុងអំឡុងអាណត្តិរបស់ខ្លួន។ លោកថា ម៉ាឡេស៊ីបានសម្រេចបង្កើនការនាំចូលអង្ករពីកម្ពុជា ហើយកំពុងមានចំណាប់អារម្មណ៍ជាខ្លាំងលើផលិតផលដទៃទៀតរបស់កម្ពុជា ដូចជាម្រេច តាង៉ែន និងប្រេងដូងជាដើម។
បើតាមអគ្គរដ្ឋទូតរូបនេះ ក្រុមហ៊ុនវិនិយោគម៉ាឡេស៊ីមួយចំនួននឹងមកទស្សនកិច្ចសិក្សា ស្វែងយល់បន្ថែមអំពីសក្តានុពលនៃវិស័យកសិកម្មកម្ពុជា នាខែកញ្ញាខាងមុខនេះ។
កាលពីពេលថ្មីៗនេះ ចិនបានបញ្ជាទិញផលិតផលកសិកម្មចំនួន ៦ ប្រភេទ ពីកម្ពុជា រួមមាន ផ្លែសា្វយស្រស់, ផ្លែមៀនប៉ៃលិន, ម្រេច, ផ្លែស្រការនាគ, ដូងក្រអូប និងទឹកមាត់ត្រចៀកកាំ៕
Tag:
វេង សាខុន
កសិកម្ម
ម៉ាឡេស៊ី
© រក្សាសិទ្ធិដោយ thmeythmey.com